މުސްލިމުންގެ މާތް ޙަރަމްފުޅު މައްކާގެ މަސްޖިދުލްޙަރަމްގައި އުމްރާ ވުމުގެ ފުރުސަތު އަންނަ މަހު އެކަކުން ފެށިގެން ސައުދީން ބޭރު މީހުނަށް ހުޅުވާލަން ނިންމައިފިއެވެ. ނަމަވެސް ގައުމުތަކަށް ފުރުސަތު ދިނުމަށް ހަމަޖެހިފައި ވަނީ އެގައުމެއްގެ ކޯވިޑް-19ގެ ހާލަށް ރިޢާޔަތްކޮށްފައެވެ.
މިމަހުގެ 4 ވަނަދުވަހު ސައުދީން އެގައުމުގައި ދިރިއުޅޭ މީހުނަށް އުމްރާ ވުމަށް ޙަރަމްފުޅު ހުޅުވާލިއިރު، އެގައުމުން ބުނީ ޙަރަމްފުޅުގައި އުމްރާވުމާއި ނަމާދުކުރުމުގެ ފުރުސަތު ދިނުން ވަކި އުސޫލެއްގެ ދަށުން 4 ފިޔަވައްސަކަށް ބަހާލައިގެން ކުރިއަށް ގެންދާނެކަމަށެވެ. އެގޮތުން ސައުދީން ބޭރުގެ މީހުނަށް އުމްރާވުމަށް ހުޅުވާލަނީ 3 ވަނަ ފިޔަވަހީގެ ދަށުންނެވެ.
ސައުދީ ގެޒެޓުގައި ވާގޮތުން އަންނަ މަހު އެކަކުން ފެށިގެން ފުރަތަމަ ފުރުސަތު ދޭނީ އުމުރުން 18 އަހަރާއި 50 އަހަރާ ދެމެދުގެ މީހުނަށެވެ. އަދި އުމްރާވުމަށް އެ ގައުމަށް ދާމީހުން 3 ދުވަހުގެ ކަރަންޓީނު ފުރިހަމަ ކުރަންޖެހޭނެއެވެ. އަދި ސައުދީގެ ކަމާގުޅޭ އިދާރާތަކުން އެކުލަވާލާފައިވާ ގައިޑް ލައިން ތަކުގައި ވާގޮތުން އުމްރާ ވުމަށް އެގައުމަށް ދާ ފަރާތްތަކުން ފުރުމުގެ 72 ގަޑީރުގެ ތެރޭ ނަގާފައިވާ ސާމްޕަލެއްގެ ޕީސީއާރު ޓެސްޓު ނަތީޖާ ހުށަހަޅަން ޖެހޭނެއެވެ.
މިފިޔަވަހީގައި ދޭ ލުޔާއެކު ދުވާލަކު 20،000 މީހުނަށް އުމްރާވުމުގެ ފުރުސަތު އަދި ދުވާލަކު 60،000 މީހުނަށް ޙަރަމްފުޅުގައި ނަމާދުކުރުމުގެ ފުރު ދިނުމަށް ވަނީ ހަމަޖެހިފައެވެ. ކުރިންވެސް ހަމަޖެހިފައި އޮތްގޮތުން ނަމާދުކުރުމަށް ދާ މީހުނަށް ކައުބާ ވަށައިގެން ތޮވާފް ކުރުމަށް ހާއްސަކޮށްފައިވާ ބައި، މަތާފަށް ނުފޭބޭނެއެވެ. އެސަރަހައްދަށް ވަދެވޭނީ ހަމައެކަނި އުމްރާވެރިންނަށެވެ. އަދި ތޮވާފްކުރާ މީހުން ތޮވާފްކުރަން ޖެހޭނީ ކައުބަތުﷲ ގެފުޅުގެ ވަށައިގެން ހަރުކޮށްފައިވާ ރިންގުގެ ބޭރުންނެވެ.
ކޮވިޑް-19ގެ ސަބަބުން ޙަރަމްފުޅު ބަނދުކޮށްފައި އޮތުމަށްފަހު މިމަހުގެ 4 ވަނަދުވަހު ޙަރަމްފުޅު ހުޅުވާލީ 7 މަސް ދުވަސް ފަހުންނެވެ.
