ހޮޓަލެއްގެ ނަމުގައި ބުކިން ހައްދައިދީ, އޮޅުވާލައިގެން ރާއްޖެއަށް ފަތުރުވެރިންތަކެއް ގެނެސް އެ މީހުން މަގުމަތިވި މައްސަލާގައިތުހުމަތު ކުރެވޭ ބިދޭސީ މީހަކު ހައްޔަރުކޮށްފިއެވެ.
އޮޅުވާލައިގެން ރާއްޖެ ގެނައި އިންޑިއާގެ 27 ފަތުރުވެރިންގެ ތެރޭގައި 13 ކުޑަކުދިން ހިމެނެއެވެ. އޭގެ ތެރޭގައި އަހަރު ނުވާ ކުޑަ ކުއްޖަކު ވެސް ހުރި އިރު، އެމީހުން ރޭގައި ތިބީ ވަންނާނެ ތަނެއް ނެތި މާލޭގެ މަގުމަތީގައެވެ. އަދި ކަމާބެހޭ އެއްވެސް އިދާރާއަކަށް އެކަން ހައްލުކޮށް ދެވިފައެއް ނުވެއެވެ. އެހެންވެ އެކަމުގައި ރޭ ދަންވަރު އިސް ނަންގަވާފައި ވަނީ މިނިސްޓަރު މަހްލޫފާއި، އަނބިކަނބަލުން ނަޒޫއެވެ.
މިމައްސަލާގައި ކޮންޓްރޯލާ ޖެނަރަލް އޮފް އިމިގްރޭޝަން މުޙައްމަދު އަޙްމަދު ޙަސަން (ހަނަފީ) ކުރެއްވި ޓްވީޓުގައި ވިދާޅުވީ މިކަމުގަި ތުހުމަތު ކުރެވެނީ ބިދޭސީ މީހަކަށް ކަމަށެވެ. މިމައްސަލާގައި ތުހުމަތު ކުރެވޭ ބިދޭސީ މީހާ ފުލުހުން ހިންގި އޮޕަރޭޝަގައި ރޭ މެންދަދު ހައްޔަރު ކޮށްފައިވާކަމަށް ހަނަފީ ވިދާޅުވިއެވެ. އޭނާ ވިދާޅުވީ މިކަމުގައި ގިނަ ބައެއްގެ އެހީތެރިކަން ލިބުނުކަމަށެވެ. ޙާއްސަކޮށް މިނިސްޓަރ މަހުލޫފްގެ ދެކަބަލުންގެ ފަރާތުން ލިބުނު އެހީތެރިކަން ފާހަކޮށް ހަނަފީ ވަނީ މަހުލޫފްއާއި، ނަޒޫއަށް ޝުކުރު އަދާ ކުރައްވާފައެވެ.
އޮޅުވާލައިގެން ސައްޚަނޫން ހޮޓެލް ބުކިންގ ތަކެއް ދިނުމުގެ ސަބަބުން މަގުމަތިވި 27 ފަތުރުވެރިއެއްގެ މައްސަލާގައި ޝާމިލުވާކަމަށް ތުހުމަތުކުރެވޭ ބިދޭސީ ފަރާތެއް ވަނީ ފުލުހުންނާއި ގުޅިގެން ހިންގި އޮޕަރޭޝަނެއްގައި ރޭ މެންދަމު 2:00 ހާއިރު އިމިގްރޭޝަންގެ ބެލުމުގެ ދަށަށް ގެނެވިފައި. އަންހެނުންނާއި ކުޑަކުދިން ހިމެނޭ މި ފަތުރުވެރިންގެ ގްރޫޕަށް، އިމިގްރޭޝަނާއި، ޕޮލިހާއި، ރެޑް ކްރެސެންޓު އަދި ހެޔޮއެދޭފަރާތްތައް ގުޅިގެން ވާނީ އެހީތެރިކަން ފޯރުކޮށްދީފައި. މިކަމުގައި މުހިންމު އެހީތެރިކަމެއްދެއްވި މިނިސްޓަރ މަހުލޫފް އާއި، ނަޒު ނަސީމް އަށް ޚާއްސަ ޝުކުރެއް ދަންނަވަން.
– ހަނަފީ ވިދާޅުވިއެވެ.
އޮޅުވާލައިގެން ސައްޚަނޫން ހޮޓެލް ބުކިންގ ތަކެއް ދިނުމުގެ ސަބަބުން މަގުމަތިވި 27 ފަތުރުވެރިއެއްގެ މައްސަލާގައި ޝާމިލުވާކަމަށް ތުހުމަތުކުރެވޭ ބިދޭސީ ފަރާތެއް ވަނީ @policemv އާ ގުޅިގެން ހިންގި އޮޕަރޭޝަނެއްގައި ރޭ މެންދަމު 2:00 ހާއިރު އިމިގްރޭޝަންގެ ބެލުމުގެ ދަށަށް ގެނެވިފައި. 1/2
— Mohamed (Hanafy) ?? (@hanafymv) August 16, 2021
މަހްލޫފް ވަނީ ރޭގައި އެ ހުރިހާ އެންމެން ހުޅުމާލެ ފުޓްބޯޅަ ސްކޫލްގެ އެކޮމަޑޭޝަން ބްލޮކަށް ބަދަލުކޮށްފައެވެ. ކޮވިޑް-19 ގެ ބަލިމަޑުކަމުގެ ތެރޭގައި ރަށަށް ނުދެވި މާލޭގައި ތާށިވި ގިނަ ބަޔަކު އެތައް މަހެއް ވަންދެން މި ފެސިލިޓީގައި ބޭތިއްބިއެވެ. މިމައްސަލަ އާ ގުޅިގެން ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވެސް ވަނީ ކަންބޮޑުވުން ފާޅުކުރައްވައިފައެވެ. މައުސޫމް ވިދާޅުވީ ހުއްދަ ނެތި ތަންތަނުގައި ފަތުރުވެރިން ބޭތިއްބުމަކީ ފަތުރުވެރިކަން ނޫން ކަމަށާއި އެއީ އިންސާނީ ވަގުފާރި ކަމަށެވެ.
