ހައްލަކީ ބަރުލަމާނީ ނިޒާމްކަމަށް ވިދާޅުވެ އެމްޑީޕީގެ ޕާލިމަންޓްރީ ގްރޫޕްގެ ލީޑަރު ޢަލީ އާޒިމް އެނިޒާމަށް ތާޢީދުކުރައްވާކަން ހާމަކުރައްވައިފިއެވެ.
ބަރުލަމާނީ ނިޒާމަށް ޢާޒިމް ތާޢީދުކުރައްވާކަން ހާމަކުރައްވާފައިމިވަނީ، ބަރުލަމާނީ ނިޒާމް ގެންނަން، ގާނޫނު އަސާސީ އިސްލާހު ކުރުމުގެ ކަންކަން އަވަސްކުރުމަށް ގޮވާލައި ރައީސުލްޖުމްހޫރިއްޔާއަށް ހުށައަޅާ ޕެޓިޝަނެއްގައި ސޮއިކުރުމުގެ މަސައްކަތް ކުރަމުން އަންނަ ދަނޑިވަޅެއްގައެވެ. ސަރުކާރުގެ ބައެއް ވަޒީރުންނަށް ފާޑުވިދާޅުވެ އެމްޑީޕީގެ ރައީސް މުޙައްމަދު ނަޝީދަށް ވަފާތެރި މެންބަރެއްގެ ގޮތުގައި ފާހަގަކުރެވިފައި ހުންނެވުމަށްފަހު ރައީސް ޞާލިހަށް ތާޢީދުކުރައްވާ މެންބަރެއްގެ ގޮތުގައިވެސް ފަހުން ފެނިގެން ދިޔައެވެ.
ޢާޒިމް ކުރެއް ވި ޓްވީޓެއްގައި ވިދާޅުވީ، މަނަވަރު ފެތޭިއރުވެސް ބެރުޖަހަޖަހާތިބި މީހުން ތިބީ ބެރު ޖަހަޖަހާކަމަށެވެ.
ކެޕްޓަން ބަހަނާ ނުދައްކާ ހުންނަނީ ބާ؟ ހައްލަކީ ބަރުލަމާނީ
– ޢަލީ އާޒިމް
Manavaru fetheyiruves berujahajaha thibi meehun thibee beru jahajaha. Captain bahanaa nudhahkaa hunnaane baa? Hahlakee #Barulamaanee
— ??? ???? (@aliaazim) August 30, 2021
މިހާތަނަށް އާއިރު ރައްޔިތުންގެ މަޖިލީހުގެ ބައެއް މެންބަރުން ވަނީ ބަރުލަމާނީ ޕެޓިޝަންގައި ސޮއިކުރައްވާފައެވެ. އޭގެތެރޭގައި މަޖިލީހުގެ ނާއިބު ރައީސް އީވާ ޢަބްދުﷲ އާއި، ރައީސް ނަޝީދަށް ވަފާތެރި މެންބަރުން ހިމެނިވަޑައިގަންނަވައެވެ.
ބަރުލަމާނީ ޕެޓިޝަންގައި ގިނަ އަދަދެއްގެ ބަޔަކު ސޮއި ކުރަމުންދާއިރު، ސަރުކާރުން ބުނެފައިވަނީ ބަރުލަމާނީ ޕެޓިޝަނަކުން ނިޒާމު ބަދަލު ނުކުރެވޭނެކަމަށެވެ. އަދި މިހާރު ވެރިކަން ކުރަމުންދަނީ ކޯލިޝަން މެނިފެސްޓޯއަކަށް ކަމަށްވުމުން، އެމެނިފެސްޓޯގައި ބަރުލަމާނީ ނިޒާމުގެ ވާހައެއް ނެތްކަމަށެވެ. ބަރުލަމާނީ ނިޒާމުގެ މައްސަލާގައި ވެރިކަން ކުރާ މައި ޕާޓީ އެމްޑީޕީގެ މަޖިލިސް މެމްބަރުންގެ ތެރޭގައި ވަނީ ބޮޑެތި ޚިޔާލު ތަފާތުވުން އުފެދިފައެވެ.
ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.
ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.
