މާލެ ސަރަޙައްދުގައި ކަރަންޓުގެ ޚިދުމަތުގެ ފެންވަރު ރަނގަޅުކުރުމަށް ކުރިއަށްގެންދާ ގްރޭޓަރ މާލޭ އިންޓަރކަނެކްޝަން މަޝްރޫޢުގައި އެންމެ އިސްކޮށް ހަރަކާތްތެރި ވަމުންދަނީ ސްޓެލްކޯގެ ޒުވާން ޓީމުކަމުގައި އެކުންފުނިން ބުނެފިއެވެ.
ސްޓެލްކޯއިން ބުނެފައިވަނީ މިފަދަ ބޮޑު މަސައްކަތެއްގައި އެކުފުންނީގެ ޒުވާން ޓީމުން ދެއްވާ އެއްބާރުލުމާއި، ބަހައްޓަވާ ޝައުގުވެރިކަމަކީ ކުންފުންޏަށް ލިބޭ ވަރަށްބޮޑު ހިތްހަމަޖެހުމެއްކަމަށެވެ. މިފަދަ މަލްޓިމިލިއަން ޑޮލަރުގެ މަޝްރޫއުތަކުގައި ކުންފުނީގެ ޒުވާނުން އިސްކޮށް ތިބޭކަމީ ކުންފުނިން ނުހަނު ފަޚުރުވެރިވާ ކަމެއްކަމަށް ސްޓެލްކޯއިން ވަނީ ބުނެފައެވެ.
ގްރޭޓާމާލޭ ގްރިޑް އެނަޖައިޒް ކުރުމުގެ މަސައްކަތުގައި އަޅުގަނޑުމެންގެ ޒުވާން ޓެކްނީޝަނުންނާއި، އިންޖީނިއަރުން. މި ފަދަ މަލްޓިމިލިއަން ޑޮލަރުގެ މަޝްރޫއުތަކުގައި އިސްކޮށްތިބެ އަޅުގަނޑުމެންގެ ޒުވާން ޓީމުން ކުރަމުންދަނީ އަޅުގަނޑުމެން އެންމެން ފަހުރުވެރިވާ ފަދަ ބުރަ މަސައްކަތްތަކެއް.
– ސްޓެލްކޯއިން ބުނެފައިވެއެވެ.
ގްރޭޓާމާލޭ ގްރިޑް އެނަޖައިޒް ކުރުމުގެ މަސައްކަތުގައި އަޅުގަނޑުމެންގެ ޒުވާން ޓެކްނީޝަނުންނާއި، އިންޖީނިއަރުން. މި ފަދަ މަލްޓިމިލިއަން ޑޮލަރުގެ މަޝްރޫއުތަކުގައި އިސްކޮށްތިބެ އަޅުގަނޑުމެންގެ ޒުވާން ޓީމުން ކުރަމުންދަނީ އަޅުގަނޑުމެން އެންމެން ފަހުރުވެރިވާ ފަދަ ބުރަ މަސައްކަތްތަކެއް. pic.twitter.com/PTap7G1Zhq
— STELCO (@STELCOMALDIVES) July 17, 2021
ގްރޭޓަރ މާލެ ގްރިޑް އެނަރޖައިޒްކުރުމުގެ މަސައްކަތް އިއްޔެ ފަށާފައިވާއިރު، މި މަސައްކަތް މިމަހުގެ 4 ދުވަހެއްގައި ކުރުމަށް ސްޓެލްކޯއިން ވަނީ ނިންމާފައެވެ. އަދި މަސައްކަތް ކުރިއަށްދާ ދުވަސްތަކުގައި މާލެއާއި ހުޅުމާލޭގެ އެކި ސަރަޙައްދުތަކުން ކަރަންޓު ކެނޑުން އެކަށީގެންވާކަމަށް ސްޓެލްކޯއިން ބުނެއެވެ.
ސްޓެލްކޯއިން ބުނީ، ގްރޭޓަރ މާލެ ގްރިޑް އެނަޖައިޒް ކުރުމުގެ ފުރަތަމަ ދުވަހުގެ މަސައްކަތް ކާމިޔާބުކަމަށެވެ. އަދި އެ މަސައްކަތުގައި އެއްވެސް ޓެކްނިކަލް މައްސަލައެއް ކުރިމަތިނުވާކަމަށާއި، ގްރިޑުގެ ފުރަތަމަ ސާކިޓް މިހާރު އެނަރޖައިޒް ކޮށްފައިވާކަމަށެވެ. މި މަޝްރޫޢުގެ ދަށުން ހުޅުލޭ އިންޖީނުގެއާއި މާލޭ އިންޖީނުގެ ސިންކްރޮނައިޒް ކުރުމުގެ މަސައްކަތް މިއަދު ކުރާނެއެވެ.
ގްރޭޓަރ މާލެ ސަރަޙައްދުގައި ދިމާވާ ކަރަންޓުގެ މައްސަލަތައް ޙައްލުކުރުމަށް ސަރުކާރުން ކުރިއަށްގެންދާ މިމަޝްރޫއުގެ ދަށުން މާލެއާއި ހުޅުމާލެއާއި ހުޅުލެއާ ކަރަންޓުގެ އެއްވިއުގައަކުން ގުޅާލާނެއެވެ. އެއާއެކު މިތިން ސަރަޙައްދުގެ ތެރެއިން އެއްވެސް ސަރަޙައްދެއްގައި ކަރަންޓުގެ މައްސަލައެއް ދިމާވެ ކަރަންޓު ކެނޑޭ ޙާލަތެއް މެދުވެރިވެއްޖެނަމަ އަނެއް ސަރަޙައްދުގައި ބަހައްޓާފައިވާ ގްރިޑު މެދުވެރިކޮށް އެތަނަކަށް ކަރަންޓު ދިނުމުގެ އިންތިޒާމު ހަމަޖެހޭނެއެވެ.
މިގޮތަށް ކަރަންޓު ދިނުމަށް ބޭނުންވާ މައި ކޭބަލް އަޅާފައިވަނީ ސިނަމާލޭ ބްރިޖު ދަށުންނެވެ. ޖުމްލަ 6 ކޭބަލް މެދުވެރިކޮށް މިތިން ސަރަޙައްދުގެ ކަރަންޓު ގުޅާލަން އަޅާފައިވާ އިންޓަރކަނެކްޝަން ކޭބަލަކީ 100 މެގަވޮޓްގެ ކަރަންޓު ފޯރުކޮށްދެވޭނެ ނެޓްވޯކް ކޭބަލެކެވެ.
