މާލޭގެ މަގުތައް ހެދުމުގެ މަޝްރޫއުގެ ތެރެއިން މާލޭގެ މައި ހުރިހާ މަގުތަކެއް ތާރުއަޅައިގެން ހެދުމަށް ސަރުކާރުގެ ހުއްދައަކަށް އެދިފައިވާނެކަމަށް މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެެވެ.
މާލޭގެ މަގުތައް ރަނގަޅު ފެންވަރަކަށް ހެދުމަށް ހިންގާ "ސްޓްރީޓް ސްކޭޕިންގް ޕްރޮޖެކްޓް"ގެ ދަށުން ހެންވޭރު އުތުރުގެ މަގުތައް ހެދުމުގެ މަސައްކަތް ފެށުމަށް މިއަދު ބޭއްވި ރަސްމިއްޔާތު ޝަރަފްވެރި ކޮށްދެއްވައި ވާހަކަ ދައްކަވަމުން މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވީ ރަނގަޅު ފެންވަރަށް މާލޭގެ މަގުތައް ހެދުމުގެ މަޝްރޫއުގެ ތެރެއިން މާލޭގެ މައި ހުރިހާ މަގުތަކެއް ތާރުއަޅައިގެން ހެދުމަށް ސަރުކާރުގެ ހުއްދައަކަށް އެދިފައިވާކަމަށެވެ. މަގުތައް ތާރު އަޅައިގެން ހެދިއްޖެނަމަ އެއްގަމު އުޅަނދު ދުއްވާ ފަރާތްތަކަށްވެސް އެކަމުގެ ފައިދާތައް ކުރާނެ ކަމަށް މޭޔަރު ވިދާޅުވިއެވެ. އެގޮތުން ރިންގްރޯޑްގެ އިތުރަށް މާލޭގެ ހުރިހާ ދާއިރާއެއް ކަވަރ ވާނެގޮތަށް މަޢުލޫމާތުތައް އެއްކުރުމަށްފަހު މިހާރު އެ މަޢުލޫމާތުތައް ހުށައަޅާފައިވާ ކަމަށް މޭޔަރ ވިދާޅުވިއެވެ.
މަގުތައް ޒަމާނީ ފެންވަރަށް، އަދި ރައްޔިތުންނަށް ހިތްފަސޭހަ ތަނަކަށް ހެދުމަކީ މުހިއްމުކަމެއް. އެގޮތުން އެކަންތައް ފުރިހަމަކުރުމަށް މަސައްކަތް ކުރަމުން މިދަނީ. މިއީ މުޅި މާލޭގެ ރައްޔިތުންނަށް ފައިދާވާނެ ގޮތަކަށް ކުރިއަށްގެންދާނެ މަޝްރޫޢެއް.
– މާލޭގެ މޭޔަރ ޑރ.މުޙައްމަދު މުޢިއްޒު ވިދާޅުވިއެވެ.
މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ފަށާފައިވަނީ 2020ވަނަ އަހަރުގެ ފެބުރުއަރީ މަހުއެވެ. މަސައްކަތް ފުރަތަމަ ފެށީ މާފަންނު ހުޅަނގުގައެވެ. މީގެތެރެއިން ބައެއް މަގުތަކުގެ މަސައްކަތް ނިންމާ މިހާރުވަނީ ބޭނުންކުރަންވެސް ހުޅުވާލާފައެވެ. މާލޭ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ދަށުން މާލޭގެ 416 މަގެއް ހެދުމަށް ވަނީ ނިންމާފައެވެ.
އާރް. ޑީސީ އާއި ހަވާލު ކުރެވިގެން މާލޭ ސިޓީ ކައުންސިލުން ކުރިއަށް ގެންދާ މާލޭ ސްޓްރީޓް ސްކޭޕިންގ ޕްރޮޖެކްޓްގެ ފޭސް 2 ގެ،ހެންވޭރު ސެގްމަންޓް މަސައްކަތް މާލެ ސިޓީގެ މޭޔަރ@MMuizzu ފައްޓަވައި ދެއްވައިފި
"ހިތްފަސޭހަ މާލެ" pic.twitter.com/75wNBimu6x— Male' City Council (@MaleCitymv) August 17, 2021
މާލޭގެ މަގުތައް ރަނގަޅު ފެންވަރަކަށް ހެދުމަށް ހިންގާ މަޝްރޫއުގެ ދަށުން ހެންވޭރު އުތުރުގެ މަގުތައް ހެދުމަށް ރޯޑް ޑިވެލޮޕްމަންޓް ކޯޕަރޭޝަންއާއި ހަވާލުކޮށްފައިވަނީ މިއަހަރުގެ އޭޕްރީލް މަހުގެ 6 ވަނަ ދުވަހުއެވެ. ހެންވޭރުގެ އިތުރަށް މައްޗަންގޮޅި ދެކުނާއި މައްޗަންގޮޅި މެދު ސަރަޙައްދުގެ ބައެއް މަގުތައް ހެދުމަށްވެސް އެދުވަހު ވަނީ އެކުންފުންޏާ ހަވާލުކޮށްފައެވެ. މިއީ މަގުތައް ރަނގަޅު ފެންވަރަށް ތަރައްޤީ ކުރުމަށް ކުރިއަށް ގެންދާ މަޝްރޫޢުގެ ދެވަނަ ފިޔވަހީގެ މަސައްކަތެވެ.
މި މަސައްކަތުގެ ދަށުން ހެންވޭރު އުތުރުގެ 13 މަގެއް ހެދުމަށްވަނީ ހަމަޖެހިފައެވެ. އެއީ ވައިލެޓް ހިނގުން، ވައިލެޓް މަގު، ގުލިސްތާން ގޯޅި، ހިރުނދު މަގު، ދުނބުރި މަގު، ރޯޝަނީމަގު، ކުރަނގި ގޯޅި، ކަސްތޫރި މަގު، ސީސަން މަގު، ސަނދުބަރަކާ ގޯޅި، ދީފުރަމް ގޯޅި، ގަލަދުން ގޯޅި އަދި ފިލިގަސް މަގެވެ. މި މަގުތަކުން ޖުމްލަ 1.97 ކިލޯމީޓަރު ހަދާނެއެވެ. މި މަޝްރޫޢަށް ޖުމުލަ 70.1 މިލިއަން ރުފިޔާ ޚަރަދުވެއެވެ.
