ކޯވިޑް-19ގެ ވަބާގައި އަޅުގަނޑުމެން އުޅެމުން ގެންދާތާ ދެ އަހަރު ދުވަސް ވުމާއި ގާތަށް ގޮސްފައިވާއިރު ދެ ފަހަރެއްގެ މަތިން ރާއްޖޭގެ އެންމެބޮޑު އާބާދީއެއް އޮތް މާލޭ ސިޓީ މިވަނީ ލޮކްޑައުން ކޮށްފައެވެ. މި ބަލިމަޑުކަމުގެ ތެރެއިން އަޅުގަނޑުމެންނަށް ހިތް އުފާކޮށްލައި، ގުޅުންތަށް ބަދަހިކޮށްލަން މިހާރު މި ލިބިފައި އޮތް ޢީދަކީ، މި ބަލިމަޑުކަމުގައި އަޅުގަނޑުމެން އުޅެން ފެށިފަހުން ލިބުނު މިފަދަ އެންމެ ބޮޑު ފުރުސަތެވެ.

ކޯވިޑްގެ މި ބަލިމަޑުކަމުގެ ތެރޭގައި އަޅުގަނޑުމެން ތަހަންމަލްކުރި އެންމެ ހިތްދަތި އަދި ނުރައްކާތެރި ދުވަސްތައް ފާއިތުވީ 2 މަހެއްހާ ދުވަހު ތަހަންމަލް ކުރުމަށްފަހު ލިބުނު ލުއިތަކާއެކު އަޅުގަނޑުމެންގެ ތެރެއިން ގިނަބަޔަކު މިވަނީ ޢީދުގެ އުފާ ފާޅުކޮށްލުމަށާއި ސިކުނޑި ހަމަޖައްސާލުމަށް މާލޭގެ ބަންދު ކޮޓަރިތަކުން ނުކުމެ އަތޮޅުތެރޭގެ ހިތްގައިމު ރަށްރަށަށާއި ރާއްޖޭން ބޭރަށް ދަތުރުކޮށްފަ އެވެ.

ސަރުކާރުން ދެއްވި މި ބޮޑު ލުއިތައް ދެއްވަމުންވެސް، ކަމާއިގުޅުންހުރި ފަރާތްތަކުން ދެއްވި އިރުޝާދު ތަކަކީ ޢީދުގެ އުފާ ފާޅުކުރުމާއި، އެކުވެރިކަމާއި އެއްބައި ވަންތަކަން ބަދަހި ކުރުމުގައި، އަދިވެސް ރައްކާތެރި ކަމަށް އިސްކަން ދިނުމެވެ. ސަބަބަކީ ކޯވިޑްގެ ނުރައްކާއިން އަޅުގަނޑުމެން މުޅިން އެއްކޮށް ސަލާމަތްވެފައި ނުވާތީ އެވެ.

ނަމަވެސް އަދި މިހާތަނަށް ފެންނަމުންމިދާ މަންޒަރުތަކުން އަޅުގަނޑުމެން މިތިބީ ބޮޑު ބަލިމަޑުކަމެއްގެ ތެރޭގައި ކަން ގިނަ ދިވެހިން މިހާރު ހަނދާން ނެތެމުން ދާހެންވެސް ހީވާން ފަށައިފި އެވެ. ކޯވިޑްގެ ސަބަބުން އަނެއްކާވެސް އަޅުގަނޑުމެން ހިތްދަތި ދުވަސްތަކެއް ތަހަންމަލް ކުރަން ޖެހިދާނެކަމަށް، އެކަށީގެންވާ ފިޔަވަޅުތަކެއް، ގިނަ ރަށްރަށުގައި ޢީދުގެ ހަރަކާތްތައް ބާއްވާއިރު އަޅާފައިވާ މަންޒަރެއް ނުފެނެއެވެ. އީދުގެ ހަރަކާތްތައް ކުރިއަށް ގެންދާއިރު ގައިދުރުކަމެއް ނެތެވެ. މާސްކު އެޅުމެއްވެސް ނެތެވެ. ގިނަބަޔަކު އެއްތަންވާފަދަ ގިނަ ކުޅިވަރު ތަކެއްވެސް ބޭއްވެނީ އެވެ.

