ރައީސް އިބްރާހީމް މުހައްމަދު ސޯލިހަކީ އެމްޑީޕީގެ އެއް ބާނީ ކަމަށްވާތީ އިތުރު ސިޔާސީ ޕާޓީއެއް ހެދުމުގައި އެމަނިކުފާނުގެ ބައިވެރިވުމެއް ނޯންނާނެ ކަމަށް ރައީސް އޮފީހުން ބުނެފިއެވެ.
ރައްޔިތުންގެ މަޖިލީހުގެ ބައެއް މެންބަރުން އިސްވެ ސިޔާސީ ޕާޓީއެއް ހެއްދެވުމުގެ މަސައްކަތް ވަނީ ފަށާފައެވެ. އިސްކޮށް އުޅުއްވަނީ ކުރީގެ ޑިފެންސް މިނިސްޓަރު އަދި ދަނގެތި ދާއިރާގެ މެމްބަރު މުހައްމަދު ނަޒީމް (ކާނަލް ނާޒިމް) އާއި ތިމަރަފުށީ ދާއިރާގެ މެމްބަރު އަދި ކުރީގެ ކޮމިޝަނަ އޮފް ޕޮލިސް އަބްދުުﷲ ރިޔާޒެވެ. އެ ޕާޓީއަކީ ރައީސްގެ އިރުޝާދުގެ ދަށުން އުފައްދާ ޕާޓީއެއް ކަމަށް ބުނެ އަޑުތައް ދަނީ ފެތުރެމުންނެވެ.
ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ ރައީސް ސޯލިހަކީ އެމްޑީޕީ އުފެއްދުމުގައި އެންމެ ފުރަތަމަ ސޮއި ކުރެއްވި ބޭފުޅުންގެ ތެރޭގައި ހިމެނޭ އެ ޕާޓީގެ ބާނީއެއް ކަމަށެވެ. އެހެންކަމުން ރައީސް ސޯލިހް އެހެން ޕާޓީއެއް އުފައްދަން އެހީތެރިކަމާއި އެއްބާރުލުން ނުދެއްވާނެ ކަމަށެވެ.
ރައީސް ސޯލިހް އަބަދުވެސް ހުންނަވާނީ އެމްޑީޕީގައި. އެމަނިކުފާނަކީ އެމްޑީޕީއަށް މުހިއްމު ހިދުމަތްތަކެއް ކުރެއްވި އެ ޕާޓީގެ އެއް ފައުންޑަރު.
