ނަމާދުގެ ހުކުމްތައް ދަންނަ ޝަރުއީ ގޮތުން ބާލިޣުވެފައިވާ 13، 15 އަހަރުގެ ކުދިންނަށް އިމާމުވެ ނަމާދު ކުރުމަކީ ދީނި ގޮތުން މައްސަލައެއް އޮތްކަމެއްނޫން ކަމުގައި ދީނީ ޢިލްމުވެރިޔާ އަދި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލި ސައީދު ވިދާޅުވެއްޖެއެވެ.

ދަސްކޮށްދިނުމުގެ ބޭނުމުގައި ވެސް މިސްކިތްތަކުގައި ކުޑަކުދިން ލައްވާ އިމާމްވެ ޖަމާއަތުގައި ނަމާދު ނުކުރުވުމަށް އިސްލާމިކް މިނިސްޓްރީން ވަނީ އަންގާފައެވެ. މިނިސްޓްރީން މިގޮތަށް އަންގާފައިވަނީ ދާދި ފަހުން ވަނީ ހުޅުމާލެ ސަހަރާ މިސްކިތުގައި ކުޑަކުދިންތަކެއް އިމާމުވެ ނަމާދުކުރާ މައްސަލައަކާއި ގުޅިގެންނެވެ. އެ މިސްކިތުގައި އިމާމްވެ ނަމާދު ކުރަމުން ދިޔައީ އުމުރުން 13 އަހަރާއި 15 އަހަރުގެ ކުދިން ކަމަށް މައުލޫމާތު ލިބެއެވެ.

އިސްލާމިކް މިނިސްޓަރ ކުޑަކުދިން ލައްވައި އިމާމުވެ ނަމާދު ނުކުރުމަށް ނިންމެވުމާއި ގުޅިގެން ޑރ.ޝަހީމް ވިދާޅުވީ ދީނީ ގޮތުން ކުޑަކުދިން ލައްވައި ނަމާދު ކުރުމަކީ މައްސަލައެއް ނޫންކަމަށެވެ. ޚާއްސަކޮށް، ނަމާދުގެ ހުކުމްތައް ދަންނަ ޝަރުއީ ގޮތުން ބާލިޣުވެފައިވާ 13، 15 އަހަރުގެ ކުދިންނަށް އިމާމުވެ ނަމާދު ކުރުމަކީ މައްސަލައެއް ނޫންކަމަށް ޑރ.ޝަހީމް ވިދާޅުވިއެވެ. ޝަހީމް ވިދާޅުވީ ކުޑަކުދިން މިސްކިތަށް ލޯބިޖައްސައި، އެކުދިންނަށް މިސްކިތްތަކުން ޖާގަދީ ލޯތްބާއި އިޚުތިރާމު ދިނުމަކީ އެކުދިންނަށް ލިބޭނެ ވަރަށް ބޮޑު އުފަލެއްކަމަށެވެ.

ނަމާދުގެ ހުކުމްތައް ދަންނަ ޝަރުއީ ގޮތުން ބާލިޣުވެފައިވާ 13، 15 އަހަރުގެ ކުދިންނަށް އިމާމުވެ ނަމާދު ކުރުމަކީ ދީނި ގޮތުން މައްސަލައެއް އޮތްކަމެއްނޫން. ޚާއްސަކޮށް ރީތިކޮށް ޤުރުއާން ކިޔަވާ ހިތުދަސް ކުދިންނަށް ފުރުސަތު އޮތުމަކީ އަޅުގަނޑަށް ފެންނަ ގޮތުގައި، ރަނގަޅުކަމެއް. ކުޑަކުދިންނަށް މިސްކިތްތަށް ލޯބި ޖެއްސުމާއި، މިސްކިތުން އެކުދިން ބަލައިގަންނަކަން އެކުދިންނަށް އިހުސާސް ވާންޖެހޭނެ. ސުންނަތަކީ ކުޑަކުދިންނަށް މިސްކިތުން ލޯތްބާއި، އިޚުތިރާމު ދިނުން. އެކުދިންނަކީ ޖަމާއަތުގަ ބައިވެރިންކަމުގައި އިހުސާސްވުން.

– ޑރ.ޝަހީމް ވިދާޅުވިއެވެ.

Namaadhuge Hukumthah dhanna sharuee gothun baalighuvefauvaa13,15 aharu kudhinah imaamuve namaadhu kurumaki dheenee gothun massala eh oy kameh noon. Khaassa koh reethikoh Qur'an kiyavaa hithu dhas kudhinah furusathu othumaki alhugandah fenna gothuga rangalhu kameh.

— Mohamed Shaheem Ali Saeed (@Mohamedshaheem1) July 28, 2021

ޑޜ.ޝަހީމް ވިދާޅުވީ ކޮންމެ މިސްކިތެއްގައިވެސް ރަސްމީ ހުއްދަ އޮންނަ އިމާމެއް ހުރިކަމުގައި ވީނަމަވެސް ޤުރުއާން ރީތިކޮށް ކިޔަވައި، ޤުރުއާން ހިތުދަސް ކުދިންނަށް މިސްކިތްތަކުގައި އިމާމުވެ ނަމާދު ކުރުމަކީ މައްސަލައެއް ނޫންކަމަށެވެ. އަދި އެކުދިންނަށް އެފުރުސަތު ދިނުމަކީވެސް އެއްވެސް މައްސަލައެއް އޮތްކަމެއްނޫންކަމަށެވެ.

