ދިވެހިރާއްޖެއިން ޢުމްރާއަށް މީހުން ގެންދިއުމަށް ހުއްދަ ދީފައިވާ ކުންފުނިތަކުގެ ހުއްދައިގެ މުއްދަތު އެއް އަހަރު ދުވަހަށް އިތުރުކޮށްފިއެވެ.
އިސްލާމިކް މިނިސްޓްރީން ބުނީ، ދިވެހިރާއްޖެއިން އުމްރާއަށް މީހުން ގެންދިއުމަށް މިހާރު ހުއްދަ ދީފައިވާ ކުންފުނިތަކަކީ ދިވެހިރާއްޖެއިން ޢުމްރާއަށް މީހުން ގެންދިއުމާބެހޭ އުޞޫލުގެ ދަށުން 2 އަހަރު ދުވަހުގެ މުއްދަތަށް ހުއްދަ ދީފައިވާ ކުންފުނިތަކެއް ކަމަށެވެ. ކޮވިޑް 19ގެ ސަބަބުން 2020 އަދި 2021 ވަނަ އަހަރުގެ މިހާ ހިސާބަށް، އެ ކުންފުނިތަކަށް ޢުމްރާ ދަތުރުތައް ރާވާ ހިންގުމަށް އެކަށީގެންވާ ފުރުޞަތެއް ލިބިފައި ނުވާތީ، ދިވެހިރާއްޖެއިން އުމްރާއަށް މީހުން ގެންދިއުމާބެހޭ އުޞޫލުގެ ދަށުން މިނިސްޓްރީއަށް ލިބިދީފައިވާ އިޚްތިޔާރުގެ ދަށުން، ޢުމްރާއަށް މީހުން ގެންދިއުމަށް މިހާރު ހުއްދަ ދެވިފައިވާ ހުރިހާ ކުންފުނިތަކުގެ ހުއްދައިގެ މުއްދަތު އެ އަހަރުދުވަހަށް އިތުރު ކޮށްދީފައިވާ ކަމަށެވެ.
ރާއްޖެއިން ޢުމްރާއަށް މީހުންގެންދިއުމަށް 37 ކުންފުންޏަކަށް ހުއްދަ ދީފައިވެއެވެ.
ސައުދީ ސަރުކާރުން ވަނީ އޮގަސްޓްމަހުގެ 10 ވަނަދުވަހުން ފެށިގެން އުމްރާގެ އަޅުކަމަށް ސައުދީއަށް އެތެރެވުމުގެ ފުރުސަތު އެޤައުމުން ހުޅުވާލާފައެވެ. ސައުދީ ސަރުކާރުން ބުނީ މުހައްރަމު މަހުގެ 1 ވަނަ ދުވަހުން ފެށިގެން 9 ޤައުމަކުން ފިޔަވާ ހުރިހާ ޤައުމަކުން އުމްރާއަށް މީހުން ގޮވައިގެން ސީދާ ދަތުރުތައް އެޤައުމަށް ކުރެވޭނެކަމަށެވެ.
އުމްރާއަށް އަންނަ މީހުން މައްކާގެ ޙަރަމްފުޅާއި މަދީނާގެ ނަބަވީ މިސްކިތަށް ވަނުމަށް ރިޒަވޭޝަން ހައްދަންޖެހޭއިރު، ސައުދީން ފުރާނެ ތާރީހުވެސް ކަނޑައެޅިފައި އޮންނަން ޖެހޭނެކަމަށް ސައުދީ ސަރުކާރުން ބުނެއެވެ.
އުމްރާކުރުމަށް ސައުދީއަށް ދެވޭނީ އެޤައުމުގެ ސަރުކާރުން ކަނޑައަޅާ ވަކި ޤައުމުތަކަށެވެ. އަދި ހުއްދަދޭ ޤައުމުތަކުން އުމްރާއަށް އަންނަ ކޮންމެ ގްރޫޕެއްގައި ގެންދެވޭނީ ގިނަވަގެން 50 މީހުންކަމަށްވެސް ސައުދީ ސަރުކާރުން ބުނެއެވެ. އަދި ޤްރޫޕަކާއި ނުގުޅި އުމްރާއަށް ނުދެވޭނެކަމަށްވެސް ސައުދީން ބުނެއެވެ.
ސައުދީ ސަރުކާރުން ބުނީ އުމްރާއަށް އަންނަ މީހުންނަށް ހާއްސަކޮށްގެން ތްރީ ސްޓަރއާއި ފައިވް ސްޓަރގެ 1800 ހޮޓާ ހަމަޖައްސާފައިވާކަމަށާއި މި ތަންތަނުގައި ޖުމްލަ ދެ ލައްކަ ފަންސާސް ހާސް މީހުންނަށް ހިދުމަތްދެވޭނެކަމަށެވެ. އަދި މި ތަންތަނުގައި ރައްކާތެރިވުމަށް ވަކި އުސޫލްތަކެއް ހިފެހެއްޓުމަށް އަންގާފައިވާކަމަށްވެސް ސައުދީ ސަރުކާރުން ބުނެއެވެ.
ދުނިޔޭގެ އެކި ކަންކޮޅުތަކުން އުމްރާއަށް އަންނަ ރައްޔިތުންނަށް ޙަރަމްފުޅު އާއްމުކޮށް ހުޅުވާލާއިރު އުމްރާގެ އަޅުކަން އަދާކުރުމަށް މި ފިޔަވަހީގައި ހުއްދަ ދިނުމަށް ހަމަޖެހިފައިވަނީ 20 ހާސް މީހުންނަށެވެ. އަދި ދުވާލަކު ޙަރަމްފުޅަށް ވަދެވޭނީ 60 ހާސް މީހުންނަށެވެ.