ބަލިފެތުރުން ކޮންޓްރޯކުރުމަށާއި ރައްކާތެރިވެ ތިބުމަށް އިރުޝާދުތައްދޭ އެޗްޕީއޭއިން، އިރުޝާދަކަށް ފަހު އިރުޝާދެއް ގެންދަނީ ދެމުންނެވެ. ހަމަ ޔަޤީނުންވެސް އަޅުގަނޑުމެންގެ ތެރޭ ނުރައްކާތެރި މިބަލި ފެތުރުން އިތުރުވެ މިބަލީގައި ގިނަ އަދަދެއްގެ ބަޔަކު ނިޔާވެ ދިއުމަކީ އަޅުގަނޑުމެންގެ ތެރެއިން އެކަކުވެސް ބޭނުންވާނެ ކަމެއް ނޫނެވެ. އެހެންކަމަށް ވާނަމަ ޗުއްޓީ ދަތުރުގައި މިކަންކަމަށް ހާއްސަ ސަމާލުކަމެއް ދެއްވާށެވެ.

• ދަތުރުމަތީގައި އެއްކޮށް ދިރިއުޅޭ މީހުން ފިޔަވައި އެހެން މީހުނާ ދެމެދު މަދުވެގެން ތިން ފޫޓުގެ ދުރުމިން ބެހެއްޓުން.
• ތިމާ ދިރިއުޅޭ އާއިލާގެ މީހުންނާއެކު އެކަނި އީދުގެ ކެއުންތައް ބޭއްވުން.
• ގިނަ މީހުން ބައިވެރިވެގެން ބާއްވާ އީދު ކުޅިވަރުތަކާއި އެއްރަށުން އަނެއްރަށަށް ގޮސްގެން ބާއްވާ މުބާރާތްތައް ނުބޭއްވުން.

ބޮޑު ޗުއްޓީއަކާއި އެކު ސަރުކާރުން ދެއްވާފައިވާ، މީގެކުރިން ނުލިބޭފަދަ ބޮޑެތި ލުއިތަކުގެ ބޭނުން ހެޔޮގޮތުގައި ނުހިފައިފިނަމަ، ބޮޑު ޗުއްޓީ ނިންމާފައި އަންނަގޮތަށް އަނެއްކާވެސް ލޮކްޑައުނަކަށްގޮސް ރަށުބަންދުތަށް އިތުރުވުން ވަރަށްވެސް ގާތެވެ. އެ ހާލަތަށް ގޮސްފިނަމަ އަނެއްކާވެސް އެތަކެއް ރައްޔިތުންނަށް، މުވައްޒަފުންނަށާއި ވިޔަފާރިތަކަށާއި ކުޑަކުދިންނަށް، ކުރިމަތިވާނީ މާލީ، އިޤްތިސާދީ، ނަފްސާނީ އެތަކެއް ގެއްލުމެކެވެ.

"ބަލީގެ އިތުރު ރާޅެއް އައުމުގެ ފުރުޞަތު ކުޑަކުރުމަށް ރައްކާތެރިކަމުގެ ފިޔަވަޅުތަކަށް ކަމޭހިތަންވާނެ."

– އެޗްޕީއޭ

އަޅުގަނޑުމެންގެ މިކުޑަކުޑަ ނާޒުކު ގައުމު ބަލީގެ އިތުރު ރާޅަކަށް ހަމަ ގައިމުވެސް ތައްޔާރެއް ނޫނެވެ.

ސްކޫލް ޗުއްޓީއާއި ޢީދު ޗުއްޓީއާއި މިނިވަންދުވަހުގެ ޗުއްޓީއާއިއެކު ދިގު ޗުއްޓީއެއް ލިބިފައި އޮތް ނަމަވެސް އަޅުގަނޑުމެންނަށް ޗުއްޓީގެ އުފަލާއި ހިތްހަމަޖެހުމެއް ލިބޭނީ، ގަދަވެ ސަލާމަތުން ހެޔޮހާލުގައި ތިބެވިގެން ނޫންތޯއެވެ. އެހެންކަމުން "ޢީދު ޗުއްޓީއަށްފަހު އަނެއްކާ ލޮކްޑައުނަށް ދާންވީތޯ" އަމިއްލަ ނަފްސާއި ސުވާލުކޮށްލުމަށް ފަހުވެސް ރައްކާތެރިކަމުގެ ފިޔަވަޅުތަކަށް އިސްކަންދެއްވަމާތޯ އެވެ.