ވެރިކަން ކުރަމުންދާ މައި ޕާޓީ އެމްޑީޕީގެ އެތެރޭގެ އިންތިޚާބުގައި، ވާދަނުކުރެވޭނެ ކަމަށް ޔޫތު މިނިސްޓަރ އަހުމަދު މަހުލޫފަށް އަންގާފައިވާ މައްސަލަ އިސްތިއުނާފަށް ހުށަހަޅާފައިވާއިރު، މައްސަލަ ވީހާވެސް އަވަހަށް ނިންމަވައި ދެއްވުމަށް އޭނާ އެދިވަޑައިގެންފިއެވެ.
މަހުލޫފް އޭނާގެ އިސްތިއުނާފްގެ މައްސަލަ އަވަސް ކޮށްދެއްވުމަށް އެދިފައިވަނީ ގައުމީ މަޖިލީހުގެ އިންތިޚާބުގައި ވާދަކުރުމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ޝަރުތު ހަމަނުވާކަން ޕާޓިން ނިންމާފައިވާ ނިންމުން މުރާޖައާކޮށް އިންތިޚާބުގައި ވާދަކުރެއްވުމުގެ ފުރުސަތު ދިނުމަށް ނިންމުމުންނެ. އަކްރަމްއާއި މަހުލޫފް މައްސަލަ އިސްތިއުނާފު ކޮށްފައިވަނީ އެއްދުވަހެއްގައެވެ.
މިކަމާއި ގުޅިގެން މަހުލޫފް ވިދާޅުވީ މައްސަލަ އިސްތިއުނާފް ކޮށްފައިވާތާ މިހާރު 6 ދުވަސް ވެފައިވަކަމަށެވެ. ނަމަވެސް އެމްޑީޕީގެ ގަވާއިދު ބުނާގޮތުން މައްސަލަ ހުށަހަޅާތާ 2 ދުވަސް ތެރޭގައި މައްސަލައަށް ވާގޮތެއް ނުވަތަ ކޮންމެވެސް ޖަވާބެއް ދޭންޖެހޭކަމަށް ބުނެފައިވާކަމަށެވެ. ނަމަވެސް އެކަންވެސް ކޮށްދީފައި ނުވާކަމަށެވެ. މަހުލޫފް ވިދާޅުވީ އޭނާއާއިމެދު ތަފާތުނުކޮށް ވީހާވެސް އަވަހަށް މައްސަލަ ނިންމައި، ކެމްޕެއިން ކުރުމުގެ ފުރުސަތުވެސް ލިބޭގޮތަށް މައްސަލަ ނިންމަވައި ދެއްވުން އެދޭކަމަށެވެ.
އަޅުގަނޑުގެ މައްސަލަވެސް އިސްތިއުނާފްކޮށްފަ އޮންނަތާ 6 ދުވަސް. 2 ދުވަސްތެރޭ ޖަވާބެއް ދޭންވާނެކަމަށް ބަޔާންކުރާއިރު އަޅުގަނޑަށް ވާނުވާ ޗެއާޕާސަން ހަސަން ލަތީފް އަންގާލަދެއްވުން އެދެން. އިންތިހާބަށް 30 ދުވަހަށް ވެފައިވާއިރު ކެމްޕޭން ކުރަން ބޭނުން. ތަފާތުނުކުރައްވާ.
– މަހުލޫފް ވިދާޅުވިއެވެ.
އެމްޑީޕީގެ އެތެރޭގެ އިންތިޚާބުގައި ވާދަކުރުމުގެ ފުރުސަތު މިނިސްޓަރ މަހުލޫފްއަށާއި، އަކްރަމްއަށް ގެއްލުނީ އެޕާޓީގެ ހިންގާ ކޮމެޓީން ފާސްކޮށްފައިވާ ޝަރުތުތައް ހަމަނުވުމުންނެވެ. ދާއިރާތަކުގެ އިންތިޚާބުގައި ވާދަކުރެވެނީ އެސެޓް ރިކަވަރީ ކޮމިޝަނާއި މަރު ކޮމިޝަނުން ނެރެފައިވާ ރިޕޯޓެއްގައި ކުށެއް ކުރުމުގައި ބައިވެރިވެފައިނުވާ މީހުންނަށާއި، ޖިނާއީ ބޮޑެތި ކުށްތަކުގެ ތެރެއިން މީހަކު މެރުމާއި ރޭޕް ކުރުމާއި ކުޑަކުދިންނަށް ޖިންސީ ގޯނާ ކުރުން ފަދަ ކުށްތަކުން ބަރީއަވެގެންވާ މީހުންނަށް ކަމަށެވެ. މީގެއިތުރުން އެމްއެމްޕީއާރްސީ ޚިޔާނާތާއި ގުޅިގެން އޭސީސީން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެކިއެކި މުއައްސަސާތަކަށް ނަން ފޮނުވާފައިވާ ފަރާތްތަކަށް ވާދަ ނުކުރެވޭނެ ކަމަށް ހިންގާ ކޮމިޓީން ވަނީ ކަނޑައަޅާފައެވެ.
އެމްޑީޕީން މިނިސްޓަރ މަހްލޫފަށާއި އަކްރަމަށް ފޮނުވި ސިޓީއެއްގައި ބުނީ އެދެބޭފުޅުންގެ މައްސަލައެއް ބަލަމުން އަންނަކަމަށް އޭސީސީން ބުނެފައިވާ ކަމަށާއި، އެހެންކަމުން ދެ ބޭފުޅުން އިންތިހާބަށް ޝަރުތު ހަމަނުވާކަމަށް ކަނޑައަޅައި ކެންޑިޑޭޓުންގެ ލިސްޓުން އުނިކޮށްފައިވާ ކަމަށެވެ. މަހްލޫފް ވިދާޅުވީ އެމްޑީޕީގެ ނިންމުމަކީ، އެމްޑީޕީން ވަކާލާތުކުރާ ހައްޤުތަކާއި ދެކޮޅު، ޑިމޮކްރެސީގެ ރޫހާވެސް ހިލާފު ނިންމުމެއްކަމަށެވެ.
