މިސްކިތްތަކުގައި ގޯސްތައް ނުހިނގާނެކަން ކަށަވަރުކޮށް، މިސްކިތްތަކަށް މިހާރަށްވުރެ ބޮޑު އަޅާލުމެއް ބޭނުންވާކަމަށް ދީނީ ޢިލްމުވެރިޔާ ޝައިޚް ޢަލީ ޒައިދު ވިދާޅުވެއްޖެއެވެ.
ޢަލީ ޒައިދު މިހެން ވިދާޅުވެފައިމިވަނީ، މާލޭ ހުކުރު މިސްކިތައް އަރައި ބިދޭސީ އަންހެނަކު “އަޅުކަމެއް” ކުރާ މަންޒަރު ފެންނަ ވީޑިއޯއެއް މީސް މީޑިއާގައި ދައުރުވާން ފަށަފައިވާތީ އެކަމަށް އިޝާރާތްކުރައްވައެވެ.
ޝައިޚް ޒައިދު ވިދާޅުވީ، މިސްކިތްތައް ބިނާކުރެވިފައިވަނީ ﷲ އަށް އެކަނި އަޅުކަން ކުރުމަށްކަމަށާއި، މިއީ މައިގަނޑު އަސާސްކަމަށެވެ. މިމަތިވެރި މަޤްސަދާ ފުށުއަރާ އެއްވެސް ކަމަކަށް ޖާގަދެވޭނަމަ އެއީ ގޯހެއްކަމަށާއި، މިފަދަ ގޯސްތައް ކުރިޔަށް އޮތްތާ ނުހިނގާނެކަން ކަށަވަރުކޮށް މިސްކިތްތަކަށް މިހާރަށްވުރެ ބޮޑު އަޅާލުމެއް ބޭނުންވާކަމަށް ޝައިޚް ޒައިދު ވިދާޅުވިއެވެ.
މިސްކިތްތައް ބިނާކުރެވިފައިވަނީ ﷲ އަށް އެކަނި އަޅުކަން ކުރުމަށް! މިއީ މައިގަނޑު އަސާސް! މިމަތިވެރި މަޤްސަދާ ފުށުއަރާ އެއްވެސް ކަމަކަށް ޖާގަދެވޭނަމަ އެއީ ގޯހެއް! މިފަދަ ގޯސްތައް ކުރިޔަށް އޮތްތާ ނުހިނގާނެކަން ކަށަވަރުކޮށް މިސްކިތްތަކަށް މިހާރަށްވުރެ ބޮޑު އަޅާލުމެއް ބޭނުންވޭ!
— Ali Zaid (@alizaid1000) July 22, 2021
މިވީޑިއޯ އާންމުވުމާއިއެކު ގިނަ ބަޔަކު ދަނީ މިކަމުގެ ކަންބޮޑުވުން ފާޅުކޮށް، މިކަން ރަނގަޅަށް ތަހުގީގް ކުރުމަށް ކަމާއި ގުޅުންހުރި އިދަރާތަކަށް ގޮވާލަމުންނެވެ. ވީޑިއޯއިން ފެންނަ ގޮތުގައި މި އަންހެން މީހާފގެ އަތުގައި ކޮންމެވެސް ކަހަކަ ތަސްބީހަ ފައްޗެއްވެސް އޮތެވެ. އަދި އޭނާ އިނީ ދެފައި ވަށްކޮށްގެން ހަމަޖެހިލައިގެން މިސްކިތުގެ ތެރޭގައި އިށީދެގެންނެވެ.
ސޯޝަލް މީޑިއާގައި ޢާންމުނެފައިވާ ވީޑިއޯ އިން ފެންނަނީ އަންހެން މީހާ “މެޑިޓޭޝާން” ގައި އިންނަ މަންޒަރެވެ. އެއީ ޔޯގާ ކަސްރަތު ކުރާ މީހުން ވެސް އިށީންދެގެން ތިބޭ ގޮތެކެވެ. ވީޑިއޯ އާއްމު ކުރި ބައެއް ފޭސްބުކް ޕޭޖްތަކުގައި ވެސް ބުނެފައި ވަނީ އަންހެން މީހާ އިނީ ޔޯގާ ކަސްރަތު ކުރަން ކަމަށެވެ. ނަމަވެސް ވީޑިއޯ އިން ފެންނަ އަންހެން މީހާ އިނީ ޔޯގާ ކަސްރަތު ކުރާކަށް ނޫނެވެ.
މެޑިޓޭޝަން ފެށިގެން އައީ ދީނީ އަޅުކަމެއްގެ ގޮތުގައެވެ. އެކަން ފުރަތަމަ ފެށި ކަމަށް ވަނީ ބުދު ދީނުގެ ހާމުދުރުންނާއި ހިންދޫ ދީނުގެ ގުރޫންނެވެ. ނަމަވެސް މިހާރު ބައެއް އެހެން ދީންތަކުގެ މީހުން ވެސް އެކަން ކުރެއެވެ. އަދި ދީނީ ކަމެއްގެ ގޮތުގައި ނޫން ގޮތަކަށް ވެސް އެގޮތައް ހަމަހިމޭންތަނެއްގައި އިށީންދެގެން މިގޮތައް ތިބޭ މީހުން އުޅެއެވެ. ހުކުރު މިސްކިތުގައި ނަމާދު ކުރުމުގެ ހުއްދަ އޮންނަނީ ވެސް ހަމައެކަނި ފިރިހެނުންނަށެވެ.
ހުކުރު މިސްކިތައް އަރައި މެޑިޓޭޝަންގައި އިން އަންހެން މީހާ އަކީ ކޮން ގައުމެއްގެ މީހެއް ކަމެއް ނޭނގެއެވެ. ވީޑިއޯ އިން ފެންނަ ގޮތުގައި މިސްކިތުގައި އިށީންދެގެން އިން އަންހެން މީހާ އާއި ވީޑިއޯ ކުރި މީހާ ފިޔަވައި އިތުރު މީހަކު އެވަގުތު މިސްކިތުގައެއް ނެތެވެ.
