ދަރިޔަކު ލިބުމަކީ މި ދުނިޔެމަތިން މަޔަކާއި ބަފަޔަކަށް ލިބޭނެ އެންމެ ބޮޑު ނިއުމަތްކަން ޔަގީނެވެ. ދަރިންނަކީ މި ދުނިޔެމަތީގައި އިންސާނަކަށް ލިބޭނެ އެންމެ ބޮޑު ހިތްހަމަޖެހުމެވެ. ކުޑަ ކުއްޖަކު އާއިލާ އަށް އިތުރު ވުމަކީ މުޅި އާއިލާ އަށް ލިބޭ އުފަލެކެވެ. މުޅި އާއިލާ އަށް ލިބޭ އާރޯކަމެކެވެ. ދަރިން ހެޔޮ ހާލުގައި ލެެއްވުމަށް އެދި ދުއާކޮށް، ދަރިފުޅު އުފަންވުމުގެ ކުރިން އެކަމަށް މައިންބަފައިން ވަރަށް ތައްޔާރީތައް ވެއެވެ.
ނ. އަތޮޅު މަނަދޫ އަށް ނިސްބަތްވާ ފަތިމަތު ރިޝްފާ އާއި ސ. ފޭދޫ އަލީ ޖަވާދު ވެސް އެ ދެ މަފިިރިންގެ ތިންވަނަ ދަރިފުޅު ލިބުނު އިރު ތިބީ ފޮނި އުންމީދުގައެވެ. ތާރާ ބިންތު އަލީ ޖަވާދު ދުނިޔެއަށް ފުރަތަމަ ނޭވާލީ މިދިޔަ އަހަރުގެ މޭއި މަހުގެ 10 ވަނަ ދުވަހު ސްރީލަންކާއަށެވެ.
ރިޝްފާ ތާރާ އަށް ބަލިވެ އިން އިރުވެސް ޑޮކްޓަރުން ބުނަމުން ދިޔައީ ދަރިފުޅުގެެ ހާލު ރަނގަޅު ކަމަށެވެ. ބަނޑު ބޮޑު އިރު ދިމާވި ހަމައެކަނި މައްސަލައަކީ އިންފެކްޝަން މައްސަލައެއް ކަަމަށާއި، އެކަމުން ތާރާއަށް އެއްވެސް އަސަރެއް ނުކުރާ ކަމަށް ޑޮކްޓަރުންނާއި ހަވާލާދީ ތާރާގެ މަންމަ ރިޝްފާ ބުންޏެވެ.
އެހެން ނަމަވެސް، އަށް މަހުގައި ތާރާ އުފަން ވެފައިވާއިރު، އާއިލާއަށް މޮޅިވެރިކަން ލިބިގެން ދިޔައީ، ދަރިފުޅުގެ ހާލު ރަނގަޅު ކަމަށް ބުނެފައި ވަނިކޮށް އެކަން އެގޮތަށް ނުވުމުންނެވެ. ތާރާ ވިހެއިއިރު، ތާރާގެ ކަނާތް ފަރާތުގެ ތިން ނާރަކަށް ވަނީ މައްސަލައެއް ޖެހިފައެވެ.
"ވިހެއީއްސުރެ ބޭބީއަކީ ބަލި ކުއްޖެއް. އުފަންވީންސުރެންވެސް ނާރުގެ މައްސަލަ ހުންނާނެ ކުއްޖާގެ ކަނާއަތް ވޯކް ނުކުރާނެ އޭރަކު."
– ރިޝްފާ
ނަމަވެސް ހަމަސް ދުވަހު އެތައް ތެރަޕީީ ސެޝަނެއް އަދި އެހެން ފަރުވާތައް ކޮށްގެން ތާރާގެ ކަނާއަތް ކޮންމެެވެސް މިންވަރަކަށް ރަނގަޅުވިއެވެ. އެ އާއިލާއިންވެސް ދިރިިއުޅުން މަނަދޫއަށް ބަދަލުކުރި ކަމަށާއި، އޭރު ތާރާއަށް ހަ މަސް ފުރިއްޖެ ކަމަށް ރިޝްފާ ބުންޏެވެ.
އޭގެ ފަހުން އަނެއްކާ ވެސް ތާރާގެ ހާލު ގޯސްވި ކަމަށް ތާރާގެ ބައްޕަ އަލީ ޖަވާދު ކިޔައިދިނެވެ. އޭރު ޑޮކްޓަރުން ބެލި ބެލުމުން ތާރާއަށް ޓީބީ ޖެހިފައިވާ ކަމަށް ލަފާ ކުރުމުން އާއިލާއިން ވަނީ ތާރާ ގޮވައިގެން އިންޑިއާއަށް ގޮސް ދައްކާފައެވެ. އިންޑިއާއިން ބެލި ބެލުމުން ތާރާއަށް ޖެހިފައިވަނީ ޓީބީ ނޫން ކަން އާއިލާއަށް އެނގުން އެއީ އާއިލާއަށް ލިބުނު އުފާވެރިކަމެކެވެ.
