ބަރުލަމާނީ ނިޒާމު ގެނައުމަށް ތައްޔާރުކުރާ ޕެޓިޝަންގައި ސޮއިކުރުމަށް އެމްޑީޕީގެ ވަސީލަތް ބޭނުންކުރާ ކަމުގެ ތުހުމަތު އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ކުރެއްވުމުން އޭނާއަށް އެމްޑީޕީގެ މަޖިލިސް މެމްބަރު އުނގޫފާރު ދާއިރާގެ މެމްބަރު މުހައްމަދު ވަހީދު ރައްދު ދެއްވައިފިއެވެ.
ރާއްޖޭގެ ވެރިކަމުގެ ނިޒާމް ބަރުލަމާނީއަށް ބަދަލުކުރުމަށް ގޮވާލާ ސޮއިކުރަމުންދާ ޕެޓިޝަނަކީ އެމްޑީޕީން ކުރިއަށްގެންދާ ހަރަކާތެއްކަމަށް ގިނަބަޔަކަށް ހީވެފައިވަނީ އެޕާޓިގެ ރަސްމީ ޓްވިޓަރ އެކައުންޓުން ޕެޓިޝަންގައި ސޮއިކުރުމަށް އަންގާތިކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެ ދެއްކެވި ވާހަތަކާއި ގުޅިގެން ވައްޑެ ވިދާޅުވީ ރޮޒޭނާމެން ޑީއާރުޕީގައި އުޅުއްވިއިރު ޑީއާރުޕީގެ ހަރުގެ ހިންގި ގޮތާއި އެމްޑީޕީގެ ހަރުގެ ހިންގި ގޮތާއި ވަރަށް ތަފާތު ވާނެކަމަށެވެ.
އެމްޑީޕީ ހަރުގެ ހިންގާ ގޮތާ، ޑީއާރުޕީ ހަރުގެ ސިނަމާލެ 2 އެޕާޓްމެންޓް އެއްކޮށްގެން ރޮޒޭމެން ހިންގެވި ގޮތާ ވަރަށް ތަފާތުވާނެ. އެމްޑީޕީ ހަރުގެއަކީ އާއްމު މެމްބަރުންގެ ހަރަކާތްތަކަށް ހަދާފައި ހުންނަ ތަނެއް.
– ވައްޑެ ވިދާޅުވިއެވެ.
ރޮޒައިނާ ވިދާޅުވީ، ބަރުލަމާނީ ޕެޓިޝަންގައި ސޮއިކުރުމަކީ އެޕާޓިގެ ހަރަކާތެއްކަމަށް ބައެއް މީހުންނަށް އޮޅޭ ގޮތްވަނީ ބައެއްގެ އަމިއްލަ ކަމެއްގަ ބައިވެރިވާން އެމްޑީޕީގެ ރަސްމީ ޓްވިޓަރ އެކައުންޓުން އަންގާތީކަމަށް ވެދާނެކަމަށެވެ.
ބައެއް މީހުންނަށް އޮޅޭ ގޮތްވަނީ ބަޔަކު ތާކުކުރާ އަމިއްލަ ކަމެއްގަ ބައިވެރިވާން އެމްޑީޕީގެ ރަސްމީ ޓްވިޓަރ އެކައުންޓުން އަންގާތީކަމަށްވެސް ވެދާނެ.
– ރޮޒައިނާ އާދަމް
އެމްޑީޕީގެ ޗެއަރޕާސަން ޙަސަން ލަޠީފް ވިދާޅުވީ، ބަރުލަމާނީ ނިޒާމަށް ތާއީދު ހޯދުމަށް ކުރިއަށްގެންދާ ޕެޓިޝަނުގައި ސޮއިކުރުމުގެ ކަންކަން އެމްޑީޕީގެ އޮފީހުގައި ނުކުރާކަމަށެވެ. މެންބަރުން އެދޭ އެފަދަ ހަަރަކާތްތަކަށް ޕާޓީގެ ހަރުގެ އާއި ޖަގަހަތައް ބޭނުންކުރާ އުސޫލެއް އެމްޑީޕީގައި އޮންނަކަމަށް ޙަސަން ވިދާޅުވިއެވެ.
ހަސަން ވިދާޅުވީ ޕެޓިޝަންގައި ސޮއިކުރުމުގެ މަސައްކަތް ކުރިއަށްދަނީ ޕާޓީގެ މެމްބަރުންގެ ތެރެއިން ގިނަ ބައެއްހެ އެހީތެރިކަމާއިއެކުގައި ކަމަށެވެ. މި ޕެޓިޝަނަކީ އާންމު ޖަމްއިއްޔާއަކުން އިސްނަގައިގެން ހަދާ ޕެޓިޝަނެއްކަމަށް ހަސަން ވިދާޅުވިއެވެ. އަދި ޕެޓިޝަންގެ އެއްވެސް މަސައްކަތެއް ޕާޓީގެ އޮފީހުގައި ކުރިއަށް ނުދާނެކަމަށް އޭނާ ވިދާޅުވިއެވެ.
