އިންޑިއާގެ އެންމެ މަޤްބޫލު ޓީވީ ޝޯވް "ދަ ކަޕިލް ޝަރްމާ ޝޯވް" އަލުން ފަށަން އުޅޭކަން ޝޯވްގެ ހޯސްޓް، ކޮމޭޑިއަން ކަޕިލް ޝަރްމާ ހާމަކޮށްފި އެވެ.
ގިނަ ބަޔަކު އިންތިޒާރުކުރަމުންގެންދާ މި ޝޯވް އަލުން ފަށަން އުޅޭކަން ކަޕިލް ހާމަކުރީ ޝޯވްގެ އެހެނިހެން ކާސްޓުންނާއެކު ނަގާފައިވާ ފޮޓޯއެއް އިންސްޓަގްރާމަށް ދޫކޮށްލަމުންނެވެ. އެގޮތުން މީގެކުރިންވެސް ޝޯވްއިން ފެނިގެންދިޔަ ކޮމޭޑިއަނުންނާއެކު ޝޯވް ވަރަށްއަވަހަށް ފެންނާނެކަމަށް ކަޕިލް މިއަދު ވަނީ ބުނެފައެވެ. ނަމަވެސް ސޮނީގެ މި ޝޯވް ދައްކަންފަށާ ތާރީހެއް އަދި ހާމަކޮށްފަ އެއްނުވެއެވެ.
ކަޕިލް ހިއްސާކުރި ފޮޓޯގައި ޝޯވްގެ އެކި ކެރެކްޓަރ ތަކުންފެންނަ، ކުރުޝްނާ އަބީޝެކާއި، ބާރްތީ ސިންގ އާއި، ކީކޫ ޝާރްދާގެ އިތުރުން ޗަންދަން ޕްރަބާކަރް ފެނިގެންދެއެވެ. މީގެއިތުރުން ޝޯވްއާ އަލަށް ގުޅޭ ސުދޭސް ލެހެރީވެސް ފޮޓޯއިން ފެނިގެންދެއެވެ.
View this post on Instagram
މައުލޫމާތު އެނގޭ ފަރާތަކުން އިންޑިއަން އެކްސްޕްރެސްއަށް މައުލޫމާތު ދީފައިވާގޮތުގައި މިއަދު ވަނީ ޝޯވްގެ ޕްރޮމޯ ޝޫޓްކޮށްފަ އެވެ. މީގެ އިތުރުން ސެޓް ތައްޔާރުކުުރުމުގެ މަސައްކަތް މިހާރު ކުރިއަށް ދާކަމަށާއި، ލަފާކުރެވޭގޮތުގައި އަންނަމަހުގެ ފަހުކޮޅު ބެލުންތެރިންނާ ހަމައަށް ޝޯވް އަންނާނެކަމަށްވެސް އިންޑިއަން އެކްސްޕްރެސް އިން ރިޕޯޓްކޮށްފައި ވެއެވެ.
View this post on Instagram
މިދިޔަ ފެބްރުވަރީ މަހުގެ ތެރޭގައި ކަޕިލް ޝަރްމާ ޝޯވް މެދުކަނޑާލީ ކަޕިލްގެ ދެވަނަ ދަރިފުޅު ވިހެއުމާއި އެނޫންވެސް ބައެއް ސަބަބުތަކާ ހުރެއެވެ. ނަމަވެސް އޭރުވެސް ބުނެފައިވަނީ ނަގަނީ ކުޑަ ބްރޭކެއް ކަމަށާއި މޭ މަހު އަލުން އަނބުރާ ޝޯވް ފަށާނެ ކަމަށެވެ. ނަމަވެސް ޝޯވް އަލުން ފެށުން ލަސްވެފައި ވަނީ އިންޑިއާގައި ހަލުވި ސްޕީޑެއްގައި ކޯވިޑް ފެތުރި އިންޑިއާ 2 ވަނަ ލޮކްޑައުންއަކަށް ދިއުމުގެ ސަބަބުންނެވެ.
"ދަ ކަޕިލް ޝަރްމާ ޝޯވް" އަކީ ހުރިހާ އުމުރުފުރައެއްގެ މީހުންވެސް ބަލަމުންގެންދާ، ހެއްވާމަޖާ ކަންތައްތަކެއް ގެނެސްދޭ ޝޯވްއެކެވެ. ސޮނީގެ މި ޝޯވް އިންޑިއާގައި އެންމެ މަޤްބޫލު ޓީވީޝޯވް ތަކުގެ ތެރޭގައި ހިމެނެއެވެ.
