ޚަބަރު އޮންލައިން، އޮންލައިން ނޫހެއްގެ ގޮތުގައި ހޯމް މިނިސްޓްރީގައި ރަޖިސްޓްރީ ކުރެވިފައިވަނީ، 2020 ވަނަ އަހަރުގެ ސެޕްޓެމްބަރު މަހުގެ 7 ވަނަ ދުވަހުއެވެ. އަދި އެދުވަހަށްފަހު، މެދު ކެޑުމެއް ނެތި، ޚަބަރު އޮންލައިންއިން މައުލޫމާތާ ޚަބަރުތައް އާންމު ރައްޔިތުންނާއި ހަމައަށް ގެނެސްދިނުމުގައި ފާއިތުވި އެއް އަހަރުގެ ތެރޭގައި މަސައްކަތް ކޮށްފައިވަނީ، ވަރުބަލިކަމެއް ނެތި، ތާޒާކަމާއެކު، ދުނިޔެއާއި ރާއްޖޭގެ އެކި ކަންކޮޅުތަކުގައި ހިގަމުންދާ ތެދު ޚަބަރާއި މަޢުލޫމާތު ކިޔުންތެރިންނާ ހަމައަށް ގެނެސް ދިނުމަށެވެ.

މިގޮތުން، މުޅި ދުނިޔެއަށް ސިއްޙީ ބޮޑު ކާރިސާއެއް އާންމުވެގެން ގޮސްފައިވާއިރު، އަދި ވަކީން ޚާއްސަކޮށް މި ޙާއްސާސީ ދަނޑިވަޅުގައި، ސަރުކާރާއި އަދި ދުނިޔޭގެ ތަފާތު އެކި ސިއްޙީ އިދާރާތަކުންވެސް އިރުޝާދު ދީފައިވާ ގޮތުގެމަތިން، ކޯވިޑްގެ އާލަމީ ވަބާގެ ސައްޙަ ޚަބަރާއި މައޫލޫމާތު ވީހާވެސް ފުޅާ ދާއިތާއެއްގައި އޮންލައިންގެ ޒަރީއާއިން ފޯރުކޮށް ދިމުމަށް ޚަބަރު އޮންއިންވަނީ ވަކީން ޚާއްސަ ސަމާލުކަމެއް ދީގެން ފައިތުވެދިޔަ އަހަރެއްހާ ދުވަހުގެ ތެރޭގައި މަސައްކަތް ކޮށްފައެވެ.

އަދި މީގެ އިތުރުންވެސް، ރާއްޖޭގެ ސިޔާސީ، އިޖުތިމާޢީ އަދި އިގްތިސާދީ ދާއިރާއާއި ގުޅޭ މުހިންމެ މައުލޫމާތުތައް، ވަކި ފަރާތަކަށް ބުރަވުމެއް ނެތި، އެންމެ ތާޒާކަމާއެކީ އާންމު ރައްޔިތުންނާ ހަމައަށް ފޯރުކޮށްދެވޭތޯ މަސައްކަތް ކުރުމަކީ، އެންމެ ފުރަތަމަ ދުވަހުން ފެށިގެންވެސް ޚަބަރު އޮންލައިންއިން ކަނޑައެޅި އެންމެ މުހިންމު އެއް ލަޑު ދަނޑިއެވެ.

