ރައްޔިތުންގެ މަޖިލީހުގައި ހިމެނޭ އިދިކޮޅު ޕްރޮގްރެސިވް ކޯލިޝަންގައި ހިމެނޭ މެމްބަރުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުއާއި ބައްދަލު ކުރުމަށް ރައީސް އޮފީހަށް ވަޑައިގެންފިއެވެ.
މީގެ އިރުކޮޅެއް ކުރިން އިދިކޮޅު މެމްބަރުން ވަނީ ރައީސް އޮފީހަށް ވަދެފައެވެ. ނަަމަވެސް އެއްވެސް ބޭފުޅަކާއި ބައްދަލުވިކަމެއް ސާފެއް ނުވެއެވެ. އިދިކޮޅު ކޯލިޝަނުން ބުނެފައިވަނީ މެމްބަރުން ރައީސް އޮފީހަށް ވަޑައިގެންފައިވަނީ ރައީސް ޔާމީނަށް އިއްވި ހުކުމުގައި ރައީސް އޮފީހުގެ ނުފޫޒު އޮތުމުން އެކަމާއި ދެކޮޅު ހެދުމުގެ ގޮތުން ކުރަމުންދާ އިހުތިޖާޖެއް ކަމަށެވެ.
މަޖިލީހުގެ މެމްބަރުން ވަނީ މިއަދު މަޖިލީހުގައިވެސް އިހުތިޖާޖުކޮށް، ރައީސް ޔަމީނަށް ކޮށްފައިވާ ހުކުމުގައި މައްސަލަ ބެއްލެވި 3 ފަނޑިޔާރެއްގެ އޯޑިއޯ ލީކްވުމާއި ގުޅިގެން މައްސަލަ މަޖިލީހުން ބެލުމަށް ގޮވާލައި އިހުތިޖާޖުކޮށްފައެވެ.
މިއަދުގެ ޖަލްސާއަށް އޯޑިއޯގެ މައްސަލާގައި ނައިފަރު ދައިރާގެ މެމްބަރު އަހުމަދު ޝިޔާމް ވަނީ މަޖިލީހަށް ކުއްލި މައްސަލައެއް ހުށަހަޅާފައެވެ. ނަމަވެސް އިތުރު ކުއްލި މައްސަލައެއް މަޖިލީހަށް ހުށަހަޅާފައިވުމުން ގުރުއަތު ނަގައިގެން ބަހުސް ކުރުމަށް ދިމާވީ، މަކުނުދޫ ދާއިރާގެ މެމްބަރު މުހައްމަދު ރައީ ހުށަހެޅި މައްސަލައެވެ.
ކުއްލި މައްސަލައަށް ޖާގަ ނުލިބުމުން، މަޖިލީހުގެ ތަޅުމުގައި އަޑުގަދަކޮށް، އިދިކޮޅު މެމްބަރުން ދަނީ އިހުތިޖާޖު ކުރަމުންނެވެ. އިދިކޮޅު މެމްބަރުންވަނީ މިއަދު މަޖިލީހުގައި މިހުކުގެ މައްސަލަ ބެލުމަށްވުރެ ވަކި އެހެން މުހިންމު މަސައްކަތެއް ނެތްކަމަށެވެ. މިމައްސަލާގައި މަޖިލީހުގައި ހިމެނޭ އިދިކޮޅު މެމްބަރުންނާއި، ސަރުކާރަށް ތާއީދު ކުރާ އެމްޑީޕީގެ މެމްބަރުންގެ މެދުގައި ބަހުގެ ހޫނު ހަމަލާތަކެއް ދަނީ ބަދަލު ކުރަމުންނެވެ.
މަޖިލިސް ރައީސްގައި އިންނެވި، ހަސަން އަފީފް ވިދާޅުވަމުން ދަނީ މިމައްސަލައަކީ މަޖިލީހަށް ބެލޭނެ ކަމެއް ނޫންކަމަށެވެ. މިމައްސަލަ ބަލާނަމަ ހުށަހަޅަން ޖެހޭނީ ކޯޓިތަކަށް ކަމަށް އަފީފް ވަނީ ވިދާޅުވެފައެވެ.
