ބޮމުގެ ހަމަލާއަށްފަހު ރާއްޖެ އިން ބޭރުގައި ހުންނެވި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަނބުރާ ރާއްޖެ ވަޑައިގެންފި ނަމަ އެމަނިކފާނުގެ ހަށިކޮޅަށް ގެއްލުން ދޭނެ ކަމަށް ބުނެ އިންޒާރުދިން މީހާ ހައްޔަރުކޮށްފިއެވެ.
މިމީހާ ހައްޔަރުކޮށްފައިވަނީ ރ.އަތޮޅު މީދޫއިންނެވެ. މިމީހާ ފުލުހުންގެ ބެލުމުގެ ދަށަށް ގެންގޮސްފައިވަނީ މީގެ އިރުކޮޅެއް ކުރިންނެވެ. ފުލުހުން ބުނެފައިވަނީ ހައްޔަރު ކޮށްފައިވަނީ 40 އަހަރުގެ ދިވެހި ފިރިހެއް ކަމަށެވެ.
ބަރުލަމާނީ ނިޒާމަށް ތާއީދު ހޯދުމަށް ނަޝީދު ކުރެއްވި ޕޯސްޓަކަށް ފޭސްބުކްގައި ކޮމެންޓް ކުރި މީހަކު ވަނީ ނަޝީދު ރާއްޖެ ވަޑައިގަންނަވައިފި ނަމަ އެމަނިކުފާނަށް ގެއްލުން ދޭނެ ކަމަށް ފާޅުގައި އިންޒާރު ދީފައެވެ. އެ މީހާ ބުނެފައި ވަނީ ނަޝީދު އަނބުރާ ރާއްޖެ އައުމުން "ބަދުރުގެ ދުވަހު އަބޫ ޖަހުލަށް ހެދި ގޮތް ހަދާނެ" ކަމަށެވެ.
އޭނާ އަށް ރައްދުދީ އެގޮތަށް އަމަލު ނުކުރެވޭނެ ކަމަށް ބުނި މީހަކަށް ވެސް އެ މީހާ ވަނީ ރައްދު ދީފައެވެ. އޭނާ ވަނީ 6 މޭއިގައި ހަމަލާ ދެވޭނެކަން ފެނުނު ކަމަށާއި ދެން ފަހަރަކުން އެއަށް ވުރެ ހިތި ވާނެ ކަމަށް ބުނެފައެވެ. އެ ކޮމެންޓުގައި އައިސިސްގެ ދިދަ އާއި ކަނޑިވެސް ވަނީ ހިމަނާފައެވެ.
