މާލެ ސަރަހައްދުގައި ނަމާދުގެ ޖަމާއަތުގައި ގައިދުރުކުރުމާއި ކޮންމެ ނަމާދެއްގައި ގުނޫތު ނާޒިލާ ކިޔުން ނިމުމަކަށް ގެނެސްފިއެވެ.
ރާއްޖޭގައި ކޯވިޑުގެ ހާލަތު ގޯސްވުމުން އެޅި ފިޔަވަޅުތަކުގެތެރެއިން މާލޭގެ މިސްކިތްތަކުގައި ޖަމާއަތުގައި ނަމާދުކުރުން ހުއްޓާލާފައި އޮތުމަށްފަހު، ގައިދުރުކޮށް މިސްކިތުގައި ޖަމާޢަތް ހެދުމަށް ހުއްދަދީފައި ވަނީ މިދިޔަ މަހުން ފެށިގެންނެވެ. އަދި ކޮންމެ ފަރުޟު ނަމާދެއްގައި ގުނޫތު ނާޒިލާ ކިޔުމަށް މޭ މަހު މިނިސްޓްރީން އަންގާފައި ވެއެވެ.
ރާއްޖޭގައި ކޯވިޑްގެ ހާލަތު އަނެއްކާވެސް ރަނގަޅުވުމާއެކު ގިނަ ލުއިތަކެއް ދެމުންގެންދާއިރު އެފަދަ ލުއިތަކުގެ ތެރެއިން އާންމު ހާލަތުގައި ޖަމާޢަތް ހަދާއުސޫލުން ޖަމާޢަތް ހެދުމާއި ގުނޫތު ނާޒިލާ ކިއުން ވަގުތީގޮތުން މެދުކަނޑާލުމަށް އިސްލާމިކް މިނިސްޓރީން ރޭ ވަނީ އަންގާފައެވެ.
އެގޮތުން މި އުސޫލަށް އަމަލުކުރަން ފަށާފައި ވަނީ ރޭގެ ފަތިސްނަމާދުން ފެށިގެންނެވެ.
މިނިސްޓްރީން ނެރުނު ބަޔާނެއްގައި ބުނެފައި ވަނީ ޖަމާއަތުގެ ނަމާދުތަކުގައި ގުނޫތު ކިޔުން މިވަގުތަށް ހުއްޓާލި ނަމަވެސް، ފަރުޟު ނަމާދުތައް ބަރާބަރަށް އަދާކޮށް، ސުންނަތް ނަމާދު ގިނަކޮށް، ކީރިތި ގުރްއާން ކިޔަވައި، އިސްތިޣްފާރު ކުރުމަށް ވަނީ ނަސޭހަތްތެރި ވެފައެވެ. އަދި ބަލިމަޑުކަމުން އަވަހަށް ސަލާމަތް ކޮށްދެއްވުމަށާއި ގައުމުގެ އިގުތިސޯދީ ހާލަތު ރަނގަޅު ކޮށްދެއްވުން އެދި ގިނަގިނައިން ދުއާކޮށް އުޅުމަށް މިނިސްޓްރީން ވަނީ ހުރިހާ ރައްޔިތުންނަށް އިލްތިމާސްކޮށްފައެވެ.
މީގެ އިތުރުން މިސްކިތްތަކުގައި އުޅޭ ވަގުތުތަކުގައިވެސް މާސްކްއެޅުމާއި އެޗްޕީއޭގެ އެންގުންތަކަށް ބޯލެނބުމަށް އިސްލާމިކް މިނިސްޓްރީން އިލްތިމާސްކޮށްފައިވެއެވެ.
