ރާއްޖޭގައި ހިއުމަން ޓްރެފިކިން ހިންގަނީ އިމިގްރޭޝަން މުވައްޒަފުން ކަމަށް ތިމަރަފުށީ ދާއިރާގެ ކުރީގެ މެމްބަރު މުޙައްމަދު މުސްތަފާ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިލަންދޫ ދާއިރާގެ މެންބަރު އަލީ ރިޒާގެ ރިޒް ކުންފުނިން އޮޅުވާލައިގެން ބިދޭސީން ރާއްޖެ އެތެރެކުރުމާއި މުވައްޒަފުންނަށް މުސާރަ ނުދީ މަސައްކަތް ކުރުވި މައްސަލައިގައި ރިޒާގެ މައްޗަށް ދަޢުވާ ކުރުމާގުޅިގެން މުސްތަފާ ވިދާޅުވީ ހިއުމަން ޓްރެފިކިންގެ މައްސަލާގައި ފުރަތަމަ ދައުވާކުރަންވީ އިމިގްރޭޝަން މުވައްޒަފުންނަށް ކަމަށެވެ.
Dhauvaa kuran vee Furathama Immigtion muazifun ge mahchah, Human trafficking Raajjeyga hinganee Immigration Muazifun. https://t.co/9J1Z3YO3vW
— Mohamed Musthafa (@Thimarafushi) August 6, 2021
ގަވާއިދާ ހިލާފަށް ބޭރުގެ މަސައްކަތްތެރިން އެތެރެކޮށް އެކަމުން ބޮޑެތި ފައިދާތަކެއް ނަގާކަމަށް އިމިގްރޭޝަންގެ އެކިއެކި ލެވެލްތަކުގެ ބޭފުޅުންނަށް މީގެކުރިންވެސް ވަނީ ގިނަބަޔަކު ތުހުމަތުކޮށްފައެވެ. އޭގެތެރޭގައި މީގެކުރިން އިމިގްރޭޝަންގެ އެންމެ އިސް މަޤާމުތަކުގައި ތިއްބެވި ބޭފުޅުންނަށްވެސް ގިނަބަޔަކު ތުހުމަތު ކޮށްފައިވެއެވެ.
ރިޒާގެ މައްޗަށް މީހުން ޓްރެފިކް ކުރުމުގެ ކުށުގެ ދައުވާ އަދި އަދުލު އިންސާފު ގާއިމު ކުރުމަށް ހުރަސްއެޅުމުގެ ކުށުގެ ދައުވާކޮށް ކްރިމިނަލް ކޯޓަށް ހުށަހަޅާފައިވެއެވެ. އޭގެ އިތުރުން، ށ. މިލަންދޫ، ރެޑްރޯސް، ނަސްރުﷲ އުސްމާން އަދި ނ. މާފަރު، ބްލާސަމްގެ، ހަސަން އުމަރުގެ މައްޗަށް މީހުން ޓްރެފިކް ކުރުމުގެ ކުށުގައި ބައިވެރިވުމުގެ ދައުވާ ކޮށްފައިވެއެވެ.
ރިޒް ކުންފުނިން ތަރައްޤީކުރަމުންގެންދާ ބޮޑުފިނޮޅުގައި މަސައްކަތްކުރާ ބިދޭސީންނަށް ހަ މަސްވަންދެން މުސާރަ ނުދޭ މައްސަލައެއްވެސް ފެންމަތިވެފައިވާއިރު، ބޮޑުފިނޮޅުގައި ގެންގުޅުނު ބިދޭސީންނަށް މަޖުބޫރުކޮށް އެކްސްޕްލޮއިޓޭޝަންގެ އަމަލުތަކެއް އެމީހުންނާމެދު ހިންގާފައިވާކަން ފުލުހުން ވިދާޅުވެފައިވެއެވެ. ބިދޭސީން އެރަށަށް ގެންގޮސް އެމީހުން ލައްވާ މަސައްކަތްކުރުވި ރިޒް ކުންފުނިން މީހުން ޓްރެފިކް ކުރުމަށް މަގުފަހިވާ ގޮތަށް އަމަލުކޮށްފައިވާއިރު، ބިދޭސީންގެ ފަރާތުން އެކުންފުނިން ދައުލަތަށް ދައްކަންޖެހޭ ފީއާއި ފައިސާ ނުދައްކާ ކަން ވެސް ވަނީ ހާމަވެފައެވެ. އޭގެ އިތުރުން އެ ބިދޭސީންގެ ހައްގުތައް ނިގުޅައިގެންފައިވާ ކަމަށް ބެލެވޭނެ ކަންކަން ކޮށްފައިވާ ކަމަށާއި އެކަމުގެ ތުހުމަތު ރިޒް ކުންފުނީގެ މައްޗަށް ކުރެވޭކަން ފުލުހުން ވަނީ ހާމަ ކުރައްވާފައެވެ.
