އެމްޑީޕީގެ ގައުމީ މަޖިލީހުގެ އިންތިޚާބުގައި ވާދަކުރުމަށް ޔޫތު މިނިސްޓަރު އަޙްމަދު މަހުލޫފް ޝަރުތު ހަމަނުވާކަން ޕާޓިން ނިންމާފައިވާ ނިންމުން ރަނގަޅުކަމަށް ޝަކުވާ ކޮމިޓީން ނިންމައިފިއެވެ.
އެޕާޓީން އިންތިޚާބުގައި ކުރިމަތިލާން ހުށަހެޅި ފަރާތްތަކުގެ ތެރެއިން ޝާރުތު ހަމަވާ ފަރާތްތަކުގެ ލިސްޓު އާންމުކޮށްފައި ވާއިރު މަހުލޫފާއި ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ޝަރުތު ހަމަނުވާކަމަށް ކަނޑައަޅާއި ސިޓީއަކުން ވަނީ އަންގާފައެވެ. އެނިންމުން މުރާޖައާކޮށްދޭން އެދި މަހުލޫފާއި އަކްރަމްގެ ފަރާތުން ވަނީ ޕާޓީއަށް ހުށަހަޅާފައެވެ. ނަމަވެސް އަކްރަމަށް ވާދަކުރެވޭނެކަމަށް އެ މައްސަލަ މުރާޖައާކޮށްދޭން އެދި ހުށަހެޅި މައްސަލަ ބެލުމަށްފަހު ޝަކުވާ ކޮމިޓީން ވަނީ ނިންމާފައެވެ.
އެމްޑީޕީގެ ޝަކުވާ ބަލާ ކޮމެޓީން މަހުލޫފުގެ މައްސަލާގައި ނިންމި ނިންމުމުގައި ބުނެފައިވަނީ ދާއިރާ އިންތިހާބުގައި ކުރިމަތިލުމުގެ ހަތަރުވަނަ ޝަރުތުގައިވާ ގޮތުން އެމްއެމްޕީއާރުސީގެ ހިޔާނާތުގެ މައްސަލައާ ގުޅިގެން އެއްވެސް ފިޔަވަޅެއް އެޅުމަށް އެދި އޭސީސީން އެއްވެސް އިދާރާއަކަށް ފޮނުވާފައިވާ މީހަކަށް އިންތިހާބުގައި ކުރިމަތިލުމުގެ ޝަރުތު ހަމަނުވާ ކަމަށް ކަނޑައަޅާފައިވާ ކަމަށެވެ. އެ ގޮތުން އެމްއެމްޕީއާރުސީގެ ހިޔާނާތުގެ މައްސަލާގައި މަހުލޫފަށް ދައުވާކޮށް ދިނުމަށް އެދި އޭސީސީން ޕީޖީއަށް ފޮނުވާފައިވާ ކަމަށެވެ.
އެމްޑީޕީއަށް މަހުލޫފު ހުށަހަޅާފައިވާ ޝަކުވާގައި ފާހަގަކޮށްފައިވާ ކަންކަމަށް ރިއާޔަތްކޮށް، ދާއިރާތަކުގެ އިންތިހާބުގެ ޝަކުވާ ބަލާ ކޮމިޓީން އޭނާއަށް ފޮނުވި ސިޓީގައި ބުނެފައި ވަނީ ގައުމީ މަޖިލީހަށް ކޮންމެ އިންތިހާބީ ދާއިރާއަކުން ދާއިރާ ރައީސުންގެ އިތުރުން ރައްޔިތުންގެ މަޖިލީހުގެ މެންބަރުންނާއި ސަރުކާރު ހިންގުމުގައި ޕާޓީ އޮންނަ ހާލަތުގައި ވަޒީރުންގެ މަޖިލީހުގައި ތިއްބަވާ ވަޒީރުންގެ ތެރެއިން ޕާޓީއަށް ނިސްބަތްވާ ވަޒީރުން ހިމެނޭ ކަމަށެވެ.
އެހެންކަމުން ރައީސުލްޖުމްހޫރިއްޔާ އައްޔަނުކުރައްވާ މަގާމެއްގައި ހުންނަވާ މީހަކީ ގާނޫނުއަސާސީގައި ބަޔާންކުރާ ޝަރުތު ފުރިހަމަވާ މީހެއްކަމަށް ވީނަމަވެސް ގައުމީ މަޖިލީހަށް އިންތިހާބުވާ ފަރާތްތަކަކީ މަގާމުގެ ހައިސިއްޔަތުން ގައުމީ މަޖިލީހަށް އައްޔަނުކުރާ މެންބަރުންނަށް ނުވާތީ، ޕާޓީގެ އިންތިހާބުގައި ވާދަކުރުމަށް ވަކި ޝަރުތުތަކެއް ކަނޑައެޅުމަކީ ގާނޫނު ދަންނަ ހަމައެއް ކަމަށެވެ.
ޝަކުވާ ކޮމެޓީން މިގޮތަށް ނިންމާފައި މިވަނީ ގައުމީ މަޖިލީހުގެ އިންތިހާބުގައި ވާދަ ނުކުރެވޭނެ ކަމަށް އެންގި އެންގުން މުރާޖައާކުރުމަށް މަހުލޫފު ހުށަހަޅާފައިވާ ޝަކުވާއަށް ޖަވާބެއް ނުލިބި ލަސްވެފައި ވާތީ އިލެކްޝަން ކޮމިޝަނަށް އެ މައްސަލަ ހުށައަޅާފައިވަނިކޮށެވެ.
މަހުލޫފު ކުރިމަތިލަވައްވަން ހުށަހެޅުއްވީ ގައުމީ މަޖިލީހުގެ މެދު އުތުރު ޕްރޮވިންސްގެ ރައީސް ކަމަށެވެ. މެދު އުތުރު ޕްރޮވިންސް އަކީ ކ، އއ، އދ، އަދި ވ. އަތޮޅު ތަމްސީލް ކުރައްވާ ގޮނޑިއެވެ.
