ސްރީ ލަންކާގައި ކޯވިޑް ފެތުރެމުންދާ ނިސްބަތް އާދަޔާ ޚިލާފަށް މަތިވެ އަދި މަރުވާ މީހުންގެ ނިސްބަތްވެސް އިތުރުވެ، ގައުމުގެ ސިއްޙީ ނިޒާމަށް އާދަޔާ ޚިލާފަށް ބާރުބޮޑުވާން ފެށުމާއި ގުޅިގެން، ސްރީ ލަންކާ މިރެއިން ފެށިގެން 10 ދުވަހަށް ލޮކްޑައުން ކުރުމަށް އެގައުމުގެ ސަރުކާރުން ނިންމައިފިއެވެ.
މިފަހްތާގެ ބުދަ ދުވަހު އެކަނިވެސް ސްރީ ލަންކާގައިވަނީ، ކޯވިޑް ބަލީގައި 187 މީހަކު މަރުވެ އަދި 3,793 މީހަކު ޕޮޒިޓިވް ވެފައެވެ. މިއީ ކޯވިޑް އަގައުމުގައި ފެތުރެން ފެށިފަހުން އެއް ދުވަހެއްގައި އެންމެ ގިނަ އަދަދަކަށް ކޯވިޑް ބަލީގައި މީހުން މަރުވެފައިވާ ދުވަހެވެ.
"މިރޭގެ 10:00 އިންފެށިގެން 30 އޮގްސްޓުގެ ނިޔަލަށް މުޅި ގައުމު ލޮކްޑައުން ކުރެވޭނެ. އެހެންނަމަވެސް އަސާސީ ހުރިހާ ޚިދުމަތެއްވެސް ކުރިއެކޭ އެއްގޮތަށް ފޯރުކޮށް ދެވެމުން ދާނެ،" ހެލްތު މިނިސްޓަރ ކެހެލިޔަ ރަމްބުކްވެއްލަ ޓުވީޓު ކުރައްވާފައި ވެއެވެ.
ސްރީލަންކާގެ ރައީސް ގޮޓަބަޔަ ވަނީ، ކޯވިޑް19ގެ ޕްރެޒިޑެންޝަލް ޓާސްކް ފޯސްއާއި ބައްދަލު ކުރައްވާފައެވެ. އަދި ހުކުރު ދުވަހުގެ ފަހުގެ ވަގުތެއްގައި ގައުމާ މުޚާތަބު ކުރައްވާގޮތަށްވެސް ވަނީ ހަމަޖެހިފައެވެ.
ސްރީ ލަންކާގެ ސިއްޙި ތަޖުރިބާކާރުންނާއި، ދީނީ ލީޑަރުންނާއި، އަދި ސިޔާސީ ފަރާތްތަކުންވެސް ވަނީ، ވައިރަސް ފެތުރުން ހުއްޓުމަކަށް ގެނައުމަށްޓަކާ މުޅި ގައުމު ވަގުތުން ވަގުތަށް ލޮކްޑައުން ކުރުމަށް ގޮވާލައްވާފައެވެ.
32 މިލިއަން މީހުންގެ އާބާދީއެއް އޮންނަ ސްރީލަންކާގައި ކޯވިޑް19ގެ ޑެލްޓާ ވޭރިއެންޓް ފެތުރެމުން ދިއުމާގުޅިގެން، އެގައުމުގެ ހޮސްޕިޓަލްތަކަށް ވަނީ ބާރު ބޮޑުވެފައެވެ.
"އެމީހުން އަހެރެމެންގެ އަޑު އަހާނަމަ، ލީޑަރުންނަށްވެސް ރަގަޅު ވާނީ ގައުމު ލޮކްޑައުން ކުރުން،" ސްރީ ލަންކާ ލޮކްޑައުން ކުރުމަށް ނިންމުމުގެ ކުރިން، ގާނޫނުހަދާ މަޖިލިހުގެ މެމްބަރެއް ކަމުގައިވާ ޓިއްސާ ވިޓަރަނަ ވިދާޅުވެފައި ވެއެވެ.
މިހާރުވެސް ސްރީ ލަންކާގައިވަނީ ވައިރަސް ފެރުތުން ކޮންޓްރޯލް ކުރުމުގެ ގޮތުން ފިޔަވަޅުތައް އަޅާފައެެވެ. މިގޮތުން ސްލޫކްތަކާއި، ޖިމްތަކާއި، ސުވިމިން ޕޫލްތައް ބަންދުކޮށް، ކައިވެނި ހަފްކާތަކާއި އަދި މިއުޒިކް ޝޯވްތައްވެސް ބޭއްވުން މިހާރުވެސް އެގައުމުގައި ވަނީ މަނާކުރެވިފައެވެ. އަދި މީގެއިތުރުން، މިހަފްތާގެ ހޯމަ ދުވަހުން ފެށިގެން ކޮންމެ ދުވަހަކުވެސް ރޭގަޑު 10އިން ފަތުހު 4އާއި ހަމައަށް ވަނީ ކާފިއުވެސް ހިންގަން ފަށާފައެވެ.
ސްރީ ލަންކާގެ އާބާދީގެ ހަތަރުބައި ކޮށްފަ އެއްބަޔަށް މިހާރުވަނީ ވެކްސިން ދީ ނިންމާފައެވެ. މީގެ ތެރޭގައި ގިނައީ ޗައިނާގެ ސިނަފާމް ވެކްސިނެވެ.