އެންމެ ބޮޑު އަމާޒު، ވަކިފަރާތަަށް ނުޖެހި، ތާޒާ ޚަބަރު ގެނެސްދިނުމަށް

ޚަބަރު އޮންލައިންގެ މެނޭޖުމަންޓުން މައުލޫމާތު ދީފައިވާ ގޮތުގައި، ފާއިތުވެދިޔަ އެއް އަހަރު ވެގެން ދިޔައީ ޒިންމާދާރު ކަމާއެކު، ޖަވާބުދާރީ ކުރުވަނިވި ނޫސްވެރިކަމެއް ކުރުމުގައި ބޮޑެތި ގޮންޖެހުންތަކަކާ ކުރިމަތި ލާންޖެހުނު އެއް އަހަރު ކަމުގައެވެ. މިގޮތުންވެސް އެންމެ ބޮޑަށް ފާހަގަ ކުރެވިގެން ގޮސްފައިވަނީ، ކުޑަ ޓީމަކާއެކީ މަސައްކަތް ކޮށް، ރައްޖޭގައި މިވަގުތު އޮތް ހަލަބޮލި ސިޔާސީ މަސްރަހުގައި ހިންގާ އެންމެހާ ކަންކަމުގެ ތެދު މައުލޫމާތާ ޚަބަރުތައް، ވަކި ފަރާތަކަށް ބުރަވުމެއް ނެތި، ތާޒާކަމާއެކު ގެނެސް ދިނުމެވެ.

މިއުސޫލުން ބަލާއިރު، ރާއްޖޭގެ ނޫސްވެރިކަމާއި މީޑިއާގެ ދާއިރާގައިވެސް އިންތިހާއަށް ސިޔާސީ ކުލަ ޖެހެމުންދާއިރު، މިފަދަ، އުދަގޫ އަދި ގިނަފަހަރަށް ޒާތީ ތައްސުބާއެކު މަސައްކަތް ކުރަމުންދާ މާހައުލެއްގައި، އަދި ވަކި ފަރާތަކަށް ބުރަވެގެން ޚަބަރާއި މަޢޫލޫމާތު ގެނެސްދޭކަމުގެ ތުހުމަތުވެސް އާންމުކޮށް ނޫސް މީޑިއާތަކުގެ މައްޗަށް ކުރެވެމުންދާ މިފަދަ މާހައުލެއްގައި، ރަހަތައް ހެޔޮވަރުކޮށް ޚަބަރާއި މައުލޫމާތު ގެނެސްދީ، އިތުބާރު ހިފޭ މީޑިއާއެއްގެ ދައުރު އަދާކުރުމުގައި ގޮންޖެހުންތަކާ ކުރިމަތި ނުވެ ނުދާނެކަމީ މިއަދު ގަބޫލުކުރަންޖެހޭ ވަރަށް ބޮޑު ހަގީގަތެއްވެސް މެއެވެ.

އެހެންނަމަވެސް، ޚަބަރު އޮންލައިން އިން، އަމާޒު ކަޑައެޅީ ގަދަ ކަޑެއްގައި ދަތުރުކުރަން ފުރުސަތު ލިބިގެން ދިއުމަކީ، އަދި ސިޔާސީ ގޮތުންނާއި އެހެނިހެން ގޮތްގޮތުންވެސް ގިނަ ގޮންޖެހުންތަކާ އެކީ ނޫސްވެރިކަން ކުރިއަރުވާ، އަދި ގޮންޖެހުންތައް ގިރާކޮށް، އެރޮގުން ގައުމަށް ޚިދުމަދެއް ކުރެވިދިއުމަކީ، އޭގެ ފައިދާ ހުރިހާ ގޮތަކުން ނޫސްވެރިކަމުގެ ދާއިރާއިން ނުފެނި ނުދާނޭ ކަމެއްގެ ގޮތުގައެވެ.

މިގޮތުން، ގައުމުގައި ހިގާ މުހިންމު ގިނަ ކަންކަމުގެ މައުލޫމާތާ ޚަބަރު، ޚަބަރު އޮންލައިންއިން ގެނެސްދީފައިވާނީ، އެއްވެސް ފަރާތެއް އަބުރަށް އަރައިނުގަނެ، ތަންތަނާއި މީހުންގެ ކަރާމާތައް ގެއްލުން ނުލިބި، ޝަރަފްވެރި ނޫސްވެރިކަމެއް ކުރުމުގެ އަޒުމުގައެވެ. ޚަބަރެއް ގެނެސް ދިނުމުގައި، އެންމެ ބޮޑަށް ސަމާލުކަން ދީފައިވާނީ، ޚަބަރު ރައްދުވާ ފާރާތުގެ ބަސްވެސް ހިމަނާ، އެހެންނަމަވެސް ވަކި ފަރާތެއްގެ ނުފޫޒު ނުފޯރާނޭ ބީދައަކުން މިނިވަންކަމާ އެކީ، މައުލުމާތާ ޚަބަރު ރިޕޯޓު ކުރުމަށެވެ.

