ބާސެލޯނާގެ އެންމެ ކާމިޔާބު ކުޅުންތެރިޔާ އަދި ކެޕްޓަން ލައިނަލް މެސީ ފްރާންސްގެ ޕީއެސްޖީއަށް ސޮއިކުރަން އެއްބަސްވެއްޖެއެވެ.
ރިޕޯޓްތައް ބުނާގޮތުން މެސީ ސޮއިކުރަން އެއްބަސްވެފައިވަނީ 2 އަހަރގެ ކޮންޓްރެކްޓެއްގެ ދަށުންނެވެ. ދުނިޔޭގެ ތާރީހުގައިވެސް އެތުލީޓަކަށްދޭ އެންމެ ބޮޑު މުސާރައަށް މެސީ ޕީއެސްޖީއަށް ބަދަލުވުމަށް މިހާރުވަނީ އެއްބަސްވެފައެވެ.
ބެލެވޭ ގޮތުގައި އެއްބަސްވުމުގައި ސޮއި ކުރަން މިއަދުގެ ވަގުތެއްގައި މެސީ ޕެރިސްއަށް ދަތުރުކުރާނެއެވެ. މެސީ ޕީއެސްޖީއަށް ބަދަލުވެއްޖެ ނަމަ އޭނާ ކުޅޭނީ ގާތް ރަހުމަތްތެރިޔާ ނޭމާ އާއި އާޖެންޓީނާގެ ޑިމާރިއާގެ އިތުރުން އެމްބާޕޭއާ ރާމޯސް އާއި އެކުގައެވެ.
މިދިޔަ އަހަރުގެ ސީޒަން ނިމުމާއެކު ބާސެލޯނާ ދޫކޮށްދާން ބޭނުންވާކަމަށް މެސީ ބުނި ނަމަވެސް ބާސެލޯނާއާއެކު ހަދާފައިވާ އެއްބަސްވުމުގެ ދަށުން އެއް އަހަރު ބާކީ އޮތް އިރު، މެސީ ކުލަބް ބަދަލް ކުރާނަމަ، ޓްރާންސްފަރ ފީއެއްގެ ގޮތުގައި 624 މިލިއަން ޑޮލަރު ދައްކަން ޖެހޭކަމަށް ބާސެލޯނާ އައި ސްޕެނިޝް ލީގުން ބުނުމާއެކު، ފަހުން މެސީ ވަނީ ބާސެލޯނާގައި މަޑު ކުރުމަށް ނިންމާފައެވެ.
ބާސެލޯނާގެ ކެޕްޓަން ލައިނަލް މެސީ 21 އަހަރަށް ފަހު އެކުލަބް ދޫކޮށްލާފައިވާއިރު، އޭނާވަނީ ބާސެލޯނާއަށް ކުޅެދިން 778 މެޗްގައި 672 ގޯލް ޖަހާދީފައެވެ. ދުނިޔޭގެ މޮޅު ކުޅުންތެރިޔާގެ މަގާމް 6 ފަހަރު ހޯދާފައިވާ މެސީވަނީ ބާސެލޯނާއާއެކު ކުލަބް ލެވެލްގައި ހޯދެން ހުރި ހުރިހާ ކާމިޔާބީއެއް ވަނީ ހޯދާފައެވެ.
