ކުރީގެ ރައީސުލްޖުމްހޫރިއްޔާ އަދި އިދިކޮޅު އިއްތިހާދުގެ ލީޑަރު ރައީސް ޢަބްދުﷲ ޔާމީން ޢަބްދުލްޤައްޔޫމުގެ ޝަރީއަތް ވަކި ގޮތަކަށް ކުރިއަށް ގެންދިއުމަށް އެއްވެސް ފަނޑިޔާރަކަށް ނުފޫޒު ފޯރުވާފައި ނުވާކަމަށް ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލްއުސްތާޛު ޢަލީ ޒާހިރު ވިދާޅުވެއްޖެއެވެ.
ލޯކުވެފައިވާ އޯޑިޔޯ ރިކޯޑިންއެއްގައި އެ މައްސަލާގައި ހުކުމްކުރި ބެންޗުގައި ހިމެނިވަޑައިގެންނެވި ޤާޟީ އަލީ އާދަމްވަނީ އޭނާއާ އަލީ ޒާހިރު ބައްދަލުކުރައްވައި އެ މައްސަލާގައި އަމަލުކުރަންވީ ގޮތް ވިދާޅުވެދެއްވާފައިވާ ކަމަށެވެ. މި އޯޑީޔޯގައި އިވެނީ ސަމީރާ ބައްދަލުކޮށް އާންމު މީހަކު ދެއްކެވި ވާހަކައެވެ. ރައީސް ޔާމީނުގެ މައްސަލާގައި ބެންޗު އެކުލަވައިލުމުގެ މަރުހަލާގައި އެއްވެސް މީހަކާ ބައްދަލުކުރެއްވިތޯ އެ މީހާ އަލީ އާދަމާ ސުވާލުކުރެއެވެ.
އެ ސުވާލަށް ޖަވާބުދެއްވަމުން އަލީ ވިދާޅުވީ އޭނާ އަރިހުން މީހަކާ ބައްދަލުކުރުމަށް އަލީ ރަޝީދު އެދިވަޑައިގެންނެވި ކަމަށެވެ. "ބޭފުޅަކާ ބައްދަލުކުރަން އަޅުގަނޑު ގާތުގައި އަލީ ރަޝީދު ދެންނެވި،" ސަމީރު ވިދާޅުވެއެވެ. އެހިސާބުން ސަމީރުގެ އެކުވެރިޔާ އޭނާއާ ސުވާލުކުރެއްވީ އަލީ އާދަމް ބައްދަލުކުރެއްވި ބޭފުޅާއާ ގުޅޭ ގޮތުންނެވެ. އަލީ އާދަމް ޖަވާބުގައި ވިދާޅުވެފައިވަނީ އޭނާ ބައްދަލުކުރެއްވި ބޭފުޅެއް އެނގިވަޑައިނުގަންނަވާ ކަމަށެވެ.
އަދި އެ މައްސަލާގައި އަލީ އާދަމާ ބައްދަލުކުރެއްވި ބޭފުޅާ އޭނާ އަރިހަށް ވަޑައިގެންނެވީތޯ ނުވަތަ އޭނާ އެ ބޭފުޅެއްގެ ގާތަށް ވަޑައިގަތީތޯ ސުވާލުކުރުމުން އަލީ އާދަމް ވިދާޅުވީ ބައްދަލުކުރަން ދިއުމަށް ޤާޟީ އަލީ ރަޝީދު އެންގެވި ކަމަށެވެ. އަދި އެ ބޭފުޅާ ބައްދަލުކުރުމުން ވިދާޅުވީ އަލީ ރަޝީދާ ޤާޟީއާއެކު އަލީ އާދަމް ބެންޗުގައި އިންނަވަން އެދިވަޑައިގެންނެވި ކަމަށެވެ. ރައީސް ޔާމީނުގެ ޝަރީޢަތުގެ ހުރިހާ ކަމެއް ކުރިއަށްގެންދަވާނީ ސީދާ އަލީ ރަޝީދު ކަމަށް އެ ބޭފުޅަކު އޭނާ އަރިހުގައި ވިދާޅުވި ކަމަށެވެ.
ސަރުކާރުން، ޚާއްޞަކޮށް ރައީސުލްޖުމްހޫރިއްޔާއާއި ޗީފް އޮފް ސްޓާފް، ފަނޑިޔާރުންނަށް އަދި ވަކިން ޚާއްޞަކޮށް ރައީސް ޔާމީނުގެ ޝަރީޢަތަށް ނުފޫޒުފޯރުވާކަމަށް ކުރެއްވި ތުހުމަތުތައް ޗީފް އޮފް ސްޓާފް ދޮގުކުރެއްވިއެވެ. މީގެ އިތުރުން ޗީފް އޮފް ސްޓާފްގެ އޯޑިޔޯ ހުރިކަމަށް ޝިޔާމް ވިދާޅުވި ވިދާޅުވުމަށް ރައްދުދެއްވައި ޢަލީ ޒާހިރު ވަނީ ޝަރީއަތް ވަކިގޮތަކަށް ގެންދިއުމަށް ނުވަތަ ފަނޑިޔާރަކަށް ނުފޫޒުފޯރުވުމަށް ނަމަވެސް އެއްވެސް މުވާމަލާތެއް ހިންގަވާފައި ނުވާނެކަމުގެ ޔަޤީންކަން ދެއްވައި އެ ވިދާޅުވި ފަދަ އޯޑިޔޯއެއް އޮތްނަމަ މީޑިޔާއަށް ހާމަކޮށްދެއްވުމަށް ވެސް އެދިވަޑައިގަންނަވާފައެވެ.
ޝަރުޢީ ނިޒާމަށް ސަރުކާރުން ނުފޫޒުފޯރުވާކަމަށް ކުރެއްވި ތުހުމަތުތަކަށް ރައްދުދެއްވައި ޢަލީ ޒާހިރު ވިދާޅުވީ މީގެ ކުރީގެ ސަރުކާރުގައި ރައީސުލްޖުމްހޫރިއްޔާގެ އޮފީހުން ބައެއް ޙުކުމްތައް ލިޔާކަމުގެ އަޑުތައް ފެތުރިގެން ގޮސްފައި ވާކަމަށާއި ނަމަވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރަކީ މިނިވަން މުވައްޞަސާތަކާއި ޖުޑިޝަރީ މިނިވަންކަމާއެކު ކުރިޔަށްގެންދިއުމަށް ފުރުޞަތުދީފައި އޮންނަ ސަރުކާރެއް ކަމަށެވެ.
