ރައީސް މުހައްމަދު ނަޝީދުގެ ފުރާނަ ދުއްވާލުމަށް ދިން ނުރައްކާތެރި ޓެރެރިސްޓު ހަމަލާގައި ފަންޑުކުރި މީހުންނަކީ ނެތްބައެއްގެ ގޮތުގައި ހެދުމަށް ފުލުހުން މަސައްކަތް ކުރާކަމުގެ ތުހުމަތު ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ކުރައްވައިފިއެވެ.

ނަޝީދަށް ދިން ހަމަލާއާއި ގުޅިގެން ރޭ ފުލުހުން ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒް ވިދާޅުވީ ހަމަލާ ދިނުމުގެ މުގާބިލާއެއްގެ ގޮތުން އެއްވެސް ފަރާތަކުން ފައިސާ ހުށަހެޅި ކަމުގެ ހެއްކެއް އަދި ލިބިފައި ނެތް ނަމަވެސް އަދި މިހާތަނަށް ތަހްގީގުގައި އެއްގޮތައް ނިންމާފައި ނުވާކަމަށެވެ.

ނަޝީދު އަވަހާރަކޮށްލަން ބޮން ހަރުކުރި ސައިކަލް ގަންނަން 18،000ރ. ހަރަދު ކުރިކަމަށް ފުލުހުން ވިދާޅުވިއެވެ. އަދި ސައިކަލް މަރާމާތު ކުރުމަށް ވޯކްޝޮޕަކަށް ގެންގޮސް އެކަމަށް ވެސް ހަރަދުތަކެއް ކުރި ކަމަށާއި އެގެ އިތުރުން ހަމަލާ ރޭވުމުގެ ކަންކަމަށް އެޕާޓްމަންޓެއް ކުއްޔަށް ހިފައި އެ ތަނަށް ހަރަދު ކޮށްފައިވާ ކަމަށް އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒް ވިދާޅުވިއެވެ.

ފުލުހުންގެ މިވާހަތަކާއި ގުޅިގެން ވައްޑެ ވިދާޅުވީ ހަމަލާއަށް ތައްޔާރުވުމަށް 2019 ވަނަ އަހަރުން ފެށިގެން ކުރި ހުރިހާ މުއާމަލާތެއްގައިވެސް، ފައިސާ އެކުލެވޭއިރު މިމީހުންނަކީ އެއްވެސް ވަޒީފާއެއް އަދާކުރި ބަޔަކަށް ނުވާއިރު ފައިސާ ހޯދި ގޮތެއް އޮންނަންޖެހޭކަމަށެވެ. އެކަން ސާފު ކުރުމުގެ ބަދަލުގައި އެކަން އޮއްބާލުމަށް ވާހަކަ ދެއްކުމަކީ އެއްވެސް ހާލެއްގައި ބަލައި ގެނެވޭނެ ކަމެއް ނޫންކަމަށް އޭނާ ވިދާޅުވިއެވެ.

އެއްވެސް ވަޒީފާއެއް އަދާނުކުރާ ބަޔަކު ވެހިކަލް ގަނެ، ގެސްޓްހައުސް/އެޕާޓްމެންޓްތައް ހިފައި، އެތައް ދުވަހެއް ވަންދެން އެތައް ރޭވުމެއް ރޭވުމުގައި ދެމިތިބިކަން ތަހުގީގަށް އެނގޭއިރު، މިކަމަށް ފަންޑުކުރި ބަޔަކު ނެތްކަން ދައްކަން ވާހަކަ ދެއްކުމުން ސުވާލު އުފެދޭ!

– ވައްޑެ ވިދާޅުވިއެވެ.

2019 އިން ފެށިގެން ރައީސް ނަޝީދު އަވަހާރަކޮށްލަން ތަކުރާރުކޮށް އެތައްފަހަރަކު މަސައްކަތް ކުރި އިރު އަޅާނުލާ ތިބީ ކީއްވެހޭ؟ #JusticeForPresidentNasheed

— Waddey (@waddey_) July 25, 2021

ނަޝީދަށް ދިން ހަމަލާއާއި ގުޅިގެން މިހާތަނަށް  300 އަށްވުރެ ގިނަ މީހުންގެ ބޭންކް ސްޓޭޓްމަންޓް ދިރާސާ ކޮށްފައިވެއެވެ. ނަޝީދަށް ހަމަލާ ދޭން ބަޔަކު ފައިސާ ހުށަހަޅައިގެން އުޅޭ ކަމުގެ މައުލޫމާތެއް ރައްޔިތުންގެ މަޖިލީހުގެ މެންބަރު އިލްޔާސް ލަބީބަށް ލިބިވަޑައިގެންފައި ވިޔަސް އެއީ ނަޝީދަށް ދިން ހަމަލާއާ ގުޅުން ހުރި މައުލޫމާތެއް ކަމުގެ ހެއްކެއް ތަހުގީގަށް އަދި ލިބިފައި ނުވާކަމަށް ރިޔާޒް ވިދާޅުވިއެވެ.

ނޫސްވެރިންގެ ބައްދަލުވުމުގައި ކޮމިޝަނަރ މުހައްމަދު ހަމީދު ވެސް ތަކުރާރުކޮށް ވިދާޅުވީ މައްސަލައިގެ ތަހްގީގު އަދި ނުނިމޭ ކަމަށާއި އަދިވެސް މައްސަލަ އާއި ގުޅިގެން ބަލަން ޖެހޭ ކަންކަން ބަލަމުން ގެންދާނެ ކަމަށެވެ.