ސޯވިއެޓް ޔޫނިއަންއިން، 10 އަހަރު ވަންދެން އަފްއާނިސްތާނުގައި ހިންގި ނާކާމިޔާބު އަސްކަރީ ހަރަކާތްތަކަށްފަހު، ރަޝިއާއަށް ވަނީ ރަގަޅު ފިލާވަޅެއް ލިބިފައި ކަމަށާއި، ރަޝިޔާއިން ދެން ދުވަހަކުވެސް، އެފައާނިސްތާނުގައި ހިގަމުންދާ މައްސަލައެއްގެ ތެރޭގައި އެގައުމަށް ސިފައިން ނުފޮނުވާނެކަމަށް، ރަޝިއާގެ ރައީސް ލަޑިމިރު ޕުޓިން ވިދާޅު ވެއްޖެއެވެ.
ޕުޓިން މިގޮތަށް ވިދާޅުވެފައިވަނީ، ރަޝިއާގައި ވެރިކަން ކުރަމުންދާ ޔުނައިޓެޑް ރަޝިއާ ޕާޓީގެ ކޮންގްރެސްގައި ވާހަކަ ދައްކަވަމުންނެވެ.
"ބުނުމުގެ ބޭނުމެއްވެސް ނެތް ފަދައިން، އަފްއާނިސްތާނުގައި ހިގަމުންދާ ދާޚިލީ މައްސަލައެއްގެ ތެރޭގައި ރަޝިއާއިން އަފްއާނިސްތާނަށް ސިފައިން ނުފޮނުވާނަން، އަދި އެގައުމުގެ ދާޚިލީ މައްސަލައެއްގެ ތެރެއަށް ރަޝިއާއިން ނުވަންނާނެ،" ޕުޓިން ވިދާޅުވެފައި ވެއެވެ.
"ސޯވިއެޓް ޔޫނިއަންއިންވަނީ އެގައުމުގައި ތަޖުރިބާތަކެއް ކޮށްފަ. އަހަރެމެން މިތިބީ ފިލާވަޅުތަކެއް ދަސްކޮށްގެން."
އަފްއާނިސްތާނުގައި އޮތް ކޮމިއުނިސްޓް ސަރުކާރު ހިމާޔަތް ކުރުމަށްޓަކާ އެގައުމަށް އަރާ، ސޯވިއެޓް ޔޫނިއަންގެ ސިފައި އަފްއާނިސްތާނަށް އަތްގަދަ ކޮށްގެން 10ވަރަކަށް އަހަރު ތިބެފައި ވެއެވެ.
އެހެންނަމަވެސް، އަފްއާނިސްތާނުގެ މުހާޖިދީންގެ ހަގުރާމަވެރިންނާ ހަގުރާމަކޮށް ކާމިޔާބު ނުލިބި، އެންމެ ފަހުން ސޯވިއެޓް ސިފައިން އަފްއާނިސްތާނުން ފާބައިފައި ވަނީ 1989 ވަނަ އަހަރުއެވެ. އޭގެ 3 ވަރަކަށް އަހަރުފަހުން، ކާބުލްގައި އޮތް ސޯވިއެޓް ޔޫނިއަންއިން ތާއީދުކުރަމުންއައި ސަރުކާރުވެސް ވަނީ ވެއްޓިފައެވެ.