ރަސްމީ އިމާމަކީ ވަކި ފާހެއް އޮންނަންޖެހޭ ބައެއް ނަމަވެސް ރީތިކޮށް ކިޔަވާ ޤުރުއާން ހިތުދަސް ކުދިންނަށް ފުރުސަތު، އެއްކޮށް ބަންދުވެގެން ނުވާނެ. އިސްލާމީ އުސޫލަކީވެސް އެއީ. އަޅުގަނޑުމެން ކުޑަކުއިރު މިސްކިތަށް ދިއުމުން ބައެއްފަހަރު އިމާމުކަން ހަވާލުކުރޭ.

– ޝަހީމް ވިދާޅުވިއެވެ.

ޑރ.ޝަހީމް ވިދާޅުވީ ބައެއް މިސްކިތްތަކުގައި ކުޑަކުދިންނާއިމެދު ބައެއްފަހަރު އަމަލުކުރެވިގެން ނުވާނެ ގޮތަކަށް އަމަލުކުރަމުންދާތަން ފެންނަކަމަށެވެ. އެގޮތުން ނަމާދަށް އަވަސް ގޮސް ތިބޭކުދިން ކުރީސަފުގައި ތިބޭއިރު، އެކުދިން ފަހަތު ސަފައްޖައްސައި، ފަހުންދާ ބޮޑެތި މީހުން ކުރީސަފަށް އެރުމަށް ޖާގަ ހަދާތަން ފެންނަކަމަށެވެ. ނަމަވެސް މިއީ އެއްގޮތަކަށްވެސް ކުރެވިގެންވާނެކަމެއް ނޫންކަމަށާއި، ނަމާދުގެ ސަފުތައް އެތުރިގެންވަނީ ކުރިންދާ މީހުންނަށް ކުރިން ޖާގަލިބޭ ގޮތަށް ކަމުގައި ވިދާޅުވެ ޝަހީމް ވަނީ އެކަން ވަރަށް ބޮޑަށް ކުއްވެރި ކުރައްވައި، އެކަން އެގޮތަށް ނުކުރުމަށް އިލްތިމާސް ކުރައްވާފައެވެ.

ނަމާދުގެ މިސްކިތުގެ ކުރީ ސަފުހައި ކުޑަކުއްޖަކު އިނަސް އެކުދިން ފަހަތު ސަފަށް ޖައްސައި ބޭރުކޮށްލުމަކީ ކޮށްގެންވާނެ ކަމެއްނޫން. ކުރީ ސަފުގެ ޖާގަ ތަކަކީ އެތަނުގައި ކުދިން އަންނަ މީހެއްގެ ހައްގެއް. ކުޑަ ކުއްޖަކު ގޮސް ކުރިން އިށީދެއްޖެނަމަ އެކުޖަކު ބޭރު ނުކުރެވޭނެ. ޚާއްސަކޮށް 7 އަހަރުގެ ކުދިން.

– ޑރ.ޝަހީމް ވިދާޅުވިއެވެ.

އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވީ، އެ މިސްކިތުގައި އިމާމުވެ ނަމާދުކުރި ކުދިންނަކީ އިމާމު ކޯސް ހަދަމުންދާ ކުދިން ކަމަށެވެ. އެ އުމުރުގެ ކުޑަކުދިންލައްވާ އިމާމުވެ ނަމާދު ނުކުރުވަން މިހާރު އަންގާފައިވާނެ ކަމަށް ޒާހިރު ވިދާޅުވިއެވެ. ކުޑަކުދިން އިމާމުވެ ނަމާދުކުރުމާއި ގުޅޭ ގޮތުން، ބަންދަށް ފަހު ސަރުކާރު ހުޅުވުމުން ސާކިއުލާއެއް ފޮނުވާނެ ކަމަށް ވިދާޅުވިއެވެ.

މިނިސްޓަރު ވިދާޅުވީ، ބެލެނިވެރިންގެ އިއުތިރާޒެއް ނެތް ނެތްނަމަ ތަރާވީސް ނަމާދު އިމާމުވެކުރަން މީގެ ކުރިން ހުއްދަ ދީފައިވާނެ ކަމަށެވެ. ނަމަވެސް އެއީ އާއްމުކޮށްކުރާ ކަންތައްތަކެއް ނޫން ކަމަށް ވިދާޅުވިއެވެ. އެ ހުއްދަވެސް ދެމުން އައީ އުމުރުން 15 އަހަރުން މަތީގެ ކުދިންނަށެވެ.

ކުޑަކުދިންލައްވާ އިމާމުވެ ނަމާދުކުރުވާ ކަމުގެ ޝަކުވާ މިނިސްޓްރީއަށް ބައެއް ރަށްރަށުންވެސް އަންނަނީ ލިބެމުންކަމަށް މިނިސްޓްރީން ވަނީ ބުނެފައެވެ.