ބާރުތައް ދޫކޮށްލައި ހެޔޮ ވެރިކަމުގެ ނިޒާމަކާއި ދިމާލަށް ވެރިކަން ކުރަން ކެރުނު ހަމައެކަނި ވެރިޔަކީ ރައީސް ޞާލިހު ކަމުގައި ހޯރަފުށި ދާއިރާގެ މެންބަރު އަހްމަދު ސަލީމް (ސައްލެ) ވިދާޅުވެއްޖެއެވެ.

ރައްޔިތުންގެ މަޖިލީހުގެ ބަހުސްގެ މަރުހަލާގައި މިއަދު ކުރިއަށްދިޔަ ބިމާއިބެހޭ ބިލަށް ވާހަކަފުޅު ދައްކަވަމުން ސަލީމް ވިދާޅުވީ މިހަފްތާ ފެށިގެން މަޖިލިސް ތެރެއިން ކުރެވިގެންދާ މަސައްކަތަކީ ވެރިކަމުގެ ބާރުތަކުގެ ތެރެއިން ރައީސުލްޖުމްހޫރިއްޔާގެ އޮފީހުގައާއި، މާލޭގެ މުޒާރާތަކުގައި ހުރި ބާރުތައް ދޫކޮށްލުމުގެ މަސައްކަތް ކަމުގައެވެ.

މަރުކަޒީ ގޮތުން ހިފެހެއްޓިފައިވާ ބާރުތައް ލާމަރުކަޒީ އުސޫލުން ދޫކޮށްލުމަކީ އޭރެއްގައި އޮންނަ ސަރުކާރަކަށް ކުރަން ނުކެރުނު ކަމަކަށް ވީނަމަވެސް މިސަރުކާރުން އެކަން ކުރައްވަމުންދަނީ، ހެޔޮވެރިކަމުގެ މިސްރާބަށް ކަމުގައި ސަލީމް ވިދާޅުވިއެވެ. ބިމުގެ މިލިކުވެރިކަން ކަންސިލްތަކަށް ދިނުމަށް ހުށަހެޅި އިސްލާހުތަކާއިއެކު ކައުންސިލްތަކަށް މާލީ ގޮތުން ބޮޑެތި ބާރުތަކެއްލިބި، ފުދުންތެރި ކައުންސިލްތަކަށް ވުމުގެ ފުރުސަތު ތަނަވަސް ވެގެންދާނެކަމަށެވެ.

ވެރިކަން ބަދަލުވިއިރު ބިމުގެ މިލްކުވެރިކަން އޮތީ ރަސްކަމުގެގައި ފަތްކޮޅުދީގެން ރަސްކަމުގެ ޒަމާނުގައިވެސް ނެތްފަދަ މިންވަރަކަށް ދަށަށް ގޮސްފަ. ރައީސުލްޖުމްހޫރިއްޔާގެ ބާރުދަށަށް ހުރިހާކަމެއް ވަނީ ޖަމާކޮށްފަ. ބާރެއް ދޫކޮށްލުމަކީ ވެރިކަން ބަލިކަށި ވެދާނެ ކަމެއްކަމަށް ގަބޫލުކުރި ވެރިން މި ފަހަކަށް އައިސް ފެނިގެންދިޔައީ. މިއަދު މިފެންނަނީ ހެޔޮވެރިކަމުގެ ސިފަތައް ބާރުތައް ބެހިގެންދާ ގޮތަށް ވެރިކަން ބައްޓަން ކުރެވިގެންދާ މަންޒަރު.

– ސަލީމް ވިދާޅުވިއެވެ.

ލާމަރުކަޒީ ގާނޫނަށް ފުށުއަރާ މާއްދާތައް އިސްލާހު ކުރަން ހުށަހަޅާފައިވާ ބިމާއިބެހޭ ބިލާއި ލާމަރުކަޒީ ގާނޫނަށް އިޝާރާތް ކުރައްވައި ސަލީމް ވިދާޅުވީ މާލޭގައި ހުންނަ އަތޮޅު ފިހާރަތަކުން ލިބޭ އާމްދަނީ އެ އަތޮޅެއްގެ ކައުންސިލަށް ލިބޭނެ ގޮތެއް އޮންނަން ގާނޫނުގައި އެބައޮތް ކަމަށެވެ. އެހެންވިޔަސް އެ ތަންތަން ރަޖިސްޓްރީ ކޮށްފައި އޮންނަނީ ފިނޭންސް މިނިސްޓްރީގެ ދަށުގައި ކަމަށް ސަލީމް ވިދާޅުވިއެވެ. އެ ތަންތަނާއި އެ ބިމުގެ މިލްކުވެރިކަން އެ އަތޮޅު ފިހާރަ ނިސްބަތްވާ އަތޮޅު ކައުންސިލަކަށް ބަދަލު ކޮށްދޭން ސަލީމް ވަނީ ގޮވާލައްވާފައެވެ.

ސަލީމް ފާހަގަ ކުރެއްވި ގޮތުގައި އެއިން ކޮންމެ ފިހާރަކައަކުން ކޮންމެ އަހަރަކުހެން ގާތްގަނޑަކަށް 20 މިލިއަނަށް ވުރެ ގިނަ ރުފިޔާގެ އާމްދަނީއެއް ލިބެއެވެ. އެ ފައިސާ އަތޮޅު ކައުންސިލްތަކަށް ލިބޭނަމަ، އެ އަތޮޅުގެ ތަރައްގީއަށް ހޭދަ ކުރާނެ ރަނގަޅު އާމްދަނީއެއް ލިބިގެން ދާނެ ކަމަށް އޭނާ ވިދާޅުވިއެވެ.