ސައުދީ އަރަބިއާގައި 20 މިލިއަނަށްވުރެ ގިނަ ޑޯޒްގެ ކޯވިޑް19 ވެކްސިން އެގައުމުގެ ރައްޔިތުންނަށާއި އަދި އެގައުމުގެ ދިރިއުޅޭ މީހުންނަށް މިހާތަނަށް ދީފައިވާ ކަމަށް، ސައުދީ ހެލްތު މިނިސްޓްރީން ބުނެފިއެވެ.
ސައުދީ ހެލްތު މިނިސްޓްރީން ހާމަ ކޮށްފައިވާ ގޮތުގައި، އެގައުމުގެ ރައްޔިތުންނަށާއި އަދި ގައުމުގައ ދިރިއުޅެމުންދާ މީނުންނަށް ވެކްސިން ފޯރުކޮށް ދިނުމަށްޓަކާ، އެކި ސަރަހައްދުތަކުގައި 587އަށްވުރެ ގިނަ ވެކްސިން ސެންޓަރުތައް ވަނީ ގާއިމް ކޮށްފައެވެ.
އަދި ސައުދީ ސަރުކާރުން ހުއްދަދީފައިވާ ކޯވިޑް19 ވެކްސިންގެ ދެވަޑޯޒް ހުރިހާ އުމުރު ފުރައަކަށްވެސް މި ހަފްތާގައި ދޭން ފެށުމަށް މިހަފްތާގެ އާދީއްތަ އެގައުމުން ހާމަކޮށްފައި ވުމާއެކު، މިއަދަދު ވަރަށް ބޮޑުތަނުން ކުރިއަރައިގެން ދާނެކަމަށް ވަނީ ބެލެވިފައެވެ.
ސައުދީ ސަރުކާރުންވަނީ ފާއިތުވެދިޔަ އެޕްރިލްމަހުން ފެށިގެން، ވެކްސިން އެއްވެސް ގޮތަކަށް ޖަހާފައި ނުވާމީހުންނަށް ފުރަތަމަ ޑޯޒްގެ ވެކްސިން ދޭން ފެށްޓުމަށްޓަކާ ދެވަނަ ޑޯޒް ޖެހުން ވަގުތީގޮތުން މަޑު ޖައްސާލާފައެވެ.
މި ހަފްތާގެ ހުކުރު ދުވަހު، ސައުދީގެ ފުޑް އެންޑް ޑްރަގް އޮތޯރިޓީންވަނީ، އެގައުމުގައި މޮޑާނާގެ ކޯވިޑް ވެކްސިން ބޭނުން ކުރުމުގެ ހުއްދަ ދޫކޮށްފައެވެ. މި ވެކްސިންގގެ އިތުރުން، އޮކްސްފޯރޑްގެ އެސްޓްރާ ޒެނެކާ ވެކްސިނާއި، ފައިޒާ-ބައޯއެންޓެކް ވެކްސިންގެ އިތުރުން ޖޯންސަން އެންޑް ޖޯންސަން ކޯވިޑް19 ވެކްސިންވެސް ސައުދީގައި ބޭނުން ކުރުމުގެ ހުއްދަވަނީ ދޫކޮށްފައެވެ.
