މިރޭ ބޭއްވުމަށް މަސައްކަތްކުރި އެމްޑީޕީގެ ޤައުމީ މަޖިލީހުގެ ޖަލްސާ ކޯރަމް ހަމަނުވުމުން ނުބޭއްވުނެއެވެ.

އެމްޑީޕީން ވަނީ މިރޭ ޤައުމީ މަޖިލިސްގެ ޖަލްސާއެއް ޖަމާލުއްދީން ސްކޫލުގައި ބޭއްވުމަށް މަސައްކަތް ކޮށްފައެވެ. ނަމަވެސް މިޖަލްސާއަށް ހާޒިރުވި މެމްބަރުންގެ އަދަދު މަދުވެގެން ޖަލްސާވަނީ ކެންސަލް ކޮށްފައެވެ.

އެމްޑީޕީގެ ޤައުމީ މަޖިލީހުގެ ޖަލްސާއެއް ބޭއްވެނީ އެޕާޓީގެ އަސާސީ ޤަވާއިދު ބުނާގޮތުން، ޤައުމީ މަޖިލީހަށް ހާޒިރުވާންޖެހޭ ޝަރުތު ހަމަވާ މެމްބަރުންގެ ތެރެއިން ހަތަރުބައި ކޮށްފަ އެއްބަޔަށްވުރެ ގިނަ މެމްބަރުން ހާޒިރުވެގެންނެވެ. މިފަހުން ބާއްވާ އެމްޑީޕީގެ ގިނަ ޖަލްސާތަކުގައި އޮންނަނީ ރައީސް ނަޝީދަށް ދިން ހަމަމަލާގެ މައުލޫމާތު އެމްޑީޕީގެ މެއި 6 ކޮމެޓީން ދިނުމެވެ.

ނަމަވެސް މިކަމަށް އެމްޑީޕީގެ ޤައުމީ މަޖިލީހުގެ ގިނަ މެމްބަރުން މާބޮޑު ޝައުގުވެރިކަމެއް ނުދެއްވައެވެ. މިމައްސަލާގައި އެމްޑީޕީން ބޭއްވި ޤައުމީ މަޖިލީހުގެ ޖަލްދސާއެއްގައި ރައީސް ނަޝީދަށް ތާއީދު ކުރައްވާ މެމްބަރުން ވަނީ ވަރަށް ބޮޑަށް ފާޑުވިދާޅުވެފައެވެ. އަދި މިއީ އެމްޑީޕީގެ ރައީސަށް ދިން ހަމަލާއަށް އެމްޑީޕީގެ ޤައުމީ މަޖިލީހުގެ ގިނަ މެމްބަރުންގެ ސަމާލުކަމެއް ނެތްކަން ހާމަވާކަމެއްކަމަށް ވަނީ ބުނެފައެވެ.

މިހާރު އޮތް އެމްޑީޕީ ޤައުމީ މަޖިލީހުގެ މެމްބަރުންގެ ދައުރު ހަމަވެފައި ވީނަމަވެސް މިމަހުގެ 25 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޤައުމީ މަޖިލީހުގެ އިންތިޚާބާއިއެކު އެމެމްބަރުންގެ ދައުރު ހަމަވެގެންދާނެއެވެ. މިއިންތިޚާބުގައި ރައީސް ޞާލިހާއި، ރައީސް ނަޝީދަށް ތާއީދު ކުރާ މެމްބަރުން ވަރަށް ވާދެވެރި ކެމްޕެއިނެއް ދަނީ ކުރައްވަމުންނެވެ. މިއިންތިޚާބަކީ އެމްޑީޕީގެ ރިޔާސީ ޓިކެޓާއިވެސް ގުޅިފައިވާ އިންތިޚާބެކެވެ.