ބަރުލަމާނީ ނިޒާމް ގެންނަން، ގާނޫނު އަސާސީ އިސްލާހު ކުރުމުގެ ކަންކަން އަވަސްކުރުމަށް ގޮވާލައި ރައީސުލްޖުމްހޫރިއްޔާއަށް ހުށައަޅާ ޕެޓިޝަނެއްގައި ސޮއިކުރުމުގެ މަސައްކަތް ކުރަމުންދަނީ ސަރުކާރާއި ދެކޮޅު ވެގެން ނޫންކަމަށް ރައްޔިތުންގެ މަޖިލީހުގެ މަޑަވެލީ ދާއިރާގެ މެންބަރު ހުސައިން ފިރުޝާން ވިދާޅުވެއްޖެ އެވެ.
ބަރުލަމާނީ ނިޒާމަށް ރައީސް ޞާލިހުގެ ބޮޑުބޭބެ، މޫސާ ޞާލިހު ސޮއި ކުރައްވާ ފޮޓޯއާއިއެކު ކުރެއްވި ޓްވީޓުގައި ފިރުޝާން ވިދާޅުވީ ބަރުލަމާނީ ޕެޓިޝަނަކީ ސަރުކާރާއި ދެކޮޅަށް ކުރެވޭ ކަމެއް ނޫންކަމަށް ތަކުރާރުކޮށް ދަންނަވާ ކަމަށެވެ. ބަރުލަމާނީ ޕެޓިޝަނާއި ގުޅޭގޮތުން މަޖިލީހުގައި ހިމެނޭ މެމްބަރުންގެ ތެރެއިން ރައީސް ނަޝީދަށް ތާއީދު ނުކުރާ މެމްބަރުން ދަނީ މިޕެޓިޝަނާއި ގުޅޭގޮތުން އެކި ޚިޔާލު ފާޅު ކުރަމުންނެވެ.
މެންބަރު ފިރުޝާންއަކީ ބަރުލަމާނީ ޕެޓިޝަނަށް ސޮއި ހޯދުމަށް އިސްކޮށް މަސައްކަތް ކުރަމުން ގެންދަވާ މެންބަރެކެވެ. އަދި ރައީސް ނަޝީދަށް ވަފާތެރި މެންބަރުންގެ ގޮތުގައި ވަރަށް ބޮޑަށް ފާހަގަކުރެވިފައިވެއެވެ.
ރައީސް ސޯލިޙް ބޮޑުބޭބޭ މޫސާ ސާލިޙް ވެސް #ބަރުލަމާނީ ޕެޓިޝަންގައި ސޮއިކޮށްފި. ބަރުލަމާނީ ޕެޓިޝަންގައި ސޮއި ކުރުމަކީ ސަރުކާރާއި ދެކޮޅު ކަމެއް ނޫން ކަން ތަކުރާރުކޮށް ދަންނަވަން. #Barulamaanee#HeyoverikamugeNizam pic.twitter.com/P1byDa0wKc
— Hussain Firushan ?? (@husnfirey) August 27, 2021
ބަރުލަމާނީ ޕެޓިޝަންގައި ގިނަ އަދަދެއްގެ ބަޔަކު ސޮއި ކުރަމުންދާއިރު، ސަރުކާރުން ބުނެފައިވަނީ ބަރުލަމާނީ ޕެޓިޝަނަކުން ނިޒާމު ބަދަލު ނުކުރެވޭނެކަމަށެވެ. އަދި މިހާރު ވެރިކަން ކުރަމުންދަނީ ކޯލިޝަން މެނިފެސްޓޯއަކަށް ކަމަށްވުމުން، އެމެނިފެސްޓޯގައި ބަރުލަމާނީ ނިޒާމުގެ ވާހައެއް ނެތްކަމަށެވެ. ބަރުލަމާނީ ނިޒާމުގެ މައްސަލާގައި ވެރިކަން ކުރާ މައި ޕާޓީ އެމްޑީޕީގެ މަޖިލިސް މެމްބަރުންގެ ތެރޭގައި ވަނީ ބޮޑެތި ޚިޔާލު ތަފާތުވުން އުފެދިފައެވެ.
ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.
ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.
