ކުރީގެ ރައީސް، އަދި މަޖިލިސް ރައީސް މުހައްމަދު ނަޝީދު އަވަހާރަކޮށްލުމަށް ދިން ޓެރަރިސްޓް ހަމަލާއާއި ގުޅިގެން ތަހުގީގް ކުރިއަށްދާގޮތަށް އެއްވެސް ފާޑެއް ވިދާޅުވެވޭކަމަށް ނެތްކަމަށާއި، ތަހުގީގް ދަނީ ވަރަށް ބަރާބަރަށް ވަރަށް ފުރިހަމައަށް ކަމުގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަން ވިދާޅުވެއްޖެއެވެ.
ރައީސް ނަޝީދުގެ ތަހުގީގް ކުރިއަށްދާ ގޮތާއި ގުޅޭގޮތުން މިރޭ ސަންގު ޓީވީގައި ވާހަކަ ދައްކަވަމުން ރޮޒޭނާ ވިދާޅުވީ ރައީސް ނަޝީދަށް ދިން ހަމަލާގެ ތަހުގީގުގެ އެންމެފަހުން ހާމަކުރި މައުލޫމާތަށްބަލާއިރު، ފުލުހުން ކުރައްވާފައިވާ މަސައްކަތް ހާމަވާކަމަށެވެ. ތަހުގީގުގައި ފުލުހުން ބޮޑެތި ކުރިއެރުންތަކެއް ހޯދާފައިވާއިރު، ތަހުގީގާއި ގުޅިގެން އެއްވެސް ބަޔަކަށް ފާޑުކިޔުމުގެ ޖާގަ ނެތްކަމަށް ރޮޒޭނާ ވިދާޅުވިއެވެ.
ޓެރަރިސްޓް ހަރަކާތްތަކާއި ހަރުކަށި ފިކުރުތަކާއި ދެކޮޅަށް ސަރުކާރުން ކެނޑިނޭޅި މަސައްކަތް ކުރަމުންދާއިރު، އެކަމުގައި ޝައްކުއުފެދޭ ގޮތަށް ވާހަކަދައްކައި، ރައީސުލްޖުމްހޫރިއްޔާއާއި، ސަލާމާތީ ބާރުތަކުގެ އަގުވެއްތޭ ގޮތަށް އެއްވެސް ފަރާތަކުން ވާހަދެއްކުމަކީ ކުރަމުންދާ މަސައްކަތުގެ އިތުބާރު ގެއްލުވާލުމަށް ކުރެވޭ މަސައްކަތެއްކަމަށް ރޮޒޭނާ ވިދާޅުވިއެވެ. ނަމަވެސް ސަލާމަތީ ބާރުތަކުންނާއި، ސަރުކާރުން ހަރުކަށި ފިކުރާއި ދެކޮޅަށް ކުރަމުންދާ މަސައްކަތަކީ ޝުކުރު ހައްގު މަސައްކަތްތަކެއްކަމަށް ރޮޒޭނާ ވިދާޅުވިއެވެ.
ރޮޒޭނާ ވިދާޅުވީ ހަރުކަށި ފިކުރާއި ދެކޮޅަށް ސަރުކާރުން މަސައްކަތް ނުކުރާކަމަށްބުނެ ރައީސް ނަޝީދު، ރައީސް ޔާމީންއާއިއެކު ބައިއަތު ހިފާނެ ވާހަކަތަކާއި، ސަރުކާރަށް ތާއީދު ނުކުރާވާހަތައް ދައްކަމުންދަނީ ކޮން މަގުސަދެއްގައި ކަމެއް ނޭގޭކަމަށެވެ. ނަމަވެސް މިއީ އެމްޑީޕީގެ އާންމު މެމްބަރުންވެސް އަދި ސަރުކާރުންވެސް ތާއީދު ކުރާނެ ގޮތެއް ނޫންކަމަށެވެ.
ރޮޒޭނާ ވިދާޅުވީ މިއަދު ވެރިކަން ކުރަމުންދާ ކޯލިޝަނަކީ ފަސްއަހަރުގެ ދައުރަކަށް އިންތިޚާބުވެފައިވާ ކޯލިޝަނަކަށްވާއިރު، ކޯލިޝަން ރޫޅާއި، އެމްޑީޕީ އެކަނި ވެރިކަން ކުރާގޮތަކަށް ވަކި މީހަކު ބޭނުންވެގެން ކަންކަން ބަދަލު ކުރުމަކީ ކުރެވޭނެ ކަމެއްނޫންކަމަށެވެ. އެގޮތަށް ޖާގަވެސް ދެވިގެން ނުވާނެކަމަށް އޭނާ ވިދާޅުވިއެވެ. ރޮޒޭނާ ވަނީ ރައީސް ޞާލިހުގެ ކެތްތެރިކަމާއި، ރައީސް ޞާލިހުގެ މަސައްކަތްޕުޅަށް ވަރަށް ބޮދަށް ތައުރީފް ކުރައްވާފައެވެ.
އޭނާ ވިދާޅުވީ ރައީސް ޞާލިހު ގެންދަވަނީ މިހުރިހާ ޕްރެޝަރެއް ކުރިމަތިވާއިރުވެސް ވަރަށް ކެތްތެރިކަމާއިއެކު ޤައުމުގެ ކަންކަން އިސްލާހުކޮށް ވެފައިވާ ވައުދުތައް ފުއްދުމަށް ކެނޑިނޭޅި މަސައްކަތް ކުރަމުންކަމަށެވެ.
