ޕާޓީގެ އެންމެ ބޮޑު މަގުސަދަކަށް ވާންޖެހެނީ ވެރިކަން ދެމެހެއްޓުންކަމަށް ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމް ވިދާޅުވެ ދެއްކެވި ވާހަތަކަށް އެމްޑީޕީގެ ޤައުމީ މަޖިލިސް މެމްބަރު، ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ރައްދު ދެއްވައިފިއެވެ.

ރައީސް މުހައްމަދު ނަޝީދަށް އަމާޒުކޮށް ދިން ނުރައްކާތެރި ޓެރެރިސްޓް ހަމަލާއަށްފަހު، އެމްޑީޕީ ތެރޭގައި އުފެދިފައިވާ ބައިބައިވުމުގައި ރައީސް ޞާލިހުއާއި، ރައީސް ނަޝީދުގެ މެދުގައި ޚިޔާލު ތަފާތުވުން އެފެދި، އެއްފެކްޝަނުން އަނެއް ފެކްޝަނަށް ދަނީ ހޫނު ރައްދު ތަކެއް ދެއްވަމުންނެވެ. ވެރިކަން ލިބި ވެރިކަން ދެމެހެއްޓުމަށް މަަސައްކަތް ކުރަންޖެހޭކަމަށް އަސްލަމް ވިދާޅުވެ ދެއްކެވި ވާހަކަތަކަށް ރައްދު ދެއްވަމުން ވައްޑެ ވިދާޅުވީ ރައީސް މައުމޫންގެ ދިގު 30 އަހަރުގައި ކުރެވި ކަމަކީ ވެރިކަން ދެމެހެއްޓުންކަމަށެވެ.

ނަމަވެސް އެމްޑީޕީން ވެރިކަމަށް އަންނީ އެއުސޫލުން ވެރިކަން ކޮށްލީމޭ ބުނަން ނޫންކަމަށް ވަހީދު ވިދާޅުވިއެވެ. ރައްޔިތުންނަށް ވަކި ކަންތައްތަކެއް ހުށަހަޅައި، ވަކި ކަންތައްތަކެއް ހާސިލްކޮށް ދިނުމަށް އެމްޑީޕީން ވެރިކަމަށް އައިސް އެކަންކަން ނުވާނަމަ އެއީ މައްސަލައެއްކަމަށް އޭނާ ވިދާޅުވިއެވެ. އެމްޑީޕީއަކީ ނަމަކަށް ވެރިކަން ކޮށްލައި، ތިމަންނާމެން މިތިބީ ވެރިކަން ކޮށްފައޭ ބުނާ އުސޫލުން ވެރިކަން ކުރާ ބައެއް ނޫންކަމަށް ވައްޑެ ވިދާޅުވިއެވެ.

ރައީސް މައުމޫނުވެސް 30 އަހަރު ވަންދެން ކުރެއްވީ ތިޔަކަންތައް ދެއްތޯ؟ އެކަމު އެމްޑީޕީން އައީ ވަކި ސިޔާސަތުތަކެއް މައްޗަށް އެކުލެވޭ، ވަކި ކަންތައްތަކެއް ރައްޔިތުންނަށް ކޮށްދޭން ވަޢުދުވެގެން، އެކަންކަން ފުއްދައިދިނުމަށް ޓަކައި ވެރިކަން ކުރާން. ނަމަކަށް ވެރިކަމެއް ކޮށްލާކަށް ނޫން.

– ވައްޑެ ވިދާޅުވިއެވެ.

ރައީސް ނަޝީދާއި ސަރުކާރާއި ދެމެދުނު އުފެދިފައިވާ ޚިޔާލުފުޅުތަކާ ގުޅޭ ގޮތުން މަޖިލީހުން ރައީސް ނަޝީދަށް ދިން ހަމަލާގެ އިންކުއެރީ ރިޕޯޓް އެކުލަވާލި ކޮމެޓީގެވެސް މުޤައްރިރު އަސްލަމް ވިދާޅުވީ، ރައީސް ނަޝީދު ފާޅުކުރައްވަނީ އެމަނިކުފާނުގެ އަމިއްލަފުޅު ޚިޔާލު ކަމަށެވެ. އެމަނިކުފާނު މަސައްކަތްކުރައްވާނެ ގޮތް އެނގިވަޑައިގަންނަވާނީ އެމަނިކުފާނަށް ކަމަށާއި، އެކަމަށް ކޮމެންޓެއް ނުކުރައްވާނެ ކަމަށެވެ.

އަސްލަމް ވިދާޅުވީ، އެމްޑީޕީގެ ކަންކަން އަބަދުވެސް ނިންމާނީ ޕާޓީގެ ތެރެއިން އެކަންކަމާ ގުޅުންހުރި ގުނަވަންތަކުން ކަމަށެވެ. ޕާޓީގެ އެއްވެސް ގުވަނަކުން އޮޕޮޒިޝަނާ ގުޅިގެން އެއްވެސް މަސައްކަތެއް ކުރަން ބޭނުންވެގެން އެވާހަކަ ޕާޓީތެރޭގައި ނުދެކެވޭކަމަށެވެ. އަދި އިދިކޮޅުގެ އެހީތެރިކަން ހޯދައިގެން ސިޔާސީ މަސައްކަތް ކުރުމުގެ ވިސްނުން ޕާޓީގައި ނެތްކަމަށެވެ. ސަރުކާރު ހިނގަމުން އަންނަ ގޮތާމެދު ހިތްޕުޅުހަމަޖެހޭ ކަމަށްވެސް އަސްލަމް ވިދާޅުވިއެވެ.