ކުރީގެ ރައީސް އަބްދުﷲ ޔާމީނަށް ކުރަމުންދާ ޖެއްސުންތަކާއި، އުދަނގޫތަކުން މިސަރުކާރު ނޭވާހޮޅިއަށް އެޅިފައިވާ މިންވަރު ހާމަވާކަމުގައި ކުރީގެ އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ނޫސްވެރިޔާ އަހުމަދު ރިޟުވާނު ޢަބުދުﷲ ގެއްލުވާލި މައްސަލާގައި ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ގެއްލިފައިވާ މީހުންނާއި މަރުތައް ބަލާ ކޮމިޝަނަށް ހާޒިރުވުމަށް މިއަދު ވަނީ އަންގާފައެވެ. މަރުކޮމިޝަންގެ މެމްބަރަކު ވިދާޅުވީ ރައީސް ޔާމީން ކޮމިޝަނަށް ހާޒިރުވުމަށް ދަންނަވާފައިވަނީ މ.ޝަނިންސްޓަރ އަހުމަދު ރިޞުވާން އަބްދުﷲ ގެއްލުވާލި މައްސަލާގައި ކޮމިޝަނުން ކުރަމުންދާ ތަހުގީގުގައި ސުވާލު ކުރުމަށްކަމަށެވެ. ރައީސް ޔާމީން ހާޒިރު ކުރުމަށް ހަމަޖެހިފައިވަނީ މިމަހުގެ 3 ވަނަ ދުވަހުއެވެ.
މިކަމާއި ގުޅިގެން ޕީޕީއެމް، ޕީއެންސީގެ ލީޑަރޑިޕްގެ ގިނަ ބޭފުޅުންގެ ފާޑުކިޔުން ވަނީ ސަރުކާރަށް އަމާޒުވެފައެވެ. ޕީއެންސީގެ ނާއިބް ރައީސް އަދި ކުރީގެ އިކޮނޮމިކް މިނިސްޓަރ މުހައްމަދު ސައީދު ވިދާޅުވީ ރައީސް ޔާމީނަކީ މިސަރުކާރުން ދައްކާ ބިރަކަށް ފަސްޖެހި، ޤައުމު ދޫކޮށް ފިލަން ވަޑައިގަންނަވާނެ ބޭފުޅެއް ނޫންކަމަށެވެ. ރައީސް ޔާމީނަކީ އެއަށްވުރެ މާ ހިއްވަރުހުރި ކެރޭ ލީޑަރެއްކަމަށް ސައީދު ވިދާޅުވިއެވެ.
މިފެންނަނީ ސަރުކާރު ނޭވާހޮޅިއަށް އެޅެމުންދާތަން. ރައީސް ޔާމީން އަކީ ރައީސް ޞާލިހު އާއި، އޭނާގެ ބައިވެރިން ދައްކާހާ ބިރަށް، ޤައުމު ދޫކޮށް ފިލަން ވަޑައިގަންނަވާނެ ބޭފުޅުންނެއްނޫން! ރައީސް ޞާލިހުއަށް އެނގިވަޑައިގަންނަވަންވީ އިންތިޚާބުގައި ވޯޓުލާނީ ބޭރު ރައްޔިތުން ނޫންކަން.
– ސައީދު ވިދާޅުވިއެވެ.
މަރުކޮމިޝަނަށް ރައްޔިތުން ކުރާ އިތުބާރު ގެއްލި، ކޮމިޝަނާއި މެދު ރައްޔިތުން ސުވާލު އުފެއްދުމުން އައްޑަނައަކާށް ރައީސް ޔާމީން ހައްދަވާފައިވާކަމަށް ރައީސް ޔާމީންގެ ޤާނޫނީ ވަކީލް އަދި ކުރީގެ ނާއިބް ރައީސް ޑރ.މުހައްމަދު ޖަމީލް އަހުމަދުވެސް ވަނީ ވިދާޅުވެފައެވެ.
ރައީސް ޞާލިހު އުފެއްދެވި ރިޔާސީ ކޮމިޝަންތަކުން މިހާތަނަށް މާބޮޑު ނަތީޖާއެއް ނެރެވިފައިނުވާއިރު، ކޮމިޝަން އުވާލުމަށް މަޖިލިސް ރައީސް މުހައްމަދު ނަޝީދާއި، މަޖިލީހުގެ އެމްޑީޕީއަށް ނިސްބަތްވާ މެމްބަރުންވަނީ ގޮވާލާފައެވެ. އަދި ކޮމިޝަނަކީ ހަމައެކަނި މުސާރަނަގާ ކޮމިޝަނެއްކަމަށް މެމްބަރުން ވަނީ ވިދާޅުވެފައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އުފެއްދެވި ރިޔާސީ ކޮމިޝަންތަކަށް މިހާތަނަށް 12 މިލިއަނަށްވުރެ ގިނަ ރުފިޔާ ޚަރަދުކޮށްފައިވެއެވެ. މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގްކުރާ ކޮމިޝަނަށް މިހާތަނަށް 4.3 މިލިއަން ރުފިޔާ ޚަރަދުކޮށްފައިވާއިރު، އޭގެތެރެއިން 3.8 މިލިއަން ރުފިޔާއަކީ އެކޮމިޝަންގެ މެންބަރުންގެ މުސާރައާއި އެލަވެންސްއެވެ.
