ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލުމަށް ދިން ނުރައްކާތެރި ޓެރަރިސްޓް ހަމަލާއާ ގުޅިގެން ހައްޔަރުކޮށްފައިވާ މީހުންނަށް އަންނަ ހަފްތާގައި ދައުވާކުރަން ފޮނުވުމަށް މަސައްކަތްކުރަމުންދާކަމަށް ސަރުކާރުން މަޢުލޫމާތުދީފައި ވާކަމަށް، އެމްޑީޕީގެ މޭ 6 ކޮމެޓީން ބުނެފި އެވެ.
މޭ 6 ކޮމެޓީއަކީ ރައީސް ނަޝީދަށް އަމާޒުކޮށްދިން ޙަމަލާގެ ތަހުގީގުގެ ކަންކަން ހިނގާނުހިނގާގޮތް ބެލުމަށް ވެރިކަން ކުރާ މައި ޕާޓީ، އެމްޑީޕީން އުފައްދާފައިވާ ކޮމެޓީއެކެވެ.
އެޕާޓިން ރޭ ބޭއްވި 179 ވަނަ ޤައުމީ މަޖިލިސް ޖަލްސާގައި މޭ 6 ކޮމެޓީން މިހާތަނަށް އެއްކޮށްފައިވާ އެންމެ ފަހުގެ މަޢުލޫމާތު ހިއްސާކުރައްވަމުން ކޮމިޓީގެ މުޤައްރިރު، ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ޙަސަން އަފީފް ވިދާޅުވީ، ރައީސް ނަޝީދަށް އަމާޒުކޮށް މޭ 6 ގައި ދިން ހަމަލާގެ ތަޙްޤީޤު ކުރިއަށްދާގޮތާގުޅޭ މަޢުލޫމާތު ހޯދުމަށް މިމަހުގެ 5 ވަނަ ދުވަހު ހޯމް މިނިސްޓަރ ޢިމްރާން ޢަބްދުﷲއާއި ކޮމެޓީން ބައްދަލުކުރައްވާފައި ވާކަމަށެވެ.
ރައީސް ނަޝީދަށް އަމާޒުކޮށް ނުރައްކާތެރި ޙަމަލާއެއް ދޭން އުޅޭކަމުގެ އެއްވެސް މަޢުލޫމާތެއް ފުލުހުންގެ އިންޓެލިޖެންސަށް ދުރާލާ ލިބިފައިނުވާކަމަށާއި، މިހާތަނަށް ބެލި ބެލުމުން ރައީސް ނަޝީދަށް އަމާޒުކޮށްދިން ޙަމަލާގެ ފަހަތުގައި ވަނީ އެންމެ މޯޓިވްވެއްކަން އެނގިފައި ވާކަމަށް މިނިސްޓަރ ވިދާޅުވެފައިވާކަމަށް އަފީފް ވިދާޅުވިއެވެ.
އަދި މިކަމުގައި ޝާމިލުވާކަމަށް މިހާތަނަށް ދެނެގަނެވިފައިވާ މީހުންގެ ތެރޭގައި އާންމުކޮށް ކުށްތަކުގައި އުޅޭ މީހުން ބައިވެރި ނުވާކަމަށާއި، މި މައްސަލައިގައި ހަރަކާތްތެރިވެފައިވަނީ އެންމެ މަތީ ދަރަޖައިގެ ހަރުކަށި ފިކުރުގެ މީހުންކަމަށް ހޯމް މިނިސްޓަރ ވިދާޅުވިކަމަށްވެސް ޢަފީފް ރޭ ވިދާޅުވިއެވެ.
މި މައްސަލައިގައި ހައްޔަރުކޮށްފައިވާ މީހުންނަށް ދައުވާކުރުމަށް މިމަހުގެ 20ގައި ފޮނުވުމަށް މަސައްކަތްކުރަމުންދާކަމަށްވެސް ހޯމް މިނިސްޓަރާއެކު ބޭއްވެވި ބައްދަލުވުމުގައި މިނިސްޓަރ ވިދާޅުވެފައިވާކަމަށް ޢަފީފް ވިދާޅުވިއެވެ.
"ޖުލައިމަހުގެ 20 ގައި މިހާރު ހައްޔަރުކޮށްފައިވާ މީހުންނަށް ދައުވާކުރުމަށް މަސައްކަތްކުރަމުން ގެންދަވާކަމަށް މިނިސްޓަރ ވިދާޅުވި"
– ޢަފީފް
ރައީސް ނަޝީދަށް ހަމަލާދިނުމުގައި އަމަލީގޮތުން ބައިވެރިވި މީހުންނާއި، މިކަން ރާވާ ހިންގުމާއި، ފަންޑުކުރުމުގެ އަޑީގައި ތިބި ބަޔަކު ފުލުހުންގެ ތަޙްޤީޤުން މިހާތަނަށް ދެނެގަނެވިފައިނުވާތީ އެކަމުގެ ކަންބޮޑުވުން މޭ 6 ކޮމެޓީގެ ފަރާތުން ވަނީ ފާޅުކުރައްވާފައެވެ. އަދި މިފަދަ ބޮޑުކަމެއް ހިނގާދިޔައިރު، އެކަމުގެ އިންޓެލިޖެންސް މަޢުލޫމާތު ސަލާމަތީ ބާރުތަކަށް ލިބިފައިނުވުމުގެ ކަންބޮޑުވުންވެސް ކޮމެޓީން ވަނީ ފާޅުކުރައްވާފައެވެ.
މި ހަމަލާއާ ގުޅިގެން މަޖިލީހުގެ 241 ކޮމެޓީން އެކުލަވާލި ޕާލިމަންޓްރީ އިންކުއަރީގެ ރިޕޯޓުގައި ފާހަގަކޮށްފައިވާ ކަންކަން ދިރާސާކޮށް، ރިޕޯޓުގައި ރިކޮމެންޑޭޝަންތަކުގެ ގޮތުގައި ފާހަގަކޮށްފައިވާ ކަންކަން ދަޢުލަތުގެ ކަމާބެހޭ މުޢައްސަސާތަކުން ތަންފީޒުކުރަމުންދާ މިންވަރު ވަރަށް ގާތުން ބަލަމުންދާނެކަމަށްވެސް މޭ 6 ކޮމެޓީން ވަނީ ބުނެފަ އެވެ.
241 ކޮމިޓީން ތައްޔާރުކުރި އިންކުއަރީ ރިޕޯޓްގައި ވަނީ ރައީސް މުހައްމަދު ނަޝީދަށް ދިން ހަމަލާއާއި އެމަނިކުފާނަށް ދެއްވަމުންދާ ސެކިއުރިޓީގެ ކަންކަން ދިރާސާކޮށްފައެވެ. އަދި އެކަމާއި ގުޅިގެން ދައުލަތުގެ އިދާރާތަކުން އިސްލާހުކުރަން ފެންނަކަމަށް މަޖިލީހަށް ފެންނަ ކަންކަން މި ރިޕޯޓުގައި ފާހަގަކޮށްފައިވެއެވެ. އެގޮތުން މި ރިޕޯޓްގައި ޖުމްލަ 45 ރިކޮމެންޑޭޝަނެއް ހިމެނެއެވެ. މީގެތެރޭގައި ސިފައިން ހަތިޔާރާއެކު ރައީސް ނަޝީދުގެ ގެކޮޅު މޮނިޓަރ ކުރުންވެސް ހިމެނެއެވެެ.
