ސްރީލަންކާގައި އިއުލާނުކޮށްފައިވާ ލޮކްޑައުންގެ މުއްދަތު ސެޕްޓެމްބަރު 6 އަށް އިތުރުކޮށްފިއެވެ.
ސްރީލަންކާ ފުރަބަންދު ކުރުމަށް ނިންމާފައިވަނީ އެގައުމުގައި ކޯވިޑްގެ ޑެލްޓާ ވޭރިއެންޓް ފެތުރި ތިން ވަނަ ރާޅެއް އަރާފައިވާ ދަނޑިވަޅެއްގައެވެ. ސްރީލަންކާގައި ކޯވިޑް-19ގެ ހާލަތު ގޯސްވުމުން އެގައުމު ލޮކްޑައުންކޮށްފައިވަނީ އޮގަސްޓު މަހުގެ 20 ވަނަ ދުވަހުއެވެ. އެގައުމުގައި ލޮކްޑައުން އިއުލާނުކުރީ އެ ދުވަހުން ފެށިގެން 10 ދުވަހުގެ މުއްދަތަށެވެ.
ލަންކާގައި ކޮވިޑް ފެތުރުން ކޮންޓްރޯލްކުރުމަށް ފިޔަވަޅުތަކެއް އަޅާފައިވާއިރު، އެ ގައުމުން ފެންނަ ކޮވިޑްގެ ކޭސްތައް އަދިވެސް ދަނީ އިތުރުވަމުންނެވެ. ދުވާލެއްގެ މައްޗަށް ކޮންމެ ދުވަހަކުވެސް 4،000 އާއި 5،000 ދެމެދުގެ އަދަދަކަށް މީހުން ބައްޔަށް ޕޮޒިޓިވްވަމުންދެއެވެ. އަދި މިހާތަނަށް އެ ގައުމުން 412،370 އަށްވުރެ ގިނަ މީހުން ވަނީ ކޮވިޑަށް ޕޮޒިޓިވްވެފައެވެ. ޖުމްލަ 8،157 މީހަކު ވަނީ ބަލީގައި ނިޔާވެފައެވެ. އަދި 351،069 މީހަކު ބަލިން ފަސޭހަވެފައިވާކަމަށް ރިޕޯޓުކޮށްފައިވެއެވެ.
ލޮކްޑައުން އިއުލާނުކުރިތާ ހަފްތާއެއް ފަހުން ލަންކާގެ ހެލްތް މިނިސްޓަރު ކެހެލިޔާ ރަމްބުކްވެލާ ވަނީ ލަންކާގެ ލޮކްޑައުންގެ މުއްދަތު ސެޕްޓެމްބަރު 6 ވަނަ ދުވަހުގެ ފަތިހު 04:00 އަށް އިތުރުކުރަން ނިންމާފައިވާ ކަމަށް ވިދާޅުވެފައެވެ. މިއާއެކު އެ ގައުމުގައި ކޮވިޑާއި ގުޅިގެން އަޅާފައިވާ ހަރުކަށި ފިޔަވަޅުތައް އިތުރު ދުވަސްތަތަކަށް އިތުރު ކުރަން ސަރުކާރުން ވަނީ ނިންމާފައެެވެ.
