ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރުގެ ޕާސްޕޯޓް ހިފަހައްޓައިފިއެވެ.
މައުލޫމާތު ލިބިފައިވާ ގޮތުގައި ޖާބިރުގެ ޕާސްޕޯޓް ހިފަހައްޓާފައިވަނީ އޭނާގެ މުވައްޒިފަކަށް މުސާރަ ނުދިން މައްސަލައެއްގައި ސިވިލް ކޯޓުން ކޮށްފައިވާ ހުކުމަކާއި ގުޅިގެންނެވެ. ޖާބިރު ވަނީ މިދިޔަ ހަފްތާގައި ދެފަހަރެއްގެ މަތީން ފުރަން އެއާޕޯޓަށްވެސް ގޮސްފައެވެ. ނަމަވެސް ޕާސްޕޯޓް ހިފަހައްޓާފައި އޮތުމުން ޖާބިރަށް ވަނީ ފުރޭގޮތް ނުވެފައެވެ. އޭނާގެ ޕާސްޕޯޓް ހިފަހެއްޓީ ކޯޓު އަމުރެއްގެ ދަށުންނެވެ.
ޖާބިރުވަނީ މިކަމާއި ހިންހަމަ ނުޖެހިގެން މިއަދު މަޖިލިސް ކައިރީގައި މުޒާހަރާވެސް ކޮށްފައެވެ. ޖާބިރު ބުނަމުންދިޔައީ އޭނާ މުޒާހަރާ ކުރަމުންދަނީ ޤާނޫނު އަސާސީން ލިބިދީފައިވާ ހައްގުގެ ބޭނުން ކުރުމުގެ ގޮތުންކަމަށެވެ. ޖާބިރު މުޒާހަރާ ކުރަމުންދާއިރު، އޭނާގެ އަނބިކަނބަލުން ދިޔާނާ ސައީދު ވަނީ އޭނާ ތެދުކުރުމަށް މަސައްކަތް ކޮށްފައެވެ.
ގިނަ އިރުތަކެއް ނުވަނީވެސް ދިޔާނާވަނީ ޖާބިރާއި ވާހަކަ ދައްކައި އޭނާ ގޮވައިގެން ގޮސްފައެވެ. ޖާބިރަކީ އެކި ހާލަތްތަކުގައި މަޖިލިސް ތެރޭގައާއި، މަޖިލީހުން ބޭރުގައިވެސް މުޒާހަރާ ކުރާ ވަރަށް ތަފާތު މެމްބަރެކެވެ. ޖާބިރުވަނީ މީގެ ދެ ދުވަހެއްކުރިން ސަރުކަރާއިއެކު ކޯލިޝަން ހަދަން ބޭނުންވާކަމަށްވެސް ވިދާޅުވެފައެވެ.