ޒިންމާ ދާރު ނޫސްވެރިކަމެއް އޮތުން މުހިންމު

ނޫސްވެރިކަމާއި، މީޑިއާގެ ވަސީލަތަކީ ޑިމޮކްރަސީގެ 4 ވަނަ ބާރުކަމަށް ވުމާއެކު، މީޑިއާގެ ވަސީލަތް ހަގީގަތުގައިވެސް ވާންޖެހޭނީ ޒިންމާދާރު، މިނިވަން ވަސީލަތަކަށެވެ. ސަބަބަކީ، މީޑިއާގެ ވަސީލަތަކީ، މައުލޫމާތު ފެތުރުމާއި، އަދި ގައުމުގެ އެކި ކަންކޮޅުތަކުގައި ހިގާ ކަންކަމުގެ ޚަބަރުތައް އާންމުންނާ ހަމަށް ފޯރުކޮށް ދިނުމުގެ މަސްއޫލިއްޔަތު އުފުލާ ފަރާތް ކަމުގައި ވާތީވެސްމެއެވެ.

ނަތީޖާއެއްގެ ގޮތުން، ދޮގު މައުލޫމާތާއި ޚަބަރު، މީޑިއާގެ ވަސީލަތްތައް މެދުވެރިކޮށް ގެނެސްދީ، އެކަން އާންމުވެގެން ހިގައްޖެނަމަ،، އޭގެ ނަތީޖާއެއްގެ ގޮތުން ގައުމުގެ ހަމަޖެހުން ގެއްލި، ގައުމު ދާޚީލީ އެތަކެއް މައްސަލަތަކެއްގެ ތެރެއަށް ޢަރަގުވެގެން ދިއުން އޮންނާނީ ވަރަށްވެސް ކައިރީގައެވެ.

މީގެ އިތުރު ފާހަގަ ކޮށްލަންޖެހޭ އެންމެ މުހިންމު އަނެއް ނުކުތާއަކީ، ނޫސްވެރިކަމާއި މީޑިއާތަކަށްވެސް އިންތަކާއި މިންތަކެއް ގާނޫނު އަސާސީންނާއި ގާނޫނުތަކުންވެސް ކަނޑައަޅާ ދީފައިވާ ކަމެވެ. އެއީ ޒިންމާދާރު މީޑިއާތަކެއް އުފަންވެ، އެމީޑިއާތައް ވުޖޫދުން ފޮފެވިގެން ދިޔަނުދީ ދެމި އޮތުމަށްޓަކައެވެ. އަދި އެއީ ހަގީގީ ޑިމޮކްރަސީއެއް ދިރިދެމި އޮތުމަށްޓަކާވެސް މެއެވެ.

މިގޮތުން، ނޫސްވެރިންނާ މީޑިއާތައް މަގުން ކައްސާލައިފި ނަމަ މިފަދަ ކޮންމެ ހާލަތަކަށްވެސް ތައްޔާރުވެ ތިބޭ މިނިވަން މުވައްސަސާތަކެއްވެސް، ގާނޫނު އަސާސީންނާއި އަދި ގާނޫނުތަކުން ވަނީ މީޑިއާ މިނިވަން ކުރުމަށްޓަކާ އުފައްދާފައެވެ. އަދި މިމުވައްސަސާތަކުގެ އެންމެ މައިގަޑު މަގުސަދަކީ ރާއްޖޭގައި ހިގަމުންދާ މީޑިއާތަކަށް ފާރަވެރިވުން ކަމަށް ވާއިރު، މިމަގުސަދު ހާސިލް ކުރުމުގެ ގޮތުން މިމުވައްސަސާތަކުން އަދަށްވުރެ ފުރިހަމަކޮށް، އަމިއްލަ އިސްނެގުމާއެކު މަސައްކަތް ކުރަންޖެހޭ ކަމަށް އަޅުގަޑުމެން ދެކެމުއެވެ.

