ސްރީ ލަންކާގެ ކުރީގެ ފޮރިންގ މިނިސްޓަރ ކޯވިޑް19އަށް ޕޮޒިޓިވްވެ ފަރުވާ ދެމުން ދަނިކޮށް ނިޔާ ވެއްޖެއެވެ.
ސްރީ ލަންކާގެ ޚާރިޖީ ވަޒީރުކަން ދެ ފަހަރެއްގެ މަތިން، އެންމެ ފުރަތަމަ 2005 އިން 2007 އަށް އަދި އޭގެ ފަހުން 2015 އިން 2017 އަށް ކުރެއްވި މަންގަލަ ސަމަރަވީރަ ނިޔާވެފައިވަނީ، މިއަދުގެ ވަގުތެއްގައި، ޕްރައިވެޓް ހޮސްޕިޓަލެއްގައި ކޯވިޑަށް ފަރުވާ ދެވެމުން ދަނިކޮށެވެ.
އުމުރުން 65 އަހަރުގެ މަންގަލަ ސަމަރަވީރަ ކޯވިޑް19 އަށް ޕޮސިޓިވް ވެފައިވަނީ މިމަހުގެ ކުރީކޮޅުއެވެ. އަދި ފަހުން އޭނާގެ ހާލު ބޮޑުވެގެން އެޑްމިޓް ކޮށްފައި އޮތީ ލަންކާ ހޮސްޕިޓަލްގެ އައިސީޔޫގައެވެ.
މަންގަލަ ސަމަރަވީރައަކީ، ކޯވިޑްގެ ހާލަތު އާދަޔާ ޚިލާފަށް ގޯސްވެ، މިމަހުގެ ނިޔަލަށް މިހާރު ލޮކްޑައުން ކޮށްފައިވާ ސްރީ ލަންކާގައި ނިޔާވި ދައުލަތުގެ އެންމެ އިސްމަގާމްތައް އަދާކޮށްފައިވާ ދެވަނަ ބޭފުޅާއެވެ. ސްރީ ލަންކާގެ ގާނޫނު ހަދާ މަޖިލިހުގެ ކުރީގެ ރައީސް ލޮކުބަންޑާރަވެސް ވަނީ ކޯވިޑް ބަލީގައި ނިޔާވެފައެެވެ.
ލިބަރަލް ވިސްނުމަށް ތާއީދު ކުރައްވާ ސިޔާސީ ބޭފުޅެއް ކަމުގައިވާ މަންގަލަ ސަމަރަވީރައަކީ އަކީ 1994ވަނަ އަހަރުން ފެށިގެން ސްރީ ލަންކާގެ ސަރުކާރު އިސް އެތައް މަގާމެއް އަދާކުރައްވާފައިވާ ބޭފުޅެކެވެ. އޭގެ ތެރޭގައި އެގައުމު ފިނޭންސް މިނިސްޓަރކަންވެސް ހިމެނެއެވެ.
އޭނާ ސިޔާސީ މަސައްކަތާ ދުރަށް ޖެހިވަަޑައިގެންނެވީ ފާއިތުވެދިޔަ އަހަރުއެވެ.
ސްރީ ލަންކާގައި ކޯވިޑް ފެތުރެމުންދާ ނިސްބަތް އާދަޔާ ޚިލާފަށް މަތިވެ އަދި މަރުވާ މީހުންގެ ނިސްބަތްވެސް އިތުރުވެ، ގައުމުގެ ސިއްޙީ ނިޒާމަށް އާދަޔާ ޚިލާފަށް ބާރުބޮޑުވާން ފެށުމާއި ގުޅިގެން، ސްރީ ލަންކާ މިހާރުވަނި 10 ދުވަހަށް ލޮކްޑައުން ކޮށްފައެވެ.
ފާއިތުވެދުޔަ ހަފްތާގެ ބުދަ ދުވަހު އެކަނިވެސް ސްރީ ލަންކާގައިވަނީ، ކޯވިޑް ބަލީގައި 187 މީހަކު މަރުވެ އަދި 3,793 މީހަކު ޕޮޒިޓިވް ވެފައެވެ. މިއީ ކޯވިޑް އަގައުމުގައި ފެތުރެން ފެށިފަހުން އެއް ދުވަހެއްގައި އެންމެ ގިނަ އަދަދަކަށް ކޯވިޑް ބަލީގައި މީހުން މަރުވެފައިވާ ދުވަހެވެ.
ސްރީ ލަންކާގައިވަނީ ވައިރަސް ފެރުތުން ކޮންޓްރޯލް ކުރުމުގެ ގޮތުން އަޅާފައިވާ ފިޔަވަޅުތަކުގެ ތެރޭގައި، ސްލޫކްތަކާއި، ޖިމްތަކާއި، ސުވިމިން ޕޫލްތައް ބަންދުކޮށް، ކައިވެނި ހަފްކާތަކާއި އަދި މިއުޒިކް ޝޯވްތައްވެސް ބޭއްވުން މަނާކުރުންވެސް ހިމެނެއެވެ. އަދި މީގެއިތުރުން، ފާއިތުވެދިޔަ ހަފްތާގެ ހޯމަ ދުވަހުން ފެށިގެން ކޮންމެ ދުވަހަކުވެސް ރޭގަޑު 10އިން ފަތުހު 4އާއި ހަމައަށް ވަނީ ކާފިއުވެސް ހިންގަން ފަށާފައެވެ.
ސްރީ ލަންކާގެ އާބާދީގެ ހަތަރުބައި ކޮށްފަ އެއްބަޔަށް މިހާރުވަނީ ވެކްސިން ދީ ނިންމާފައެވެ. މީގެ ތެރޭގައި ގިނައީ ޗައިނާގެ ސިނަފާމް ވެކްސިނެވެ.
