އެމްޑީޕީގެ ރައީސް މުހައްމަދު ނަޝީދާއި، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކުޅުއްވާ ގޭމްގައި ޖެހިފައިވަނީ ވެރިކަން ކުރާ ކޯލިޝަންގެ ބައިވެރިން ކަމުގައި ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް (ސެމްބެ) ވިދާޅުވެއްޖެއެވެ.
ރައީސް ޞާލިހުއާއިއެކު ސިޔާސީ މަސައްކަތް ކުރެއްވުމަށް ބޭނުން ނުވާކަމަށް ރައީސް ނަޝީދު ވިދާޅުވެ ދެއްކެވި ވާހަކަތަކާއި ގުޅިގެން ސިޔާސީ މަސްރަހުގައި ގިނަ ކަންތައްތަކެއް މިދުވަސްވަރު ދަނީ ހިނގަމުންނެވެ. ޚާއްސަކޮށް އެމްޑީޕީގެ ތެރޭގައި ކޯލިޝަނާއިމެދު އޮތް އިތުބާރު ގެއްލި އެކި ވާހަތައް ދަނީ ދައްކަމުންނެވެ. ރައީސް ނަޝީދަށް ދިން ހަމަލާއަށްފަހު ތަހުގީގް ހިންގަމުންދާ ގޮތާއިމެދު ހިތްހަމަ ނުޖެހި އެމްޑީޕީގެ ރައީސް ނަޝީދަށް ތާއީދު ކުރައްވާ ބޭފުޅުންދަނީ ރައީސް ޞާލިހުއާއި، ކެބިނެޓް ބައެއް ވަޒީރުންވެސް އިސްތިއުފާ ދެއްުވުމަށް ގޮވާލަމުންނެވެ.
އެމްޑީޕީގެ ތެރޭގައި މިހާރު އޮތް ޚިޔާލު ތަފާތުވުންތަކައި ގުޅިގެން ހުސެއިން ވިދާޅުވީ މިއީ ރައީސް ނަޝީދާއި، ރައީސ ޞާލިހު ކުޅުއްވާ ސިޔާސީ ގޭމެއް ކަމަށެވެ. މިގޭމްގައި ޖެހިފައިވަނީ ކޯލިޝަންގައި ހިމެނޭ ސިޔާސީ ޕާޓީތަކާއި އެޕާޓީތަކުގެ ވެރިންކަމަށެވެ. މިއަދު ކޯލިޝަންގައި ތިބި ބައިވެރިންނަށް ދިވެހި ރައްޔިތުން މަޢާފް ނުކުރާނެކަމަށާއި، ޕީޕީއެމްއާއި ރައީސް ޔާމީން ހުންނެވީ ދިވެހި ރައްޔިތުންނާއިއެކު ވަރަށް ސާބިތިވެކަމަށް ހުސެއިން ވިދާޅުވިއެވެ.
ރައީސް އިބްރާހިމް މުހައްމަދު ޞާލިހު އާއި ރައީސް ނަޝީދު ސިޔާސީ ގޮތުން ކުޅުއްވާ ގޭމް ގައި ޖެހިފައިވަނީ އެމްޑީޕީ އާއެކުވާ ކޯލިޝަން ބައިވެރިން. އެބައިވެރިންނަށް ރައްޔިތުން މަޢާފެއް ނުކުރާނެ. ރައީސް ޔާމިން ހުންނެވީ ރައްޔިތުންގެ ނިންމުމަށް އިޙްތިރާމް ކުރައްވައިގެން.
– ހުސެއިން ވިދާޅުވިއެވެ.
އެމްޑީޕީގެ ގިނަ އަދަދެއްގެ މެމްބަރުން ތިބޭ އަދި އާންމު ބައެއް މީހުންގެވެސް ތިބޭ ” ޖަޒީރާ” ވަޓްސް އަޕް ގްރޫޕުގައި ރައީސް ނަޝީދު ވަނީ ރާއްޖޭގެ ހަރުކަށި ފިކުރު އޮތް މިންވަރާއި ގުޅޭގޮތުން ވަރަށް ތަފްސީލީ ގޮތެއްގައި ވާހަކަ ދައްކަވާފައެވެ. އަދި މިކަމުގައި އެމަނިކުފާނުގެ ކަންބޮޑުވުން އޮތްމިންވަރު ވަނީ ހިއްސާ ކުރައްވާފައެވެ. ރައީސް ނަޝީދު ވިދާޅުވީ މިހާރު އޮތް ވެރިކަން ހިންގާ ކޯލިޝަނާއިއެކު ކުރިއަށް ދިއުމަށް ނޭދޭކަމަށެވެ. އަދި ރައީސް ޞާލިހުއާއިއެކު ސިޔާސީ އެއްވެސް މަސައްކަތެއް ކުރުމަށް ދެން ނުހުރެވޭނެކަމަށް ރައީސް ނަޝީދު ވިދާޅުވިއެވެ.
އަޅުގަނޑާއި މިހާރު ރައީސުލްޖުމްހޫރިއްޔާއާއި، ފިކުރީ ގޮތުން ޚިޔާލު ތަފާތު. އަޅުގަނޑު މެންގެ ޒާތީ ކަންތައްތަކުގައި އަބަދުވެސް އުޅޭނީ އެކުގައި. އަޅުގަނޑުގެ ދަރިންގެ އިބޫ ދޮންބެ އެއްކަމަކު، އެކަމަކު ދެން ރައީސުލްޖުމްހޫރިއްޔާއާއި އެކީ ސިޔާސީ ގޮތުން ހުރެވޭކަށް ނެތް.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އިތުރަށް ދެން ކުރަންޖެހޭ އެއްވެސްކަމެއް ނެތްކަމަށެވެ. ވެރިކަންވެސް ކުރެވިއްޖެ ކަމަށާއި، އަދި އެނޫންކަންވެސް ކުރެވިފައިވާކަމަށެވެ. ނަމަވެސް މިހާރު މަސައްކަތް ކުރައްވަނީ ޤައުމު ދަރިންނާއި ހަމައަށް ހެޔޮ ގޮތުގައި ވާސިލް ކުރުމުގެމަސައްކަތް ކުރުމަށް ކަމަށް ރައީސް ނަޝީދު ވިދާޅުވިއެވެ.
