ރައީސް ސޯލިހުއަށް ނިސްބަތްކޮށް އެމްޑީޕީގެ ބައެއް މެމްބަރުން އެންމެ "އިސް ލީޑަރު"ގެ ނަމުން ނިސްބަތްކޮށް މުޚާތަބު ކުރަން ބޭނުން ނުވިޔަސް މިއީ މިއަދު ހަގީގަތްކަމުގައި، އާރުޑީސީގެ އެމްޑީ އަދި އެމްޑިޕީގެ ގައުމީ މަޖިލިހުގެ މެމްބަރު މޫސާ އަލި މަނިކު (މޫކޭ) ވިދާޅު ވެއްޖެއެވެ.

މޫކޭ މިގޮތަށް ވިދާޅުވެފައިވަނީ، އެމްޑިޕީ އެތެރޭގެ ކޯޅުންތައް އިންތިހާއަށް މައްޗަށް ގޮސް، އެޕާޓީގެ ރައީސް ސޯލިހު ފެކްޝަނަށް ތާއީދު ކުރާ ފަރާތްތަކަށް އަމާޒުކޮށް، ރައްޔިތުންގެ މަޖިލިހުގެ ބިލެތްދޫ ދާއިރާގެ މެމްބަރު، އަދި މަޖިލިސް ރައީސް ނަޝީދުގެ ފެކްޝަނަށް ތާއީދު ކުރައްވާ ދޮންބިލެތް އަހުމަދު ހަލީމު، ކްލަބު ހައުސްގައި ފާޑުވިދާޅުވި ވިދާޅުވުމަށް ރައްދު ދެއްވާ ކުރެއްވި ޓުވީޓެއްގައެވެ.

މޫކޭ ވިދާޅުވެފައިވަނީ، ހަސަދަވެރިންގެ ހިތްތައް ފަޅަފަޅައިގެން ހިގައްޖެ ކަމަށާއި، ރައީސް ސޯލިހު ފަހަތައް ނުޖެއްސުނު ކަމަށެވެ. އަދި ރައީސް ސޯލިހުއަކީ އެމްޑީޕީގެ އިސް ލީޑަރުކަމުގައި ބަޔަކު މީހުން ގަބޫލުކުރަން ބޭނުން ނުވިޔަސް، އެއީ މިއަދުގެ ހަގީގަތްކަމަށާއި، ރައީސް ސޯލިހު ބަލިކޮށްލުމަށް ރާވާ ކޮންމެ ރޭވުމަކުން އެމަނިކްފާނު ކާމިޔާބު ހޯއްދަވަމުން ގެންދަވަނީ މަޑުމައިތިރިކަމާއި ކެތްތެރިކަން އިސްކޮށްގެން ކަމުގައެވެ.

އަދި އެމްޑީޕީގެ އެތެރޭގައި އޮތް ނަޝީދުގެ ނުފޫޒަށް އިޝާރާތް ކޮށް، ނަޝީދުގެ ފެކްޝަނަށް ތާއީދުކުރާ ފަރާތްތަކަށް ނިސްބަތްކޮށް މޫކޭ ވިދާޅުވެފައިވަނީ، ރަސްކަމަކަށް ރާއްޖެ ދެން އަބުރާ ނުގެންދެވޭނެ ކަމަށެވެ.

މަޖިލިސް ރައީސް ނަޝީދު ފެކްޝަނަށް ތާއީދުކުރާ، މަޖިލިސް މެމްބަރު ދޮންބިލެއް އަހުމަދު ހަލީމުގެ ވާހަކަތަކަށް މޫކޭ ރައްދު ދެއްވާފައިވާއިރު، ފަހަކަށް އައިސް އެމްޑީޕީގެ އެތެރޭގައި، މަޖިލިސް ރައީސް ނަޝީދުއާއި ރައީސް ސޯލިހުގެ ޚިޔާލު ގިނަ ކަންކަމުގައި ތަފާތުވެ، ދެބޭފުޅުންގެ ދެފެކްޝަން އެމްޑީޕީގެ އެތެރޭގައި އުފެދި، ސަރުކާރުގެ ހިންގުމަށްވެސް މި ބައިބައިވުންތަކުގެ އަސަރުތައް ވަނީ ކޮށްފައެވެ.

ސިޔާސީ ބައެއް ފަރާތްތަކުން ވިދާވާގޮތުގައި ރައީސް ސޯލިހާއި މަޖިލިސް ރައިސް ނަޝީދުއާއި ދެބެފުޅުންގެ މެދުގައި އުފެދިފައިވާ ޚިޔާލު ތަފާތުވުންތަކުގެ އަސްލަކީ، 2023ގެ ރިޔާސީ އިންތިޚާބުގައި ވާދަކުރުމަށްޓަކާ އެމްޑީޕީގެ ޓިކެޓް ކަށަވަރު ކުރުމަށް އެމްޑީޕީގެ އެތެރެއިން ދެބޭފުޅުންވެސް ކުރައްވަމުން ގެންދަވާ މަސައްކަތްޕުޅުތަކުގެ ނަތީޖާއެއްގެ ގޮތުން އުފެދިގެން ގޮސްފައިވާ ޚިޔާލު ތަފާތުވުން ތަކެކެވެ. މިގޮތުން ދާދިފަހުން ރައީސް ނަޝީދު ވިދާޅުވެފައިވަނީ، 2023ގައި އެމްޑީޕީގެ ޓިކެޓުގައި ވާދަކުރައްވާނީ އެމަނިކްފާނު ކަމުގައެވެ.

އެހެންނަމަވެސް މިހާތަނަށް އައިއިރު، 2023ގައި ވާދަ ކުރައްވާނެ ކަމުގެ އިޝާރާތެއް ރައީސް އިބުރާހިމް މުހައްމަދު ސޯލިހު ދެއްވާފައި ނުވެއެވެ.