ރަސްމީ ދަތުރުފުޅެއްގައި، ރައީސް އިބްރާހިމް މުހަންމަދު ޞާލިހް ށ އަދި ރ އަތޮޅުގެ ބައެއް ރަށްތަކަށް ދަތުރުކުރުމަށް ހަމަޖެހިއްޖެއެވެ.
ރައީސް އޮފީހުގެ ތަރުޖަމާނު، މިއަދު ކުރެއްވި ޓްވީޓެއްގައި ވިދާޅުވެފައިވަނީ، ރަސްމީ ދަތުރުފުޅެއްގައި މާދަމާ ރައީސުލްޖުމްހޫރިއްޔާ ދެއަތޮޅަކަށް ވަޑައިގަންނަވާނެ ކަމުގައެވެ. މި ދަތުރު ކުރެއްވުމަށް ހަމަޖެހިފައިވަނީ ށ. އަތޮޅުގެ ބައެއް ރަށްތަކަށާއި ރ.އަތޮޅުގެ ބައެއް ރަށްތަކަށެވެ. އެގޮތުން ށ.އަތޮޅު ފުނަދޫ، ޅައިމަގު، ފޯކައިދޫ އަދި މާއުނގޫދޫ އަށް ޒިޔާރަތް ކުރުމަށް ހަމަޖެހިފައިވެއެވެ. އަދި ރ. އަތޮޅު ވާދޫ، އަލިފުށި، ރަސްގެތީމު އަދި އަނގޮޅިތީމަށް ޒިޔާރަތް ކުރުމަށްވެސް ހަމަޖެހިފައިވެއެވެ.
މިސަރުކާރު ވެރިކަމާއި ހަވާލުވުމަށްފަހު، ރައީސުލްޖުމްހޫރިއްޔާ އަތޮޅުތެރޭގެ ރަށްތަކަށް ދަތުރުކުރެއްވި ނަމަވެސް ކޯވިޑްގެ ޙާލަތާއި ގުޅިގެން ރަސްމީ ދަތުރުފުޅުތައް މަޑުޖައްސާލުމަށްފަހު މިއަހަރުގެ ޖުލައި މަހުން ފެށިގެން އެދަތުރުފުޅުތައް ވަނީ ފަށާފައިވެއެވެ. އެގޮތުން މިއަހަރުގެ ޖުލައި މަހު ހދ. އަތޮޅުގެ ރަށްތަކަށް އަދި އޯގަސްޓް މަހު ތ.އަތޮޅުގެ ރަށްތަކަށް ވަނީ ދަތުރު ކުރައްވާފައެވެ.
މިދަތުރުފުޅުތަކާއި ގުޅިގެން، އިނދިކޮޅު ޕާޓީތަކުން ވަނީ ރައީސުލްޖުމްހޫރިއްޔާއަށް ފާޑުކިޔުންތައް އަމާޒު ކުރައްވާފައެވެ. ނަމަވެސް، ރައީސް ތ. އަތޮޅަށް ވަޑައިގަތީ ކައުންސިލްތަކާ ގާތުން މަސައްކަތް ކުރައްވަން ބޭނުންފުޅުވާތީ ކަމަށް ރައީސް އޮފީހުގެ ތަރުޖަމާނު މަބްރޫކް ޢަޒީޒު ވިދާޅުވެފައިވެއެވެ. އެދަތުރުފުޅުތަކުގައި، ސަރުކާރުގެ ވުޒާރާތަކުގެ އިސްވެރިންނާއި ކައުންސިލްތަކުން ބައިވެރިވެ ވަޑައިގެންފައިވެއެވެ. ހަމައެހެންމެ، ސަރުކާރުން ކުރިއަށް ގެންދަވާ މަޝްރޫއުތައް ބައްލަވައި ކައުންސިލްތަކާއި ބައްދަލުކުރައްވާފައިވެސް ވެއެވެ.
މާދަމާ ކުރުމަށް ހަމަޖެހިފައިވާ ރަސްމީ ދަތުރުފުޅުގެ އިތުރު މައުލޫމާތެއް ތަރުޖަމާނު ނުދެއްވައެވެ.
