ގުރޭޑު 1ގެ ކުދިންގެ ޤުރުއާން މާއްދާގައި ސޫރަތެއް ނުބައިކޮށް ލިޔެފައިވާކަން ފާހަގަކުރެވިގެން އެ މައްސަލަ ހައްލުކުރުމުގެ މަސައްކަތް ފަށައިފިއެވެ.
ޤުރުއާން މާއްދާގައި ސޫރަތެއް ނުބައިކޮށް ލިޔެފައިވާކަން ފުރަތަމަ ހާމަކުރެއްވީ ކުރީގެ އިސްލާމިކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދުއެވެ. ޑރ.ޝަހީމް ވިދާޅުވީ، ގްރޭޑް 01 ގެ ޤުރުއާން ފޮތުގައި އައްނަބައު ސޫރަތާއި އައްނާޒިޢާތު ސޫރަތުގެ އާޔަތްތައް އެއްވެ، އެއް ސޫރަތެއްގެ ގޮތުގައި އޮތްކަން ދަނެގަތީ ޣިޔާސުއްދީން ސުކޫލްގެ ދަރިވަރު އަބްރަމް އަޒްހާން ފަހުމީކަމަށެވެ. މިކަމުން ރަމްޒުކޮށްދެނީ އެ ދަރިވަރު ޤުރުއާނަށް ހޭލުންތެރިވެފައިވާ މިންވަރުކަމަށްވެސް ޑރ.ޝަހީމް ވިދާޅުވިއެވެ.
ޑރ.ޝަހީމް ވަނީ އެދަރިވަރުގެ ބެލެނިވެރިންނަށް ޝުކުރު އަދާކުރައްވާފައެވެ.
އޭނާގެ ބެލެނިވެރިންނަށް ޝުކުރު ދަންނަވަން.އަދި މިކަން އަޅުގަނޑުގެ ސަމާލުކަމަށް ގެެނެސްދެއްވި އެ ދަރިވަރުގެ ބޭބެ އެކުވެރި ޝަހުބާނަށް ޝުކުރު ދަންނަވަން.
— Mohamed Shaheem Ali Saeed (@Mohamedshaheem1) September 4, 2021
ޤުރުއާން މާއްދާގައި ނުބައިކޮށް ސޫރަތެއް ލިޔެފައިވާ މައްސަލައާއި ގުޅިގެން އެޑިއުކޭޝަން މިނިސްޓްރީން ބުނީ، އެމައްސަލައެއް ޙައްލުކުރުމުގެ މަސައްކަތް ކުރަމުން އަންނަ ކަމަށެވެ.
އެމިނިސްޓްރީން ނެރެފައިވާ ނޫސްބަޔާނެއްގައި ބުނެފައިވަނީ، ގުރޭޑު 1ގެ ޤުރުއާން މާއްދާގެ ދަރިވަރުންގެ ފޮތް ޕްރިންޓުކުރިއިރު ދެ ސޫރަތެއްގެ އާޔަތްތައް އެކުވެފައިވާކަމަށެވެ. މިކަން މިނިސްޓްރީއަށް ފާހަގަވި ހިސާބުން އެކަން ޙައްލުކުރުމުގެ މަސައްކަތް ނޭޝަނަލް އިންސްޓިޓިއުޓް އޮފް އެޑިއުކޭޝަން އެންއައިއީ އިން ފަށާފައިވާކަމަށެވެ. އެގޮތުން މައްސަލަ ދިމާވި ޤުރުއާން ފޮތުގެ އެސަފްޙާ ބަދަލުކުރުމުގައި ޢަމަލުކުރާނެ ގޮތް ސްކޫލްތައް މެދުވެރިކޮށް ބެލެނިވެރިންނަށް އަންގަމުންދާނެ ކަމަށް އެޑިއުކޭޝަން މިނިސްޓްރީން ބުންޏެވެ.
މިފޮތްތަކަކީ ޕްރިންޓު ކުރުމުގެ ކުރިން އެޑިއުކޭޝަން މިނިސްޓްރީއާއި އެންއައިއީ އާއި މިނިސްޓްރީ އޮފް އިސްލާމިކް އެފެއާޒުން ބަލާ ޗެކްކޮށްފައިވާ ފޮތްތަކެއް ކަމަށް އެޑިއުކޭޝަނުން ބުނެފައިވެއެވެ. އެހެންކަމުން މިމައްސަލަ ދިމާވި ސަބަބު ދެނެގަތުމުގެ މަސައްކަތްވެސް ކުރަމުން އަންނަ ކަމަށްވެސް އެމިނިސްޓްރީން ބުންޏެވެ.
ސްކޫލް ކުދިންގެ އިސްލާމް ފޮތްތަކުގައި މައްސަލަތަކެއް ހުރިކަމަށް ބުނެ އެފޮތަށް ބައެއް ބަދަލު ގެންނާނެ ކަމަށް ބައެއް ފަރާތްތަކުން ވާހަކަދައްކަމުން ދިޔުމާއި ގުޅިގެން ގިނަ ބަޔަކުވަނީ ކަންބޮޑުވުން ފާޅުކޮށްފައެވެ. އެހެން ނަމަވެސް މިފަދަ އެއްވެސް ބަދަލެއް އިސްލާމް ފޮތަށް ގެންނަން ނުވިސްނާ ކަމަށް އެޑިއުކޭޝަނުންވަނީ ހާމަކޮށްފައެވެ.
އަދި ޤުރުއާނާއި އިސްލާމް މާއްދާ ކިޔަވައިދިނުމަށް ބިދޭސީ ޓީޗަރުން ގެނައުމާއި ގުޅޭ ވާހަކަތަކެއްވެސް ފެންމަތިވިއެވެ. ނަމަވެސް އެޑިޔުކޭޝަން މިނިސްޓްރީން ވަނީ އެކަން ދޮގުކޮށްފައެވެ.
