ކުޅިވަރު އެކުވެނީގައި އަޅަމުންދާ ސިންތެޓިކްގެ ޓްރެކްގެ މަސައްކަތް ކުރިއަށްދާގޮތް ނައިބް ރައީސް ފައިސަލް ނަސީމް ބައްލަވައި ލައްވައިފި އެވެ.
ނައިބް ރައީސް ފައިސަލް ނަސީމް މިއަދު މެންދުރުފަހު ޓްރެކްސަރަހައްދަށް ވަޑައިގެން މަސައްކަތް ބައްލަވާލައްވައި މަސައްކަތް ވީހާވެސް އަހަވަށް ނިންމުމަށް ވަނީ އިރުޝާދު ދެއްވާފައެވެ. އަދި މިމަސައްކަތުގައި ޔޫތު މިނިސްޓްރީން ކުރަމުންދާ މަސައްކަތަށް ނައިބް ރައީސް ވަނީ ޝުކުރު އަދާކުރައްވާފައެވެ.
Vice President HE @FaisalNasym and Minister @AhmedMahloof visited Ekuveni Running Track and observed the work that is currently being undertaken for the installation of a synthetic track. pic.twitter.com/pfB6IeJgX1
— Ministry of Youth,Sports and Community Empowerment (@MoYSCEmv) October 4, 2020
މާލޭގައި ގިނަބަޔަކު ކަސްރަތު ކުރުމަށް ބޭނުންކުރާ ކުޅިވަރު އެކުވެނީގެ ދުވާ ޓްރެކް، 24 އަހަރަށްފަހު އަލުން މަރާމާތު ކުރުމުގެ މަސައްކަތް ފަށާފައިވަނީ ޖޫން މަހުގެ 22 ވަނަ ދުވަހެވެ. އެ ތަނުގެ ބިން އެއްވަރުކުރުމުގެ މަސައްކަތް ކޮށްފައިވަނީ ސީއެސްއާރް މަޝްރޫއުގެ ދަށުން އާރުކޭއެލް ކުންފުނިންނެވެ.
މީގެ ކުރިން ކުޅިވަރާބެހޭ ވަޒީރު ވަނީ އެކުވެނި ޓްރެކް ސިންތެޓިކް ޓްރެކަކަށް ބަދަލުކުރުމުގެ މަސައްކަތް ބާރު ސްޕީޑުގައި ކުރިޔަށްދާ ކަމަށާއި ލަފާ ކުރެވޭ ގޮތުން އެ މަސައްކަތް ނޮވެމްބަރު މަހުގެ 11 ވަނަ ދުވަހަށް ނިންމާލެވޭނެ ކަމަށް ވިދާޅުވެފައެވެ.
މިހާރު އޮތް ޓްރެކުގެ ބަދަލުގައި ޒަމާނީ ފެންވަރުގެ ޓްރެކެއް އެޅުމުގެ މަސައްކަތް ފަށާފައިވާ އިރު ކުރިން ޕްލޭން ކޮށްފައި އޮތީ އެ ޓްރެކުގައި އޮތް ވެލިގަނޑު ނަގައި އެއްވަރު ކުރުމަށް ފަހު އަލުން ދުވާ ޓްރެކެއް އެތަނުގައި އެޅުމަށެވެ. އެކަމަކު މިހާރު އެތަން ބަދަލުވެގެން ދާނީ ގިނަ ކުޅިވަރުތަކެއް ކުޅެވޭ ފަދަ ސިންޓެޓިކް ޓްރެކަކަށް ކަމަށް މިނިސްޓަރު މަހްލޫފް ވަނީ ވިދާޅުވެފައެވެ.
ޓްރެކުގައި އަޑިވަޅުގަނޑުހެދުމުގެ ސަބަބުން ދުވާމީހުންނާއި ކަސްރަތުކުރާ މީހުންގެ ކަންބޮޑުވުންތަށް ގިނަވެފައިވަނިކޮށް އެތަން މަރާމާތުކުރަން ޔޫތް މިިނިސްޓްރީއިން މަސައްކަތްފެށީ މިދިޔަ ޖޫން މަހުގެ 22 ވަނަ ދުވަހުއެވެ. މިހާރު އެ ތަނުގެ ބިންގަނޑު އެއްވަރު ކުރުމުގެ މަސައްކަތް ކުރިއަށްދާއިރު، ޒަމާނީ ފެންވަރަށް ޓްރެކް ސަރަހައްދު ތަރައްގީ ކުރަނީ ސީއެސްއާރު މަޝްރޫއުގެ ދަށުން އާރުކޭއެލް ކުންފުނިންނެވެ.
މާލެ ކުޅިވަރު އެކުވެނި ދުވާ ޓްރެކްގައި ސިންތެޓިކް ޓްރެކެއް އެޅުމަށް ނިންމާފައިވާއިރު، ރާއްޖޭގައި މިހާތަނަށް ބައިނަލްއަގުވާމީ ފެންވަރަށް އަޅާފައިވާ ސިންތެޓިކް ދުވާ ޓްރެކެއް އޮންނަނީ ހުޅުމާލޭގައި އެކަންޏެވެ. އެހެންކަމުން މާލޭ ސަރަހައްދުގައި އިތުރު ސިންތެޓިކް ޓްރެކެއް ޤާއިމްކުރުން ވެގެންދާނީ އެތްލީޓުން ފަރިތަކުރުންތައް ކުރިޔަށްގެންދިޔުމަށް ލިބިގެންދާނެ އިތުރު ލުޔަކަށެވެ.
