މޭ6ގެ ހަމަލާއަށްފަހު ރާއްޖެއިން ބޭރުގައި ފަރުވާ ހޯއްދަވަމުންދާ ރައީސް ނަޝީދަށް ރާއްޖެ އައުމަށް، ރައީސް އިބްރާހިމް މުހައްމަދު ޞާލިހު އެއްވެސް ހުރަހެއް ނާޅުއްވާނެކަމުގެ ފުރިހަމަ ޔަގީންކަން އެބައޮތްކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހަމަލާއަށް ފަހު ފުރަތަމަ ފުރަތަމަ ފަހަރަށް ބޭއްވި ނޫސްވެރިންގެ ބައްދަލުވުމުގައި، ނަޝީދު މިއަދު ވިދާޅުވީ އެ މަނިކުފާނު އިނގިރޭސި ވިލާތުގައި ހުންނެވީ ސަރުކާރުން އެގޮތަށް އެދޭތީ ނޫން ކަމަށެވެ. ރައީސް އިބްރާހިމް މުހައްމަދު ސޯލިހް އެދިވަޑައިގަންނަވާނީ މާލޭގައި ހުންނަވައި އެކުގައި ސައިފޮދު ހިއްޕަވައި ހީ ސަމާސާ ކުރައްވަން ކަމަށް ނަޝީދު ވިދާޅުވިއެވެ.
އެމަނިކުފާނު ވިދާޅުވީ މިހަމަލާގައި ސަރުކާރުގެ އެއްވެސް ވަރެއްގެ ހިއްސާއެއް އޮތްކަމަށް ގަބޫލު ނުކުރައްވާކަމަށެވެ. އަދި މިހަމަލާގެ ކަންކަން އިންސާފުވެރިކަމާއިއެކު ބެއްލެވުމަށް ރައީސް ޞާލިހާއި ސަރުކާރުގެ މުއައްސަސާތަކުން ވަރަށް ފާރަވެރިކަމާއިއެކު މަސައްކަތް ކުރައްވާކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު މިފަދަ ގޮތަކަށް ވިދާޅުވިއިރު، ރައީސް ޞާލިހުވެސް ވަނީ ރައީސް ނަޝީދަށް ރާއްޖެ ވަޑައި ނުގެންނެވޭފަދަ ހާލަތެއް ނެތްކަމަށް ވިދާޅުވެފައެވެ. އަދި ރައީސް ނަޝީދަށް ދެއްވަންޖެހޭ ފުރިހަމަ ރައްކާތެރިކަމާއި ހިމާޔަތް މިހާރުވެސް ދެއްވަމުންދާކަމަށާއިި، އެކަން ކުރިއަށް އޮތްތަނުގައިވެސް ބަރާބަރަށް ދެއްވާނެކަމުގެ ޔަގީންކަން ރައީސް ޞާލިހު ވަނީ ދެއްވާފައެވެ.
