ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ނުރައްކާތެރި ޓެރެރިސްޓް ހަމަލާއަށް 100 ދުވަހަށް ވުރެ ގިނަ ދުވަސް ވެފައިވާއިރު، އެމަނިކުފާނަށް ރައްކާތެރިކަން އޮތްކަމުގެ ޔަގީންކަން މިހާތަނަށްވެސް ދެވުނު އެއްވެސް އިދާރާއެއް އޮތްތޯ ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ސުވާލު އުފައްދައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ވަހީދު ވިދާޅުވީ މަޖިލިސް ރައީސް މުހައްމަދު ނަޝީދު މަޖިލީހަށް ފޮނުއްވި ސިޓީން ގިނަ ސުވާލުތަކެއް އުފެދޭކަމަށެވެ. އެމަނިކުފާނަކީ ރައީސްކަން ކޮށްފައިވާ މީހަކަށް ހިމާޔަތާއި، ރައްކާތެރިކަމާއި އިނާޔަތް ދިނުމަށް ޤާނޫނު ކަނޑައަޅާފައިވާ ބޭފުޅަކަށްވާއިރު، އެމަނިކުފާނަށް ރައްކާތެރިކަން ދެވުނީ ކިހާވަރަށްތޯ ސުވާލު އުފެދޭކަމަށެވެ. އެމަނިކުފާނަށް ހަމަލާ ދިންތާ 100 އަށްވުރެ ގިނަ ދުވަސް ވެގެންދިޔައިރު އެމަނިކުފާނުގެ ހާލު ބަލާލައި، ރައްކަތެރިކަން އޮތް މިންވަރާ ގުޅޭގޮތުން ވާހަކަ ދެއްކުމަށް ގުޅާލީ ކޮން އިދާރާއަކުންތޯވެސް ވަހީދު ވަނީ ސުވާލު އުފައްދަވާފައެވެ.

ސުވާލަކީ ދައުލަތުގެ ކޮން އިދާރާއަކުންތޯ، ޔަގީކަންދިނީ އެމަނިކުފާނަށް ގުޅުއްވާފަ އެމަނިކުފާނަށް ރައްކާތެރިކަމުގެ ޔަގީންކަން އޮތްކަމުގެ ޔަގީންކަން ދިނީ، ޤާނޫނީ ޒިންމާއެއްގެ ވާހަކަ މިދައްކަނީ. ހެޔޮކަމުން ކޮށްލާ ކަމެއްގެ ވާހަކައެއް ނޫން މިދައްކަނީ. ހަމައެކަނި ހިމާޔަތް ދިނުމެއްނޫން، އިނާޔާތް ދިނުމެއްނޫން. ގަދަރާއި އިއްޒަތްވެސް ދޭންޖެހޭ. ކޮން އިދާރާއެއްގެ ކޮން ބޭފުޅެއްތޯ 100 ދުވަސް ވެގެންދިޔައިރު އެމަނިކުފާނަށް ގުޅުއްވައި އެމަނިކުފާނުގެ ހާލު އަހާ އޮޅުންފިލުވީ.

– ވަހީދު ވިދާޅުވިއެވެ.

6 މެއި ގައި ރައީސް ނަޝީދަށް ދެވުނު ހަމަލާއާއި ގުޅިގެން ތަހުގީގް ނިންމައި ހަމަލާގައި ބައިވެރިވި އެންމެން ހައްޔަރުކޮށް ތަހުގީގް ނިމުމުން ނޫނީ ރާއްޖެ ވަޑައި ނުގަތުމަށް މަޖިލިސް ރައީސް، ރައީސް ނަޝީދުވަނީ ނިންމާފައެވެ. އެމަނިކުފާނު މިއަދު މަޖިލީހަށް ފޮނުވި ސިޓީގައި ބުނެފައިވަނީ މަނިކުފާނަށް ދިން ޙަމަލާ ރާވައި ހިންގި ފަރާތްތަކުގެ ތަޙްޤީޤު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނެފައިވާކަމެވެ. އެ ތަޙްޤީޤު ނިމި، އެކަން ރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރިން ރާއްޖެ ދިޔުމަކީ އެމަނިކުފާނުގެ އާއިލާއާއި، ހެޔޮއެދޭ އެތައް ބަޔަކާއި ޚުދު އެމަނިކުފާނުވެސް ޖެހިލުންވާ ކަމެއްކަމަށެވެ.

މަޖިލީހުގެ ރައީސް ވަނީ ޗުއްޓީގެ މުއްދަތު އިތުރުކޮށްދެއްވައި، ރާއްޖެއިން ބޭރުގައި ދިރިއުޅުމަށް ހިތް ޚަލާޞްކުރައްވައި، އެފުރުސަތު ފަހިކޮށްދެއްވުމަށް މަޖިލީހުގެ ކިބައިން އެދިވަޑައިގެންފައެވެ. އަދި ރާއްޖެއިން ބޭރުގައި ހުންނައިރު މަޖިލީހުގެ އެންމެހައި ކަންކަން ޤާނޫނު އަސާސީ އާއި މަޖިލީހުގެ ގަވާއިދުގައިވާ ގޮތުގެމަތިން މަޖިލީހުގެ މެންބަރުންގެ އިރުޝާދުގެ ދަށުން މަޖިލީހުގެ ނައިބު ރައީސް އިސްވެ ހުންނަވައި މަޖިލީހުގެ އިދާރާއިން ހިންގާނެކަމީ ހިތުގައި އެއްވެސް ޝައްކެއް އުފެދޭކަމެއްނޫން ކަމަށް ވަނީ ވިދާޅުވެފައެވެ.

މަޖިލީހަށް ފޮނުއްވި ސިޓީއަކީ ސަރުކާރާއި ދައުލަތުގެ އިދާރާއަކާ ނުރުހިގެން ފޮނުވި ސިޓީއެއް ނޫންކަމަށްވެސް މަޖިލީހުގެ ރައީސް ވަނީ ވިދާޅުވެފައެވެ. ރާއްޖެއިން ބޭރުގައި ހުންނައިރު ރައްޔިތުންގެ މަޖިލީހަށާއި ދިވެހި ދައުލަތަށް ޚިދުމަތްކުރުމުގައި މަސައްކަތް ކުރިއަށް ގެންދާނެކަމަށާއި، ޚާއްޞަ ގޮތެއްގައި އިންޓަރޕާލަމެންޓަރީ ޔޫނިއަންއާއި، ކޮމަންވެލްތު ޕާލިމަންޓަރީ އެސޯސިއޭޝަން މެދުވެރިކޮށް ހިންގާ މަސައްކަތްތަކާއި މޫސުމަށް އަންނަ ބަދަލުތަކާ ގުޅޭގޮތުން ކްލައިމެޓް ވަލްނަރަބަލް ފޯރަމްއާއެކު މަސައްކަތްތައް ކުރިއަށް ގެންދާނެ ކަމަށް މަޖިލީހުގެ ރައީސް ވަނީ ވިދާޅުވެފައެވެ.