ހަރުކަށި ފިކުރާއި ބޮންގޮއްވުމާ ގުޅޭގޮތުން އެމްޑީޕީގެ ރައީސް މުޙައްމަދު ނަޝީދު ދައްކަވާ ވާހަކަފުޅު ނޫން އެހެން މީހަކު ދައްކާ ވާހަކައަށް ބުރަދަނެއް ނުދެވޭނެ ކަމަށް  އެމްޑީޕީގެ ޤައުމީ މަޖިލިސް މެމްބަރު މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ވިދާޅުވެއްޖެއެވެ.

އިންތި މިހެން ވިދާޅުވީ ރައީސް ނަޝީދުގެ ފުރާނަފުޅު ދުއްވާލުމަށް ދިން ނުރައްކާތެރި ހަމަލާއަށްފަހު، އެހަމަލާއާ ގުޅޭގޮތުުން ރައީސް ނަޝީދު ދައްކަވަމުންދާ ވާހަކަފުޅު ތަކަށް އެމްޑީޕީގެ އެއްވެސް މެމްބަރަކަށް ދެކޮޅު ނުހެއްދެވޭނެ ކަމުގައި އިންތި ވިދާޅުވުމާއި ގުޅިގެން ޓްވިޓާގައި އިންތިއަށް އަމާޒުވީ ސުވާލަކަށް ޖަވާބުދެއްވަމުންނެވެ.

އިންތި ވިދާޅުވީ ހަރުކަށި ފިކުރުގެ ބޮންގޮއްވުމުގެ ޝިކާރަކަށް ހަދާފައި އެވަނީ ރައީސް ނަޝީދު ކަމަށާއި އެއީ އެމްޑީޕީގެ ރައީސް ކަމަށެވެ. އަދި ބޮން ގޮއްވައި ރައީސް ނަޝީދު އަވަހާރަކޮށްލަން އުޅުނީ އެކަން މި ރާއްޖޭގައި ފެތުރެމުންދާތީ އެވާހަކަ ދެއްކެވުމުން ކަމަށްވެސް އިންތި ވަނީ ވިދާޅުވެފަ އެވެ.

"މި މައުލޫގައި މިވަގުތު މި ޕާރޓީގެ ވަކި އެހެން މީހެއްގެ ބަހަކަށް ހަމަޤައިމު އަޅުގަނޑަކަށް ބުރަދަނެއް ނުދެވޭނެ" – އިމްތިޔާޒު ފަހުމީ

ހަރުކަށި ފިކުރުގެ ބޮންގޮއްވުމުގެ ޝިކާރަކަށް ހަދާފައި އެވަނީ ރައީސް ނަޝީދު. އެއީ މި ޕާޓީގެ ރައީސް. ބޮން ގޮއްވީ އެކަން މި ރާއްޖޭގައި ފެތުރެމުންދާތީވެ އެވާހަކަ ދެއްކެވުމުން. މި މައުލޫގައި މިވަގުތު މި ޕާރޓީގެ ވަކި އެހެން މީހެއްގެ ބަހަކަށް ހަމަޤައިމު އަޅުގނޑަކަށް ބުރަދަނެއް ނުދެވޭނެ https://t.co/UCHLGCW3Zb

— ???????? ????? (@Imthiyazfahmy) July 23, 2021

ރައީސް ނަޝީދު އަވަހާރަކޮށްލަން ދިން ޓެރަރިސްޓް ހަމަލާއާ ގުޅިގެން، ރައްޔިތުންގެ މަޖިލީހުން ކުރިއަށްގެންދިޔަ ޕާލިމަންޓްރީ އިންކުއަރީ ރިޕޯޓް އެކުލަވާލި ކޮމެޓީގެ މުޤައްރިރު މުޙައްމަދު އަސްލަމް، ރައީސް ނަޝީދު ދައްކަވަމުންދާ ވާހަތަކަށް ރައްދު ދެއްވުމުން އިންތި ވަނީ އެކަމާއި ވަރަށް ބޮޑަށް ނުރުހުން ފާޅު ކުރައްވާފަ އެވެ.

އިންތި ވިދާޅުވީ ރާއްޖޭގައި ހައްދު ފަހަނައަޅާފައިވާ ހަރުކަށި ފިކުރު އޮތްކަމަށް ފާޅުގައި ވާހަކަދައްކަވަން ކެރޭ ހަމައެކަނި ލީޑަރު، ބޮމެއް ގޮއްވާލައި ބޮޑެތި ޒަހަމްތަކެއްލިބި އެހާލުގައި އޮންނަވައިގެން މިކަން ހިނގައިދިޔަ ގޮތާއި، ޤައުމު ހަމަމަގަށް އަޅުވަން ދެއްވާ ލަފައާއި ގުޅިގެން އެކަމަށް ފާޑުކިޔައި އެމްޑީޕީގެ އެއްވެސް މެމްބަރަކަށް ވާހަކަ ނުދެއްކޭނެކަމަށެވެ.

ނަމަވެސް އިންތިގެ މި ވާހަކަތަކަށް އެމްޑީޕީ އުފެއްދުމާއި އެޕާޓީގައި އިސްކޮށް ހަރަކާތްތެރިވީ ގިނަބަޔަކު އަންނަނީ ފާޑުކިޔަމުންނެވެ. އެގޮތުން އިންތިގެ މި ވާހަކަ ތަކަކީ އެމްޑީޕީ އުފެއްދި މަޤްސަދާއި ޑިމޮކްރެސީއާވެސް މުޅިން ހިލާފު ވާހަކަތަކެއް ކަމަށް ގިނަބަޔަކު އަންނަނީ ބުނަމުންނެވެ.