ފޮރިން ސާވިސް ބިލު މަޖިލީހުން ފާސްވުމުން ފޮރިން މިނސިްޓްރީގެ ހުރިހާ ފަންތިއެއްގެ މުވައްޒަފުންނަކީ، މިހާރަށްވުރެ ޕްރޮފެޝަނަލް ގޮތެއްގައި، މިނިވަންކަމާއި ޒިންމާދާރުކަމާއެކު ޚިދުމަތްކުރާ ބަޔަކަށް ވެގެންދާނެ ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
މިނިސްޓްރީ އޮފް ފޮރިން އެފެއާޒްގެ ޢިމާރާތުގެ ނަން އަލްމަރްޙޫމް އަލްއުސްތާޛު ފަތުޙުﷲ ޖަމީލު (ނ.ޢ.ޢ.ވ) ގެ ނަންފުޅަށް ތަޙްޞީޞް ކުރެއްވުމަށްޓަކައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ ބިލު ޤާނޫނަކަށްވުމުން، ރާއްޖޭގެ އެންމެ މަތީ މަޞްލަޙަތު ރައްކާތެރިކުރެވި، ރާއްޖޭގެ މިނިވަންކަމާއި ސިޔާދަތު ދެމެހެއްޓުމުގައި، ބައިނަލްއަޤުވާމީ މުޖުތަމަޢުގައި، ރާއްޖޭގެ ފަރާތުން އަދާކުރަންޖެހޭ ޒިންމާތައް އަދާކުރަންވެސް ފަސޭހަވެގެންދާނެ ކަމަށެވެ. މި ބިލުން ޚާރިޖީ ޓީމަށް އަންނާނެ އެންމެ ބޮޑު ބަދަލަކީ، ހުނަރުވެރި ޢިލްމީ މުވައްޒަފުންތަކެއް ބިނާކުރުމަށް މިހާރަށްވުރެ ފަހި ފުރުޞަތުތަކެއް ތަނަވަސްވެގެންދިޔުން ކަމަށް ރައީސް ވިދާޅުވިއެވެ.
އޭރުން ތިޔަބޭފުޅުން މިހާރު ޤައުމަށް ތިޔަ ކޮށްދެއްވާ ޚިދުމަތްތައް، އެއަށްވުރެ މާ ފުރިހަމައަށް ކޮށްދެއްވޭނެ.
– ރައީސް ވިދާޅުވިއެވެ.
މިހާރު ތަޖުރިބާކުރަން ޖެހިފައި މިވާ ކޯވިޑުގެ ދަތިކަމުގެ ތެރޭގައިވެސް، ރާއްޖޭން ބޭރުގައި ތިބި ދިވެހިންނަށް އެހީތެރިކަން ފޯރުކޮށްދިނުމުގައްޔާއި، ރާއްޖެއަށް ބޭނުންވާ އެހީތެރިކަން ހޯދުމުގައިވެސް، ޚާރިޖީ ޓީމުން ވަރަށް ސާބިތުކަމާއެކު، ވަރަށް ބުރަ މަސައްކަތްތަކެއް މިހާރުވެސް ކުރައްވަމުން ދާކަން ފާހަގަކޮށް ރައީސް ވަނީ ޝުކުރު އަދާ ކުރައްވާފައެވެ.
ޚާރިޖީ ދާއިރާ މިހާރަށްވުރެ ހަރުދަނާކުރުމަށް ސަރުކާރުން ކުރަމުން އަންނަ މަސައްކަތްތައް ފުރިހަމަވުމުން، ޚާރިޖީ ޓީމުގެ ޚިދުމަތްތައް އެތައް ދަރަޖައަކަށް ތަރައްޤީވެގެންދާނެކަމަށާއި، ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ، ޚާރިޖީ ޚިދުމަތުގެ ބިލް ޤާނޫނަކަށްވުމުން، މި މިނިސްޓްރީގެ ހުރިހާ ފަންތިއެއްގެ މުވައްޒަފުންނަކީ، މިހާރަށްވުރެ ޕްރޮފެޝަނަލް ގޮތެއްގައި، މިނިވަންކަމާއި ޒިންމާދާރުކަމާއެކު ޚިދުމަތްކުރާ ބަޔަކަށް ވެގެންދާނެކަމަށް ރައީސް ވިދާޅުވިއެވެ.
މިއަދުގެ ބައިނަލްއަޤްވާމީ މުޖުތަމަޢު ޤަބޫލުކުރަނީ، ކޮންމެ ޤައުމެއްގެވެސް މިނިވަންކަން، އެންމެ ފުރިހަމަ މާނައިގައި ޙިމާޔަތްކުރުމުގެ ސިޔާސަތު. އ.ދ.ގެ އާންމު މަޖިލީހުގެ ރިޔާސަތަށް، ރާއްޖޭގެ ޚާރިޖީ ވަޒީރު އިންތިޚާބު ކުރުމަކީވެސް، ރާއްޖޭގެ މިނިވަންކަމާއި ސިޔާދަތު އެންމެ ފުރިހަމަ މާނައިގައި ޙިމާޔަތްކުރެވިފައިވާ ކަމާއި، މުޅި ދުނިޔެ އެކަމަށް އިޢުތިރާފްވާކަމުގެ ހެއްކެއް.
– ރައީސް ވިދާޅުވިއެވެ.
ރާއްޖޭގެ ޚާރިޖީ ސިޔާސަތު ދުނިޔެއަށް ހާމަކޮށްދެއްވުމުގައި، ފޮރިން މިނިސްޓަރު ޢަބްދުﷲ ޝާހިދާއި އެމަނިކުފާނުގެ ޚާރިޖީ ޓީމުން ކުރައްވާ މަސައްކަތް ހެޔޮހިތުން ބަލައިގަނެ، ރާއްޖޭގެ ޚާރިޖީ ޓީމުން، ބައިނަލްއަޤްވާމީ މަސްރަޙުގައި، މިހާރަށްވުރެ މާ އަލިގަދަ ވިދުމަކުން، ދިވެހިންގެ ނަން ފަޚުރުވެރިކޮށްދެއްވާނެކަމަށް ޔަގީން ކުރައްވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
