އެއްފަހަރާއި 14 ސައިކަލާއި، 8 ކާރަށް ޙިދުމަތް ދެވޭނެ، ސެލްފް ސަރވިސް ޝެޑެއް ޤާއިމްކުރުމަށް ނިންމާފައިވާކަމަށް އެފްއެސްއެމްގެ މެނޭޖިންގ ޑިރެކްޓަރ މުޙައްމަދު ގަސަމް ވިދާޅުވެއްޖެއެވެ.
އެފްއެސްއެމްގެ މެނޭޖިންގ ޑިރެކްޓަރ މުޙައްމަދު ގަސަމް ވިދާޅުވީ އެކުންފުނީގެ ޕެޓްރޯލް ޝެޑްތަކުން ދޭ ޙިދުމަތުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. ގަސަމް ވިދާޅުވީ އިންޑަސްޓްރިއަލް ވިލެޖްގައި މިހާރު ހުރި އެކުންފުނީގެ ޝެޑާއި އިންވެގެން އޮންނަ ބިމުގައި ސެލްފް ސަރވިސް ޕެޓްރޯލް ޝެޑެއް ތަރައްޤީ ކުރުމަށް ހަމަޖެހިފައިވާ ކަމަށެވެ. އަދި ކުރިއަށް އޮތް 4 މަސް ދުވަސްތެރޭ އެތަން ތަރައްޤީކުރުމުގެ މަސައްކަތް ފެށިގެންދާނެކަމަށް ގަސަމް ވިދާޅުވިއެވެ.
އަމަލީ މަސައްކަތް ފެށޭ ހިސާބުން 9 ނޫނީ 10 މަސްދުވަސްތެރޭ ޝެޑްގެ ޙިދުމަތް އާއްމުންނަށް ލިބިގެންދާނެ، މި ޝެޑުގައި އެއްފަހަރާއި 14 ސައިކަލަށާއި 8 ކާރަށް ޙިދުމަތް ދެވޭނެ، ޕެޓްރޯލް އަޅަންދާ ފަރާތަށް އަމިއްލައަށް ޕެޓްރޯލްއަޅާ ފައިސާ ދެއްކޭނެ މި ޝެޑުން.
– ގަސަމް ވިދާޅުވިއެވެ.
ގަސަމް ވިދާޅުވީ ކުރިއަށްއޮތްތާނގައި މާލޭގައި ޙިދުމަތްދެމުންދާނީ ދެ ޕެޓްރޯލް ޝެޑުން ކަމަށެވެ. އެހެންނަމަވެސް މި ދެ ޝެޑުގައި ޕަމްޕުތައް ގިނަވާނެ ކަމަށާއި، އާއްމުންނަށް ރަނގަޅު ފެންވަރުގެ ޙިދުމަތްތަކެއް ދެވިގެންދާނެކަމަށެވެ.
މާލޭގެ ހަތަރު ސަރަޙައްދެއްގައި އެފްއެސްއެމް ޕެޓްރޯލް ޝެޑުތައް ހުރެއެވެ. އެއީ އައިޖީއެމްއެޗް ކައިރީގައާއި، އިންޑަސްޓްރިއަލް ވިލެޖުގައާއި، ކާނިވާ ސަރަޙައްދުގެ އިތުރުން ސްޓެލްކޯ ކައިރީގައެވެ. މީގެއިތުރުން ހުޅުމާލޭގައިވެސް އެފްއެސްއެމްގެ ޕެޓްރޯލް ޝެޑެއް ހުރެއެވެ. އަދި ދާދިފަހުން އެކުންފުނިން ވަނީ ފިއުލް ސްޓޭޝަނެއް ތިލަފުށީގައިވެސް ހުޅުވާފައެވެ.
