މަޖިލިސް ރައީސް ނަޝިދު އަވަހާރަ ކޮށްލުމަށް އަމާޒުކޮށް ދީފައިވާ ޓެރަރިސްޓް ހަމަލާގެ ފުރިހަަމ ތަހުގީގެއް ފުލުހުން ހިންގަމުންދާ ގަބޫލު ނުކުރައްވާ ކަމަށް ނަޝީދު ވިދާޅުވެއްޖެއެވެ.
އެލެކްސް އަހުމަދު ނަމުގައި ނަޝީދު ގެންގުޅުއްވާ ޓުވިޓަރ އެކައުންޓުން ކުރެއްވި ޓުވީޓެއްގައި، މޯލްޑިވްސް ޕޮލިސް ސާވިސްގެ ފަރާތުން އަދިވެސް ކުރިޔަށް ގެންދަވާ ތަހުގީގުގައި ފުލުހުން ސަމާލުކަން ދީފައިނުވާ 7 ކަމެއް ނަޝީދު ފާހަ ކުރައްވާފައި ވެއެވެ.
މިގޮތުން ފާހަގަ ކުރައްވާފައިވާ ކަންކަމަކީ:
- މިހާރު ހައްޔަރު ކޮށްފައިވާ މީހުންގެ ހަރަކާތްތައް ފުރިހަމަޔަށް ދެނެގަނެވިފައި ނުވުން
- ބޮން ގޮއްވުމަށް ބޭނުންކުރި ސަމާނުގެ އަސްލު ދެނެގަނެވިފައި ނުވުން
- ބޮން ގޮއްވި އޮޕަރޭޝަނަށް ފަންޑު ކުރި މީހުންނާ ބެހޭ މަޢުލުމާތު ހޯދާގަނެވިފައި ނުވުން
- ހަމަލާ ދިނުމަށް ގޮއްވާލި ބޮން ހެދުމަށް ބޭނުންކުރި ޓެކްނޮލިޖީ ދެނެގަނެވިފައި ނުވުމާއި، ރިމޯޓް ކޮންޓްރޯލުން ގޮއްވާލާނެ އައީޑީއެއް، ހައްޔަރު ކުރިމީހުން ހެދިގޮތް ދެނެގަނެވިގައި ނުވުން
- ހަމަލާގެ މައުލޫމާތު ދެނެތިބީ ކޮން ބައެއްކަން ހޯދިފައި ނުވުން
- އަބުދުﷲ އަލިމަނިކު ނަމަކަށް ކިޔާ މީހަކަށްވުރެ ދުރަށް މައުލޫމާތު ހޯދިފައި ނުވުން
- ހަމަލާގެ މައުލުމާތު ލިބިތި މީހުން ޓްރޭސް ކުރެވިފައި ނުވުން
ނަޝީދު ވިދާވި ގޮތުގައި މިހަމަލާ ތަހުގީގު ކުރުމުގައު ފުލުހުންނަށް މިހާރަށްވުރެ ރަގަޅަށް މަސައްކަތް ކުރެވޭނެކަމަށާއި، އެހެންނަމެވެސް، މިހަމަލާގެ ޒިންމާ އުފުލަންޖެހޭ ފަރާތްތައް ހޯދުމަށް ފުލުހުން ނާކާމިޔާބު ވެފައިވާ ކަމަށެވެ.
6 މޭގެ ޓެރަރިސްޓް ހަމަލާއާގުޅިގެން ނަޝީދުގެ ފާޑިކުއުން ފުލުހުންނަށް އަމާޒުވެގެން ގޮސްފައިވާއިރު، ޓެރަރިސްޓް ހަމަލާއާ ގުޅިގެން ހައްޔަރުކޮށްފައިވާ މީހުންނަށް އަންނަ ހަފްތާގައި ދައުވާކުރަން ފޮނުވުމަށް މަސައްކަތްކުރަމުންދާކަމަށް ސަރުކާރުން މަޢުލޫމާތުދީފައި ވާކަމަށް، އެމްޑީޕީގެ މޭ 6 ކޮމެޓީން ފާއިތުވެދިޔަ ހަފްތާގައި ބުނެފައި ވެއެވެ.
މޭ 6 ކޮމެޓީއަކީ ރައީސް ނަޝީދަށް އަމާޒުކޮށްދިން ޙަމަލާގެ ތަހުގީގުގެ ކަންކަން ހިނގާނުހިނގާގޮތް ބެލުމަށް ވެރިކަން ކުރާ މައި ޕާޓީ، އެމްޑީޕީން އުފައްދާފައިވާ ކޮމެޓީއެކެވެ.
މޭ 6 ގެ ކޮމިޓީން ބުނެފައިވަނީ، ނަޝީދަށް ހަމަލާދިނުމުގައި އަމަލީގޮތުން ބައިވެރިވި މީހުންނާއި، މިކަން ރާވާ ހިންގުމާއި، ފަންޑުކުރުމުގެ އަޑީގައި ތިބި ބަޔަކު ފުލުހުންގެ ތަޙްޤީޤުން މިހާތަނަށް ދެނެގަނެވިފައިނުވާތީ އެކަމުގެ ކަންބޮޑުވުން އޮތް ކަމަށެވެ. އަދި މިފަދަ ބޮޑުކަމެއް ހިނގާދިޔައިރު، އެކަމުގެ އިންޓެލިޖެންސް މަޢުލޫމާތު ސަލާމަތީ ބާރުތަކަށް ލިބިފައިނުވުމުގެ ކަންބޮޑުވުންވެސް ކޮމެޓީން ވަނީ ފާޅުކުރައްވާފައެވެ.
އެހެންނަމަވެސް، މި ހަމަލާގެ ތަހުގީގު ކުރިޔަށް ދާގޮތް ބެއްލެވުމަށް ރައީސް ކަޑައަޅުއްވާފައިވާ ޚާއްސަ މަންދޫބު ވިދާޅުވެފައިވަނީ، ހަމަލާގެ ތަހުގީގު ކުރިޔަށް ދާގޮތާމެދު ހިންހަމަޖެހި ވަޑައިގަންނަވާ ކަމަށެވެ.
މި މިހަމަލާއާއި ގުޅިގެން ރައްޔިތުންގެ މަޖިލީހުން ހަދާފައިވާ އިންކުއަރީ ރިޕޯޓަށް މީގެކުރިން ނަޝީދުވަނީ ވަރަށް ބޮޑަށް ތައުރީފް ކުރައްވާފައެވެ.