އެ އުފާވެރިކަމުގައި އެދެމަފިރިން ތިބި ނަމަވެސް، ތާރާގެ ޓެސްޓްތަކުން އަނެއްކާ ވެސް އެކުޑަ އާއިލާއަށް ވަނީ މޮޅިވެރިކަން ލިބިފައެވެ. އެއީ ދެމަސް ފަހުން ލިބުނު ޓެސްޓް ތަކުގެ ނަތީޖާތަކުން ތާރާގެ "ޖެނެޓިކް" މައްސަލައެއް ހުރިކަން އެނގުމެވެ. އެކަން އެނގިފައިވަނީ މީގެ ދެހަފްތާ ދުވަސް ކުރިންނެވެ.
"އެއަށް މިކިޔަނީ ވިއެޑްމޭން ސްޓެއިނާ ސިންޑްރޯމް. މާނައަކީ ވާރުތާވާ ބައްޔެކޭ. ދުނިޔެއިން ވަރަށް މަދުން ނޫނީ ނުފެން ބައްޔެއް. ވެދާނެ އެއީ ބައްޕަގެ ފަރާތުގެ ކާފައިންގެ ކާފައިންގެ ފަރާތުން އައި އެއްޗަކަށް ވެސް."
– ޖަވާދު
ޖަވާދު ބުނީ، އެ ބަލީގެ ސަބަބުން ތާރާ ބޮޑެއް ނުވާނެ ކަމަށާއި ބަރުދަނެއް ވެސް އިތުރު ނުވާނެ ކަމަށެވެ. "މީގެ ސަބަބުން ކުއްޖާގެ ސިކުނޑި އަދި ކިޑްނީ އަދި ލިވާގެ މައްސަލަތައް ދިމާވާނެ ކަމަށް އަދި މިހާރު ވެސް ނުވާކަމެއް ނޭނގޭ ކަމަށް ޑޮކްޓަރުން ވިދާޅުވަނީ" ޖަވާދު ބުންޏެވެ.
ތާރާގެ އެފަދަ ބައްޔެއް ހުރުމާއި ގުޅިގެން މިވަގުތު ވެސް ތުއްތު ތާރާއަށް ލިބިފައި ހުރި ގެއްލުން ބުނާކަށް ނޭނގޭ ކަމަށާއި އާއިލާއިން ބޭނުންވަނީ ވީއެންމެ އަވަހަށް ބޭރަށް ފުރަން ކަމަށް ޖަވާދު ބުންނެވެ. އަދި ފުރުމަށް އާސަންދަ ހަމަޖެހި މި މަހުގެ 8 ވަނަ ދުވަހު މާލެ ގޮސް 12 ވަނަ ދުވަހު އިންޑިއާއަށް ފުރަން އާއިލާއިން އަންނަނީ ތައްޔާރު ވަމުންނެވެ. އެހެން ނަމަވެސް އަދި އެންސްޕާއިން އެއްވެސް ކަމެއް ހަމަ ނުޖެހޭ ކަމަށް ޖަވާދު ބުންޏެވެ.
ތާރާގެ ކުޑަކުޑަ އާއިލާއިން އާއްމުންގެ އެހީއަށް އެދިފައިވަނީ ތާރާގެ ސިއްހި ފަރުވާއަށް ބޭރަށް ދާއިރު، އެތަނުގައި ހޭދަވާނެ ދުވަހެއް ނޭނގޭތީއާއި މާލީ ގޮތުން އާއިލާއަށް ދަތިތަކެއް ދިމާވެފައިވާތީއެވެ.
އެޑިޓަރުގެ ނޯޓް: މިއީ ތާރާގެ އާއިލާގެ ފަރާތުން ފޯރުކޮށްދިން ލިޔުމެކެވެ. ލިއުން ޝާއިޢުކޮށްފައިވަނީ އާއިލާގެ ފަރާތުން ފޮނުވިގޮތަށް އެއްވެސް އުނި އިތުރެއް ނުގެނެސްކަން ވެސް ފާހަގަކޮށްލަމެވެ. ތާރާ އާއި ގުޅޭގޮތުން އިތުރު މައުލޫމާތު ސާފުކުރުމަށް 7454354 ނަންބަރު ފޯނަށް ގުޅުމަށް އާއިލާއިން އެދެއެވެ.
