ފްރާންސް ލީގުގައި މިރޭ ޕީއެސްޖީ ކުޅޭ މެޗަކީ އެ ޓީމަށް ތާރީހީ މެޗަކަށް ވެގެންދާނެކަމަށް ގިނަ ބަޔަކު ދެކެއެވެ.
ފްރެންޗް ލީގުގައި މިރޭ ރެއިމްސް އާއި ދެކޮޅަށް ކުޅޭ ޕްރިސް ސެއިންޓް ޖާމަން (ޕީއެސްޖީ) ކުޅޭ މެޗުގެ ސްކޮޑުގައި ލިއޮނަލް މެސީ އާއި ނޭމާ އަދި އެމްބާޕޭ ވަނީ ހިމަނާފައެވެ. މިއީ މިވަގުތު ދުނިޔޭގެ އެންމެ މޮޅު ފޯވާޑްލައިންގެ ގޮތުގައި ގިނަ ބަޔަކު ދެކޭ ސިފަ ކުރާ ފޯވާޑް ލައިނެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޕީއެސްޖީގެ ކޯޗު ޕޮޗެޓީނޯ ބުނީ މި މެޗުން މެސީ ފެނުމުގެ ފުރުސަތު އެބައޮތް ކަމަށާއި އެއީ އެންމެ ފަހު ވަގުތު ޓީމުން ނިންމާނެ ނިންމުމެއް ކަމަށެވެ. އަދި މުޅި ޓީމުވެސް އޮތީ ފިޓުކޮށްކަމަށް ކޯޗު ބުނެފައިވެއެވެ. ކޯޗުގެ ވާހަތަކުން މިރޭގެ މެޗުގެ ކޮންމެވެސް ހިސާބަކުން މެސީ ކުޅެން އެރުމުގެ ފުރުސަތު ބޮޑެވެ.
ރާއްޖެ ގަޑިން މިރޭ 23:45 ގައި ފަށާ މިމެޗަކީ ދުނިޔޭގެ އެކި ކަންކޮޅުތަކުން އެތައް ބަޔަކު ބަލާނެ މެޗެއްގެ ގޮތުގައި މީޑިއާ ރިޕޯޓްތައް ދަނީ ބުނަމުންނެވެ.
މިރޭގެ މެޗު ސްކޮޑް ޕީއެސްޖީން އާންމު ކޮށްފައި ވާއިރު، މެސީގެ އިތުރުން މި ސީޒނަށް ޓީމާއި އަލަށް ގުޅުނު އިޓަލީގެ ކީޕަރު ޑޮނަރޫމާ ވެސް ވަނީ ސްކޮޑުގައި ހިމަނާފަ އެވެ. މީގެ އިތުރުން ޓީމުން ވަކިވެ ސްޕެއިންގެ ރެއާލް މެޑްރިޑަށް ގުޅެން މަސައްކަތް ކުރަމުން އަންނަ ޕީއެސްޖީގެ ޒުވާން ތަރި ކީލިއަން އެމްބާޕޭ ވެސް ވަނީ މިރޭގެ މެޗަށް ޓީމްގެ ސްކޮޑުގައި ހިމަނާފައެވެ.
