ދިވެހި ރާއްޖެ މިއަދު އޮތް ހިތްދަތި ހާލަތުން އަރައިގަތުމަށްޓަކައި، ކަންކަން ނިންމުމުގެ ހުރިހާ ބާރެއް އޮތީ ދިވެހި ރާއްޖޭގެ އެންމެ މަތީ ކޯޓު ސްޕްރީމް ކޯޓުގައިކަމަށް އިދިކޮޅު ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އިދިކޮޅު ކޯލިޝަނުން ރޭ ބޭއްވި ނޫސްވެރިންގެ ބައްދަލުވުމުގައި، އަބްދުއްރަހީމް ވިދާޅުވީ ރާއްޖޭގެ ޝަރުއީ ނިޒާމުގައި އަދުލުވެރިކަން ގެއްލި، ޝަރުއީ މަރުހަލާއިން ކުރާ ހުކުމްތަކަކީ އިންސާފުވެރި ހުކުމްތަކަކަށް ވާންޖެހޭކަމަށެވެ. އެއީ ކޮންމެ މީހަކަށް ކުރާ ހުކުމެއް ނަމަވެސް އެހުކުމެއް އިންސާފުވެރި ވާންޖެހޭކަމަށެވެ. ކުރީގެ ރައީސް ޔާމީނަށް ކޮށްފައިވާ ހުކުމަކީ ނާއިސާފު، ހަރާން ހުކުމެއްކަން ދިވެހި ހުރިހާ ރައްޔިތުން ގަބޫލު ކުރާއިރު، ފަނޑިޔާރުންގެ ދޫފުޅުން ދައްކަވާފައިވާ ވާހަތަކުންވެސް މިހުކުމާއިމެދު ސުވާލު އުފެއްދުމުގެ ޖާގަ އެބައޮތްކަމަށް އަދުރޭ ވިދާޅުވިއެވެ.
ރައީސް ޔަމީނަކީ ދިވެހިންގެ މިނިވަންކަމަށާއި، ސިޔާދަތާއި އިސްތިޤުލާލަށް ނުހަނު އަގުހުރި ޚިދުމަތްތަކެއް ކުރައްވާފައިވާ ބޭފުޅަކަށްވާއިރު، މިޤައުމު ސަލާމަތް ކުރުމަށް ރައީސް ޔާމީނަށް ދިވެހި ރައްޔިުޔން އެދޭއިރު އެކަން ކޮށްދެވޭނެ އަދި ޤައުމު ސަލާމަތްކޮށްދެވޭނެ ބާރު އޮތް ހަމައެކަނި ބަޔަކީ ސްޕްރީމް ކޯޓުކަމަށް އަދުރޭ ވިދާޅުވިއެވެ.
މަނީ ލޯންޑަރިންގެ ކުށުގައި ރައީސް ޔާމީން 5 އަހަރަށް ޖަލަށްލައި 5 މިލިއަން ޑޮލަރުން ޖޫރިމަނާކޮށްފައިވާ މައްސަލައިގެ އިސްތިއުނާފު އަޑުއެހުންތައް ފެށުމަށް ސްޕްރީމް ކޯޓުގައި ތަޢާވަލުކޮށްފައިވަނީ މިމަހުގެ 12ވަނަ ދުވަހާއި 13ވަނަ ދުވަހުގައެވެ. މި ދެދުވަހުވެސް ޝަރީއަތް ތަޢާވަލުކޮށްފައިވަނީ ހެނދުނު 09:00އަށެވެ. ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ.އަޒްމިރާލްދާ ޒާހިރާއި ފަނޑިޔާރު ޑރ.މުހައްމަދު އިބްރާހީމްއެވެ.
ކުރީގެ ރައީސް ޔާމީންގެ މައްޗަށް މަނީ ލޯންޑަރިން ކުށް ސާބިތުވެ ފަސް މިލިއަން ޑޮލަރުން ޖޫރިމަނާކޮށް ފަސް އަހަރަށް ޖަލަށްލުމަށް ކްރިމިނަލްކޯޓުން ހުކުމްކުރީ 2019ވަނަ އަހަރުގެ ނޮވެމްބަރު މަހުގެ 28 ވަނަދުވަހުއެވެ. ކްރިމިނަލް ކޯޓުން ކުރި ހުކުން ހައިކޯޓުގައި އިސްތިއުނާފްކުރުމުން، ދަށުކޯޓުގެ ޙުކުމް ދަމަހައްޓަން ހައިކޯޓުން ނިންމާފައިވަނީ މިދިޔަ ޖެނުއަރީ މަހުގެ 21ވަނަ ދުވަހުއެވެ.
