އެމެރިކާގެ ރައީސް ޑޮނަލްޑް ޓްރަމްޕް، އެގައުމުގެ ސުޕްރީމް ކޯޓުން ހުސްވެފައިވާ ގޮޑިޔަށް ފަޑިޔާރަކު އައްޔަންކުރުމަށް ހުށަހަޅުއްވާފައިވާ އެމީ ކޯނީ ބެރެޓަށް ސެނެޓުންރުހުން ދީފިއެވެ.
ރިޕަބްލިކަނުންގެ މެޖޯރިޓީ އޮންނަ ސެނެޓުން ބެރެޓަށް ރުހުން ލިބިގެން ދިއުން ސިފަވެގެން ދަނީ، އެމެރިކާގެ ރިޔާސީ އިންތިޚާބަށް އެންމެ ހަފްތާއަކަށް ވެފައިވަނިކޮށް ރައީސް ޓްރަމްޕަށް ލިބިގެންދިޔަ ބޮޑު ކާމިޔާބީއެއްގެ ގޮތުގައެވެ. މި ވޯޓުގައި ބެރެޓާއި އެކޮޅަށް 52 ވޯޓު ލިބިގެން ދިޔައިރު، ބެރެޓާއި ދެކޮޅަށް 48 މެމްބަރުކު ވޯޓު ދެއްވާފައިވެއެވެ.
ސެނެޓްގައި ރިޕްބްލިކަން ޕާޓީ ތަމްސީލުކުރާ މެމްބަރުންގެ ތެރެއިން ޕާޓީގެ ވިސްނުމާއި ދެކޮޅަށް ވޯޓުދެއްވާފައިވާ ހަމައެކަނި މެމްބަރަކީ ސެނެޓަރ ސޫޒަން ކޯލިންސްއެވެ. ކޯލިންސްއަކީ މިވަގުތު ސެނެޓުގެ ގޮޑިއަށް އިތިޚާބުގައި ވާދަކުރަވަމުން ގެންދާވާ ކެޑިޑޭޓެއްވެސްމެއެވެ. ކޯލިންސް ޑިމޮކްރަޓިކް ޕާޓީގެ ވިސްނުމާއި އެއްކޮޅަށް ވޯޓުދެއްވާފައިވަނީ، ރިޔާސީ އިންތިޚާބަށް ގާތްވެފައިވަނިކޮށް ސުޕްރީމް ކޯޓުގެ ފަޑިޔާރުކަމަށް ބޭފުޅަކު އައްޔަންކުރުމަކީ ރަގަޅުގޮތް ނޫންކަމުގައި ދެކެވަޑައިގަންނަވާތީއެވެ.
ބެރެޓަކީ ޓްރަމްޕްގެ ދައުރުގައި އޭނާ އެގައުމުގެ ސުޕްރީކޯޓަށް އައްޔަންކުރަން ނަން ހުށަހެޅުއްވި 3 ވަނަ ބޭފުޅާއެވެ. ބެރެޓް ސުޕްރީމް ކޯޓަށް އައްޔަންވެގެން ދިއުމުން އެމެރިކާގެ ސުޕްރީމް ކޯޓުގައި ކޮންޒަރވޭޓިވް ވިސްނުމުގެ ފަޑިޔާރުންގެ އަތްމައްޗަށް މެޖޯރިޓީ ލިބިގެންދާނެއެވެ. އަދި ރިޕަބްލިކަން ޕާޓީގެ ކޮންޒަވޭޓިވް ވިސްނުމަށް އިތުރު ފުރުސަތުލިބި، އެމެރިކާގެ ފެޑެރަލް ކޯޓުތަކަށް އައްޔަން ކުރާ ފަޑިޔާރުންނަކީ އުމުރަށް މަގާމުގައި ދެމިތިބޭ ބަޔަކަށް ހެދުމަށް ޓްރަމްޕްވެފައިވާ ކެމްޕޭން ވައުދު ފުއްދުމަށް އިތުރު ބާރަކަށްވެސް ވެގެންދާނެއެވެ.
ރިޕަބްލިކަން ޕާޓީގެ ގިނައަދަދެއްގެ ސެނެޓަރުން ހާޒިރުވި، ވައިޓް ހައުސްގައި ބެއްވުނު ހަފްލާއެއްގައި ހޯމަދުވަހު ބެރެޓްވަނީ ފަޑިޔާރުކަމުގެ ހުވާ ކުރައްވާފައެވެ.
އުމުރުން 48 އަހަރުގެ ބެރެޓް ސުޕްރީމް ކޯޓުގެ ފަޑިޔާރުކަމަށް އައްޔަން ކުރެވުމާއިއެކު، ސުޕްރީމް ކޯޓުގައި 6-3ގެ މެޖޯރިޓީއެއް ކޮންޒަރވޭޓިވް ވިސްނުމަށް ލިބިގެން ދާނެއެވެ. ނަތީޖާއެއްގެ ގޮތުން ކުރިޔަށް އޮތްތަނުގައި ސުޕްރީމް ކޯޓަށް ހުށަހެޅިގެންދާނެ ކަމަށް ބެލެވެ މުހިންމު ބައެއް މައްސަލަތަކަށް މި މެޖޯރިޓީގެ އަސަރު ކުރާނެކަމަށް ބެލެވެއެވެ. މީގެތެރޭގައި އެމެރިކާގެ ރައްޔިތުންނަށް އަތް ފޯރާފަށުގައި ސިއްޚީ ޚިދުމަތް ފޯރުކޮށްދިނުމަށް އެމެރިކާގެ ކުރީގެ ރައީސް ބަރަކް އޮބާމާ އެކުލަވާލެއްވި، އޮބާމާކެއަރގެ ނަމުން މަޝްހޫރުވެގެން ގޮސްފައިވާ ގާނޫނާމެދު ގޮތެއް ނިންމުމާއި އަދި މީގެ އިތުރުން ކުރިޔަށްއޮތް ރިޔާސީ އިންތިޚާބުގެ ނަތީޖާއާއިމެދު ޚިޔާލު ތަފާތުވުން އުފެދި މައްސަލަ ސުޕްރީމް ކޯޓާއި ހަމައަށް އަތުވެއްޖެ ހާލަތެއްގައި އެމައްސަލަވެސް ހިމެނެއެވެ.
ބެރެޓް ވެގެން ދިޔައީ އެމެރިކާގެ ތާރީޚުގައި އެންމެ ކުރު މުއްދަތެއްގައި ސުޕްރީމް ކޯޓުގެ ފަޑިޔާރުކަމަށް އިސްކުރެވިގެންދިޔަ ބޭފުޅާ ކަމުގައެވެ.
އެމެރިކާގެ ރިޔާސީ އިންތިޚާބަށް މަދު ދުވަސްކޮޅަކަށް ވެފައިވަނިކޮށް ބެރެޓް ފަޑިޔާރުކަމަށް އިސްނުކުރުމަށް ޑިމޮކްރަޓިކް ޕާޓީން ވަނީ ގޮވާލާފައެވެ. ސަބަބަކީ، ރައްޔިތުން އިންތިޚާބުކުރާ އާރައީސަށް މިމަގާމަށް ނަންހުށަހެޅުއްވުމުގެ ފުރުސަތު ދިނުމަކީ އެންމެ ރަގަޅުގޮތް ކަމުގައި އެޕާޓީން ދެކޭތީއެވެ.
ކުޑަ އަޢުލަބިއްޔަތަކުން އެމެރިކާގެ ސެނެޓުގައި މެޖޯރިޓީ އޮންނަނީ ރިޕަބްލިކަން ޕާޓީއަށެވެ.