މިގޮތުން ބަލާއި، މިއަދު ރާއްޖޭގައި އެތަކެއް އޮންލައިން ނޫސްތަކެއް ހިންގަމުންދާއިރު، ސަރުކާރުން އެކަށައަޅުއްވާފައި އޮންނަ އުސޫލުތަކާއި އެއްގޮތަށް، ރަޖިސްޓްރީ ނުކޮށް ހިންގާ ނޫސްތައްވެސް މީޑިއާގެ ދާއިރާގައި އެބަ ހަރަކަކާތްތެރި ވެއެވެ. އަދި ގިނަފަހަރަށް މިފަދަ އޮންލައިންތަކުން އަނެކުންގެ އަބުރު ކަތިލާ، ފަތުރާފައިވާ މައުލޫމާތުތަކުގެ ނަތީޖާއެއްގެ ގޮތުން، ނަފްސާނީ ގޮތުންވެސް އަދި ޖިސްމާނީގޮތުންވެސް ބައެއް ފަރާތަކަށް ބޮޑެތި ގެއްލުންތަކާ ކުރިމަތި ލާންޖެހިފައިވާ ކަންވެސް މިފުރުސަތުގައި ފާހަގަ ކޮށްލަން ޖެހެއެވެ.

އެހެންކަމުން، މިނިވަން މީޑިއާތައް އޭގެ އެންމެ ފުރިހަމަ ގޮތުގައި ހަރަކާތަތްތެރި ވުމަށްޓާކާ، މީޑިއާ ރެގިއުލޭޓް ކުރުމަށްޓަކާ އުފެދިފައިވާ މުވަސަސާތަކަކީ ދަތް ހުރި މުވައްސަސާތަކަކަ ވާން ޖެހެއެވެ.

ގަވާއިދުތަކާއި އުސޫލުތައް ތަންފީޒު ކުރުމަށް އެކަށީގެންވާ ހަރުދަނާކަން ނުވަތަ ޒިންމާދާރު ގޮތުގައި ހަރުކަށިކަން ނުދެއްކި، މީޑީއާތައް ޒިންމާދާރު ކުރުވުމުގެ ނަމުގައި، އުފެދިފައިވާ މުވައްސަސާތަކަކީ ހަމައެކަނި ހުށަހެޅޭ މައްސަލަތައް ބެލުމުގެ ޒިންމާ އެކަނި އުފުލާ ތަންތަން ކަމުގައި ވެގެން ހިގައްޖެނަމަ، ދުވަހަކުވެސް، “ގެރި މަރުވުމުގެ ކުރިން” މިއިން މުވައްސަސާއަކަށް މީޑިއާ ޒިންމާދާރު ކުރުވޭނެ ދުވަހެއް އަންނާނެ ކަމަކަށް ނުބެލެވެއެވެ.

މާނައަކީ، މީޑިއާކުން މީހެއްގެ އަބުރަށް އަރައިގަތުމުން، އެމީހާގެ އަބުރު ވެއްޔާ މޮޑެވިގެންގޮސް، ކިތަންމެ ބޮޑު ދޮގެއްވެސް ތެދެއްކަމުގައި ގަބޫލުކުރެވި، މުޖަތަމަޢުގައި އާންމު ފަރުދުންނަށް ދިރިއުޅެން އުދަގޫވާ ހާލަތަށް ކަން އޮންނަނީ ގޮސް ނިމިފައެވެ.

ފެންނާން މިޖެހެނީ މިނޫން އުސޫލަކުން މީޑިއާތައް ރެގިއުޅޭޓް ކުރެވި، އަމިއްލައަށް އިސްނަގައިގެން، ވަގުތު ފާއިތު ވުމުގެކުރިން ފިޔަވަޅު އަޅާ، މީޑިއާތައް ޒިންމާދާރު ކުރުވި، މިނިވަން ނޫސްވެރިކަމެށް މިރާއްޖޭގައި ހިނގަމުން ދާތަނެވެ.